លោកស្រី អុន សុខនី ប្រធានគណៈកម្មាធិការ មហោស្រពសិល្បៈខេត្តកំពត និងជានាយិកាប្រចាំប្រទេស របស់ អេពិកអាត បានឱ្យ កម្ពុជាថ្មី ដឹងថា នៅក្នុងព្រឹត្តិការណ៍ មហោស្រពសិល្បៈខេត្តកំពត ឆ្នាំ២០២៣ ក្រុមសម្តែង អេពិកអាតអីនខោនធើ នឹងសម្តែង របាំសហសម័យចំនួន ៣ មានចំណងជើង “របាំក្រមា” “សមត្ថភាព” និង “ដូច ដូចគ្នា”​ ដែលការសម្តែងសុទ្ធសឹងតែមានន័យបង្កប់តាម​រយៈរបាំ។

លោកស្រី អុន សុខនី បញ្ជាក់ថា៖ “​ដូច​ជា​ការ “ការសម្តែងក្រមា” គឺបង្ហាញអំពីប្រវត្តិរបស់ក្រមាដែលពាក់ពន្ធ័ជាមួយនឹងការរស់​នៅរបស់​មនុស្សជាតិ, ការសម្តែង “សមត្ថភាព” គឺបង្ហាញសមត្ថភាពផ្សេងៗគ្នារបស់ជនដែលមាន​ពិការភាព ដែលពួកមានសិទ្ធិដូចគ្នា និងសមត្ថភាពដូចគ្នា ដូចជនមិនមានពិការភាពដែរ ចំណែកការសម្តែង​ចុងក្រោយ “ដូច ដូចគ្នា” គឺចង់និយាយពីភាពកម្រ និងសមត្ថភាព​ចម្រុះរបស់​មនុស្ស​មិនថា អ្នកមានពិការភាព រឺមិនមានពិការភាព ពួកយើងមានសិទ្ធិដូចគ្នា ប្រាថ្នាចង់បានសេចក្តី​សុខ និងរីកចម្រើនដូចគ្នា ហើយបង្ហាញពីភាពអស្ចារ្យ នៃភាចម្រុះរបស់មនុស្សជាតិ និងការងាររួម​គ្នា​បែបបរិយាបន្ន”។​

តំណាងឱ្យក្រុមគណៈកម្មាធិការទាំងមូល លោកស្រី អុន សុខនី លើកឡើងថា លោកស្រី ពិតជាមានអារម្មណ៍រីករាយ និងរំភើប​ក្រៃលែង​ដែលយើងបាននាំមហោស្រពសិល្បៈខេត្ត​កំពត​ត្រឡប់មករិញ បន្ទាប់ពីបានផ្អាកអស់​រយៈពេលបីឆ្នាំកន្លងមក ដោយសារបង្ការការរាតត្បាតជំងឺ កូវីដ-១៩។

លោកស្រី អុន មានប្រសាសន៍បន្តថា៖ “កំពតជាខេត្តមានសក្កានុពលខ្ពស់ ទាំងវិស័យ ទេសចរណ៍ និងភាពសម្បូរបែបផ្នែក សិល្បៈ និងវប្បធម៌។ មហោស្រពខេត្តកំពត ជាផ្នែកមួយ ដ៏សំខាន់ដើម្បី រួម ចំណែកលើវិស័យទេសចរណ៍ និងលើកម្ពស់សិល្បៈវប្បធម៌ តាមរយៈ ការបង្ហាញ ស្នាដៃ ដ៏ប៉ិន ប្រសប់ និងច្នៃប្រឌិតរបស់សិល្បករ មិនតែប៉ុណ្ណោះលើក កម្ពស់ សិល្បៈវប្បធម៌តាមបែប រិយាបន្ន ទាំងសិល្បករមាន និងមិនមាន​ពិការភាព។ ​ពីព្រោះសិល្បករ សិល្បៈគ្រប់ទម្រង់ និងវប្បធម៌ គឺជាបេះដូង របស់ប្រទេសជាតិ”។​

គួរបញ្ជាក់ថា  សិល្បករ ការិនីមានពិការភាព គឺអ្នកខ្លះពិការជើងប្រើរទេះរុញ អ្នកខ្លះពិការថ្លង់គ អ្នកខ្លះពិបាកនិយាយ ឬនិយាយមិនច្បាស់ និងអ្នកខ្លះពិការឆ្អឹងក គឺឆ្អឹងករបស់គាត់វៀច ប៉ុន្តែពួកគាត់មានសមត្ថភាពពិសេស ដែលបានទទួលស្គាល់ទាំងភ្ញៀវជាតិ និងអន្តរជាតិជាច្រើនមកហើយ។ មហោស្រពសិល្បៈខេត្តកំពត ឆ្នាំ២០២៣ មានរយៈពេល ៣ថ្ងៃ ចាប់ពីថ្ងៃទី៣០ ខែមីនា ដល់​ ថ្ងៃទី១ ខែមេសា ២០២៣។​

កម្មវិធី ៣ថ្ងៃនេះ នឹងបង្ហាញស្នាដៃ សិល្បៈដែល មាន ទេពកោសល្យផ្សេងៗដូចជា សិល្បៈ បុរាណ សហសម័យ ការប្រគុំឥន្រ្តី ភ្លេងខ្មែរ របាំ និងគំនូរ ព្រមទាំងការប្រគំតន្រ្តីរបស់ អ្នកសិល្បៈល្បីឈ្មោះ យុន យង, ក្រុមស្ត្រី ស្គរធំ មាធា, ក្រុមសម្តែងសហសម័យ អេពិកអាតអីនខោនធើ របស់ អេពិអ (Epic Arts), ក្រុមសម្តែសិល្បៈបុរាណពី មន្ទីរវប្បធម៌ និងវិចិត្រសិល្បៈ, ក្រុមសម្តែងសិល្បៈពី ផ្ទះយុវវ័យ និងវប្បធម៌ ​(MJC), ក្រុមសម្តែងភ្លេងបុរាណប្រពៃណី វិទ្យាស្ថានអភិវឌ្ឍន៍វប្បធម៌ខ្មែ (KCDI) និងក្រុមសម្តែង ភូមិកុមារ និងចាប៉ីដងវែង៕

អត្ថបទ៖ ច័ន្ទ វីរៈ