រយៈពេលជាង ៦ ខែ កម្មវិធីវង់តន្ត្រីខ្មែរ រដូវកាលទី២ អាចរកឃើញម្ចាស់ជយលាភីហើយ

ការប្រកួតសិល្បៈបុរាណចម្រុះ បានចាប់ផ្តើមពីថ្ងៃទី១៧ ខែឧសភា រហូតដល់ថ្ងៃទី០៩ ខែធ្នូ ឆ្នាំ២០២១ ទីបំផុត កម្មវិធីវង់តន្ត្រីខ្មែរ រដូវកាលទី២ ប្រធានបទ “សិល្បៈបុរាណចម្រុះ” អាចរកឃើញម្ចាស់ជយលាភីហើយ។

ជ័យលាភីលេខ១ បានទៅ លើ ក្រុមទេពបទុមវង្សពិណពាទ្យ មកពីរាជធានីភ្នំពេញ ចំណែកជ័យលាភីលេខ២ បានទៅ លើ ក្រុមយុវជនល្ខោនខោលកម្ពុជា មកពីរាជធានីភ្នំពេញ និង ជ័យលាភីលេខ៣ បានទៅ លើ ក្រុមមន្ទីរវប្បធម៌ខេត្តបន្ទាយមានជ័យមកពី ខេត្តបន្ទាយមានជ័យ។

កម្មវិធីនេះប្រារព្ធឡើងក្រោមអធិបតីភាព ឯកឧត្ដម ហាប់ ទូច រដ្ឋលេខាធិការ តំណាង លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ, ឯកឧត្ដម ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាប្រធានសហភាពសហ័ន្ធយុវជនកម្ពុជា, ឯកឧត្ដម ឌី វិជ្ជា ប្រធានសហភាពសហព័ន្ធយុវជនកម្ពុជា ខេត្តស្វាយរៀង និងភ្ញៀវកិត្តិយសជាច្រើនរូបទៀត។

កម្មវិធី វង់តន្ត្រីខ្មែរ រដូវកាលទី២នេះ បានទទួលវីដេអូប្រកួតជាច្រើនក្រុម និងទោល មកពីបណ្ដាលរាជធានី-ខេត្ត ចំនួន១៣។ ក្នុងនោះ មានទម្រង់សិល្បៈបុរាណជាច្រើន រួមមានចាប៉ីដងវែង អាយ៉ៃ របាំប្រជាប្រិយ របាំបុរាណ ចម្រៀងភ្លេងការ វង់ភ្លេងពិណពាណ្យ វង់ភ្លេងប្រពៃណី ល្ខោនយីកេ ល្ខោនបាសាក់ និងល្ខោនខោលជាដើម។

គួរបញ្ជាក់ថា កម្មវិធីវង់តន្ត្រីខ្មែរ រដូវកាលទី២នេះ ត្រូវបានបង្កើត និងរៀបចំឡើងក្រោមគំនិតផ្តួចផ្តើមរបស់សហភាពសហព័ន្ធយុវជនកម្ពុជា ខេត្តស្វាយរៀង និងគាំទ្រដោយ ក្រសួងវប្បធម៌ និងវិចិត្រសិល្បៈ និងសមាគមមិត្ត តន្រ្តីករ។ កម្មវិធីប្រកួត ត្រូវបានរៀបចំឡើងក្នុងគោលបំណង លើកកម្ពស់ និងផ្សព្វផ្សាយឧបករណ៍តន្រ្តីខ្មែរគ្រប់ទម្រង់ និងសិល្បៈបុរាណគ្រប់ប្រភេទ ដែលឆ្លុះបញ្ចាំងពីអត្តសញ្ញាណជាតិខ្មែរ៕

អត្ថបទ៖ ច័ន្ទ វីរៈ