ព័ត៌មានជាតិ

អភិបាលរងខេត្តសៀមរាប ជំរុញភាគីពាក់ព័ន្ធ បង្កើនការយកចិត្តទុកដាក់លើជនមានពិការភាព

បានផុស

៩ ខែ មុន

នៅ

ថ្ងៃពុធ ១៥ តុលា ២០២៥

ដោយ

លោក នាក់ ណេរ៉ុន អភិបាលរងខេត្តសៀមរាប បានជំរុញដល់មន្ទីរ-អង្គភាព និងគ្រប់ភាគីពាក់ព័ន្ធ ត្រូវខិតខំយកចិត្តទុកដាក់បន្ថែម ដើម្បីជួយផ្ដល់នូវភាពងាយស្រួលដល់ជនមានពិការភាពឲ្យបានកាន់តែទូលំទូលាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញនេះ ក្នុងឱកាសបើកកិច្ចប្រជុំប្រចាំត្រីមាសទី ៣ របស់ក្រុមប្រឹក្សាសកម្មភាពជនពិការខេត្តសៀមរាប កាលពីរសៀលថ្ងៃទី ១៤ ខែតុលា ឆ្នាំ ២០២៥ ម្សិលមិញ។

នាឱកាសនោះ លោក នាក់ ណេរ៉ុន មានប្រសាសន៍បន្តថា ការងារលើកកម្ពស់ជនដែលមានពិការភាព ពិតជាសំខាន់ណាស់។ ដើម្បីជួយសម្រួលដល់ជនមានពិការភាព អាជ្ញាធរខេត្ត បានខិតខំកែសម្រួលហេដ្ឋារចនាសម្ព័ន្ធរូបវន្តនានា ដូចជា ការកែសម្រួលអគារមន្ទីរ-អង្គភាព និងមណ្ឌលរដ្ឋបាល ឲ្យមានផ្លូវជម្រាល (ramps) ចំណត បន្ទប់ទឹក និងបង្កាន់ដៃ (rails) សម្រាប់ជនមានពិការភាពប្រើប្រាស់ជាដើម។

លោក នាក់ ណេរ៉ុន បន្តទៀតថា បើទោះជាយ៉ាងនេះក្តី សំណង់អគារសាធារណៈមួយចំនួនដែលបានសាងសង់មកយូរហើយនោះ នៅមិនទាន់កែសម្រួលនៅឡើយទេ ឬកន្លែងខ្លះកែសម្រួលហើយ តែក៏មិនទាន់សមស្របតាមបទដ្ឋាននៅឡើយ។ ដូច្នេះ សូមស្នើដល់ភាគីពាក់ព័ន្ធ ត្រូវយកចិត្តទុកដាក់ចំពោះកិច្ចការងារនេះបន្ថែមទៀត។

យោងតាមរបាយការណ៍ស្ដីពីលទ្ធផលការងាររបស់ក្រុមប្រឹក្សាសកម្មភាពជនពិការខេត្តសៀមរាប រយៈពេល ៩ ខែ ឆ្នាំ ២០២៥ ទូទាំងខេត្តសៀមរាប ជនមានពិការភាពសរុប ១៩ ២២១ នាក់ (ស្រី ៩ ៦៧៨ នាក់) ត្រូវបានសម្ភាសន៍ និងបញ្ចូលក្នុងប្រព័ន្ធ។ ជនមានពិការភាព ក៏ទទួលបាននូវការផ្តល់សេវាគាំពារសង្គមផ្សេងៗ ដូចជា ការបើកផ្តល់ប្រាក់ឧបត្ថម្ភជូនអតីតយុទ្ធជនពិការចំនួន ២ ០១១ នាក់ និងការផ្តល់អំណោយមនុស្សធម៌ពីសាខាកាកបាទក្រហមកម្ពុជាខេត្ត ក្នុងគ្រោះមហន្តរាយផ្សេងៗ។

ទោះជាយ៉ាងណា ក៏មានបញ្ហាប្រឈមមួយចំនួន ដូចជា ៖ សំណង់សាធារណៈដែលបានសាងសង់ពីមុន នៅមិនទាន់បានកែសម្រួលផ្លូវ ឬហេដ្ឋារចនាសម្ព័ន្ធរូបវន្តបង្កលក្ខណៈងាយស្រួលសម្រាប់ជនមានពិការភាពនៅឡើយ។ ជនមានពិការភាពដែលបានទៅទទួលការបណ្ដុះបណ្ដាលជំនាញវិជ្ជាជីវៈនៅវិទ្យាស្ថានពហុបច្ចេកទេស មានចំនួនតិចតួចនៅឡើយ។ ជនមានពិការភាពដែលបានសម្ភាសន៍កំណត់អត្តសញ្ញាណហើយ នៅមិនទាន់ទទួលបានបណ្ណសម្គាល់ជនមានពិការភាពគ្រប់គ្នា និងមានមួយចំនួនទៀតមិនទាន់បានធ្វើការសម្ភាសនៅឡើយ។ ជនមានពិការភាពកម្រិតធ្ងន់ ក្រីក្រ ឬគ្មានទីពឹង មិនអាចបញ្ជូនទៅទទួលការបណ្ដុះបណ្ដាល និងរៀនយកជំនាញបាន និងមួយចំនួនទៀតផ្ដេកផ្ដួលលើពិការភាពរបស់ខ្លួន៕

អត្ថបទ ៖ គឿន វេត