សាឡាងកោះនរាកោះពេជ្រ បើកដំណើរការរំដោះការស្ទះចរាចរណ៍នៅច្បារអំពៅ

ភ្នំពេញ៖ នៅព្រឹកថ្ងៃទី០៩ ខែមេសានេះ អាជ្ញាធររាជធានីភ្នំពេញ បានដាក់សាឡាងចម្លងយានយន្តចេញពីកោះនរា ទៅកោះពេជ្រ និងពីកោះពេជ្រទៅកោះនរា ដើម្បីរំដោះការកកស្ទះចរាចរណ៍លើស្ពានព្រះមុនីវង្សហើយ ដោយសារមានការដ្ឋានអ៊ុតកៅស៊ូលើស្ពានច្បារអំពៅ ដែលត្រូវធ្វើទាំងយប់ទាំងថ្ងៃក្នុងរយៈពេល៣ថ្ងៃ ចាប់ពីថ្ងៃទី០៨ រហូតដល់ថ្ងៃទី១០ ខែមេសានេះ។

ដើម្បីសម្រួលការងារនៃការដឹកជញ្ជូននេះឱ្យយកាន់តែប្រសើរ ក្រោយពីមានការណែនាំពីអភិបាលរាជធានី លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានី លោក ថេង សុថុល អភិបាលខណ្ឌចំការមន លោក ចេង មុនីរ៉ា អភិបាលខណ្ឌច្បារអំពៅ នាព្រឹកថ្ងៃទី០៩ មេសានេះបានចុះពិនិត្យនៅទីតាំងខាងលើ ដើម្បីសម្រួលការដឹកជញ្ជូនឱ្យបានប្រសើរឡើង។

លោក សាំ ពិសិដ្ឋ បានឱ្យដឹងថា អនុវត្តតាមការណែនាំរបស់លោក ឃួង ស្រេង អភិបាលរាជធានី គឺបានសម្រេចឱ្យក្រុមហ៊ុនឯកជន ដាក់សាឡាងចម្លងយានយន្តចេញពីកោះនរាទៅកោះពេជ្រ និងពីកោះពេជ្រទៅកោះនរា ដើម្បីរំដោះការកកស្ទះចរាចរណ៍នៅច្បារអំពៅ ហើយការចម្លងនេះនឹងធ្វើឡើងចាប់ពីពេលនេះតទៅ ដោយមិនមែនតែ៣ថ្ងៃនោះទេ គឺនឹងធ្វើការចម្លងរាល់ថ្ងៃតែម្តង។

គួរបញ្ជាក់ថា នៅលើស្ពានព្រះមុនីវង្សចាស់ម្សិលមិញនេះ ក្រុមការងារកំពុងឈូសឆាយកៅស៊ូចាស់ ដោយមិនអាចបើកឱ្យមហាជនធ្វើចរាចរណ៍ឆ្លងកាត់បានឡើយ បង្កការកកស្ទះយ៉ាងខ្លាំង តាំងពីព្រឹកព្រលឹមរហូតដល់យប់។
គ្រាន់តែបើកឱ្យដំណើរការឆ្លងសាឡាងភ្លាម មានប្រជាពលរដ្ឋ និងមន្ត្រីរាជការបានឆ្លងយ៉ាងច្រើន និងមមាញឹក ដោយមានសាឡាងចំនួន២គ្រឿងដឹកអ្នកដំណើរទៅមក៕

អត្ថបទ៖ ស្រីរ័ត្ន