អង្គការទស្សនៈពិភពលោក​​​ប្រគល់សម្ភារសប្បុរស​​​ជូន​មន្ទីរ​អប់រំ​ និងមណ្ឌលសុខភាពនៅខេត្តក្រចេះ

តាមរយៈជំនួយពីអង្គការទស្សនៈពិភពលោកប្រចាំប្រទេសសិង្ហបុរី អង្គការទស្សនៈពិភពលោកអន្តរជាតិ កម្ពុជា ប្រគល់ជូនតុ​​ និងកៅអីការិយាល័យ​ចំនួន ១៥០ ឈុត​​ និងម៉ាស់ដែលអាចប្រើឡើងវិញចំនួន​ ​៥០០,០០០ ម៉ាស់​ ដល់សាលាបឋមសិក្សាចំនួន ១២៤ មណ្ឌលសុខភាពចំនួន​ ១៤ និងពលរដ្ឋជាង ៨៧,០០០ នាក់។

ពិធីប្រគល់សម្ភារបានធ្វឡើងនៅថ្ងៃទី ១៣​ ខែតុលា​ ឆ្នាំ២០២២ នៅសាលាស្រុកសំបូរ​ ខេត្តក្រចេះដោយមានការចូលរួមពីសំណាក់លោកអភិបាលរងនៃគណៈអភិបាលខេត្តក្រចេះ តំណាងមន្ទីរអប់រំយុវជន​​ និងកីឡា មន្ទីរអភិវឌ្ឍន៍ជនបទ​ មន្ទីរសុខាភិបាល និងតំណាងគណៈអភិបាលស្រុកសំបូរ​ ស្នួល និងព្រែកប្រសព្វ​។

​​សម្ភារទាំងនេះទទួលបានការឧបត្ថម្ភពីក្រុមហ៊ុនចំនួនពីរនៅប្រទេសសឹង្ហបុរី​​ តាមរយៈអង្គការទស្សនៈពិភពលោកប្រចាំប្រទេសសិង្ហបុរី សម្រាប់កម្មវិធីអភិវឌ្ឍន៍តំបន់របស់អង្គការទស្សនៈពិភពលោកអន្តរជាតិកម្ពុជា​​ ប្រចាំខេត្តក្រចេះ។​

លោក ឡេង វីរៈ នាយកប្រតិបត្តិអង្គការទស្សនៈពិភពលោកអន្តរជាតិកម្ពុជាបានវាយតម្លៃខ្ពស់ចំពោះកិច្ចសហការ​ និងគុណតម្លៃនៃភាពជាដៃគូរវាងអង្គការទស្សនៈពិភពលោក​ និងក្រុមហ៊ុនទាំងពីរ។​​​

លោកបន្តថា​៖ «សម្ភារការិយាល័យទាំងនេះ​​ នឹងចូលរួមចំណែកក្នុងការគាំទ្រវិស័យអប់រំ​ នៅខេត្តក្រចេះ​ ដែលជាតំបន់គោលដៅថ្មីរបស់យើង។​ ខ្ញុំជឿជាក់ថា​ លោកគ្រូ​ អ្នកគ្រូ​ និងអង្គការទស្សនៈពិភពលោក​​ នឹងឃើញពិធីប្រគល់សម្ភារបែបនេះ ត្រូវបានរៀបចំបន្តបន្ទាប់ នៅតាមតំបន់ផ្សេងៗទៀត។​ អង្គការទស្សនៈពិភពលោក ប្តេជ្ញា​បន្តចូលរួម​លើកកម្ពស់វិស័យអប់រំ ​ និងសុខុមាលភាពសហគមន៍»។

ប្រធានការិយាល័យអប់រំស្រុកសំបូរ លោក ទួន​ ផល្លា សម្តែងក្តីសោមនស្ស និងថ្លែងអំណរគុណដល់ម្ចាស់ជំនួយ​ ដែលបានផ្តល់ជូននូវសម្ភារៈទាំងនេះ។ លោក បញ្ជាក់ថា៖«កន្លងមក សាលាបឋមសិក្សានៅតាមតំបន់ដាច់ស្រយាលជាច្រើន ពុំសូវទទួលបានជំនួយបែបនេះទេ។ សម្ភារការិយាល័យទាំងនេះ នឹងជួយឱ្យលោកគ្រូ​ អ្នកគ្រូ អាចរក្សាទុកសម្ភារបង្រៀនបានល្អ។ ចំណែក ជំនួយជាម៉ាស់ប្រើប្រាស់ឡើងវិញ ក៏នឹងជួយកាត់បន្ថយចំណាយរបស់​ អាណាព្យាបាលសិស្ស ផងដែរ»។

ពិធីនេះនឹងប្រព្រឹត្តិទៅដំណាលគ្នា នឹង​ពិធីសម្ពោធ​ស្ថានីយចែកចាយទឹកស្អាតនៅ​ភូមិ​អំពិល​ទឹក ឃុំកំពង់ចាម ស្រុក​សំបូរ ខេត្ត​ក្រចេះ ដែលជាស្ថានីយដំបូងបំផុតនៅស្រុកសំបូរ​ ក្រោមការ​​​គាំទ្រពីកម្មវិធីសហគមន៍ទំនុកបម្រុង។

តំបន់គោលដៅរបស់អង្គការទស្សនៈពិភពលោកអន្តរជាតិកម្ពុជា​ នៅស្រុកសំបូរ ស្រុកស្នួល និងស្រុកព្រែកប្រសព្វ ត្រូវបានបង្កើតឡើង​នៅក្នុងឆ្នាំ២០២១ ក្រោមជំនួយឧបត្ថម្ភ​ពីអង្គការទស្សនៈពិភពលោកប្រចាំប្រទេសសិង្ហបុរី​ អាឡឺម៉ង់​ អាមេរិក​ និងកាណាដា៕