ជនភៀសខ្លួនស៊ូដង់យ៉ាងតិច ៥០ ស្លាប់ក្នុងហេតុការណ៍ភ្លើងឆេះទូកនៅលីប៊ី

អង្គការអន្តរជាតិសម្រាប់ការធ្វើចំណាកស្រុក (IOM) បាននិយាយថា យ៉ាងហោចណាស់ជនភៀសខ្លួនស៊ូដង់ ៥០ នាក់បានស្លាប់ ខណៈពេលដែលទូកដឹកមនុស្ស ៧៥ នាក់បានឆេះចេញពីឆ្នេរសមុទ្រលីប៊ី។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៧ខែកញ្ញា។

ក្រោយការជួយសង្គ្រោះមានអ្នកនៅរស់រានមានជីវិតចំនួន ២៤ នាក់ តែពួកគេសុទ្ធតែរងរបួស។ ឧបទ្ទវហេតុនេះបានបន្ថែមទៅលើគ្រោះមហន្តរាយជនចំណាកស្រុកជាបន្តបន្ទាប់នៅសមុទ្រមេឌីទែរ៉ាណេ ដែលជាផ្លូវធ្វើចំណាកស្រុកដ៏គ្រោះថ្នាក់បំផុតមួយរបស់ពិភពលោក។

ក្រុមសិទ្ធិមនុស្សព្រមានថា ជម្លោះនៅក្នុងប្រទេសលីប៊ី ការរំលោភបំពាននៅក្នុងមណ្ឌលឃុំឃាំង និងការកាត់បន្ថយប្រតិបត្តិការជួយសង្គ្រោះ នៅតែបន្តធ្វើឱ្យជនភៀសខ្លួន និងជនចំណាកស្រុកស្ថិតក្នុងហានិភ័យខ្លាំង ខណៈដែលពួកគេព្យាយាមធ្វើដំណើរដ៏គ្រោះថ្នាក់ទៅកាន់អឺរ៉ុប។

គួរបញ្ជាក់ថានៅសមុទ្រមេឌីទែរ៉ាណេ យ៉ាងហោចណាស់ជនចំណាកស្រុក ឬជនភៀសខ្លួន ២៤៥២ នាក់បានស្លាប់ ឬបាត់ខ្លួនកាលពីឆ្នាំមុន៕

អត្ថបទ៖ ប៊ុន សុភាព