ព័ត៌មានអន្ដរជាតិ

ហ្វីពីពីនអាចបន្តបិទការនាំចូលអង្ករដល់ចុងឆ្នាំ បង្កក្ដីបារម្ភសម្រាប់ថៃ និងប្រទេសនាំចេញអង្ករផ្សេងទៀត

បានផុស

៩ ខែ មុន

នៅ

ថ្ងៃអង្គារ ១៤ តុលា ២០២៥

ដោយ

ហ្វីលីពីន ដែលជាប្រទេសនាំចូលអង្ករធំជាងគេបំផុតនៅលើពិភពលោក គ្រោងនឹងបន្តបិទការនាំចូលអង្កររហូតដល់ចុងឆ្នាំ ដោយមិនធ្វើតាមគម្រោងចាស់ ដែលឈប់ហាមឃាត់ត្រឹមចុងខែតុលានោះទេ។ នេះបើតាមការរាយការណ៍ពីសារព័ត៌មានក្នុងស្រុកហ្វីលីពីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណ៍នេះ កំពុងព្រួយបារម្ភសម្រាប់បណ្ដាប្រទេសនាំចេញអង្ករសំខាន់ៗដូចជាថៃ និងវៀតណាម ចំពេលដែលតម្លៃអង្ករអន្តរជាតិធ្លាក់ចុះខ្លាំងរួចហើយ រាប់តាំងពីដើមឆ្នាំមក ដោយសារតែកំណើនផ្គត់ផ្គង់សកល និងកម្សោយតម្រូវការពីប្រទេសនាំចូលសំខាន់ៗ។

ក្រសួងកសិកម្មហ្វីលីពីនបានបញ្ជាក់ពីគម្រោងពន្យារពេលបិទការនាំចូលនេះកាលពីសប្ដាហ៍មុន។ អ្វីដែលសំខាន់នោះគឺថា ហ្វីលីពីន នឹងបើកការនាំចូលវិញត្រឹម ១ ខែ នៅខែមករា ហើយបន្តបិទជាថ្មីនៅខែកុម្ភៈ រហូតដល់មេសា។ ក្រសួងលើកឡើងថា គោលនយោបាយបែបនេះ គឺដោយធានាស្ថិរភាពតម្លៃអង្ករសម្រាប់ប្រជាកសិករហ្វីលីពីន ដែលព្រួយបារម្ភពីការធ្លាក់ចុះនៃតម្លៃស្រូវអង្ករក្នុងស្រុក។

គេមើលឃើញថា ការសម្រេចរបស់ហ្វីលីពីន នឹងធ្វើឱ្យការផ្គត់ផ្គង់អង្ករជោរជន់នៅលើទីផ្សារ ដែលធ្វើឱ្យតម្លៃអង្ករជាសកលបន្តនិន្នាការធ្លាក់ចុះ ហើយបង្កកង្វល់ជាច្រើនសម្រាប់ប្រទេសនាំចេញ។ តាមគម្រោងដើម ហ្វីលីពីនបិទការនាំចេញអង្ករ ៦០ ថ្ងៃ ចាប់ពីថ្ងៃទី ១ កញ្ញា។

សមាគមស្បៀងអាហារវៀតណាម (VFA) បាននិយាយថា ការនាំចេញអង្កររបស់វៀតណាម រំពឹងថានឹងស្ថិតក្រោមសម្ពាធយ៉ាងសំខាន់នៅដើមឆ្នាំក្រោយ នៅពេលប្រទេសនេះចូលដល់រដូវប្រមូលផលធំប្រចាំឆ្នាំ។ នេះបើតាមការចុះផ្សាយរបស់កាសែត Viet Nam News នៅថ្ងៃអង្គារនេះ។

ការបិទនាពេលកន្លងមក បានប៉ះពាល់ខ្លាំងដល់ការនាំចេញអង្ករវៀតណាមរួចបាត់ទៅហើយ។ ក្នុងខែកញ្ញា ការនាំចេញអង្ករវៀតណាមបានធ្លាក់ចុះ ៤៣ ភាគរយ គិតជាបរិមាណមកត្រឹម ៤៦៦ ៨០០ តោន និងរហូតដល់ ៥៥ ភាគរយ គិតជាតម្លៃ មកត្រឹម ២៣២ លានដុល្លារ។

គិតត្រឹមសប្ដាហ៍មុន VFA បានឱ្យដឹងថា អង្ករបាក់ ៥ ភាគរយ របស់វៀតណាម ត្រូវបានលក់ក្នុងតម្លៃនាំចេញ ៤៥០ ដុល្លារ/តោន។ កាលពីឆ្នាំមុន តម្លៃអង្ករវៀតណាមបានកើនឡើងជាមធ្យមលើស ៦០០ ដុល្លារ/តោន។

ចំណាត់ការរបស់ហ្វីលីពីន ក៏បង្កក្ដីបារម្ភនៅថៃ ដែលជាប្រទេសនាំចេញអង្ករសំខាន់នៅលើពិភពលោកផងដែរ។ សមាគមអ្នកនាំចេញអង្ករថៃ (TREA) បាននិយាយថា ការនាំចេញអង្កររបស់ប្រទេសកំពុងឆ្ពោះទៅរកគោលដៅប្រចាំឆ្នាំ ៧,៥ លានតោន ប៉ុន្តែតម្លៃនឹងធ្លាក់ចុះខ្លាំងរហូតដល់ ៤០ ភាគរយ។ នេះបើតាមការចុះផ្សាយរបស់កាសែតបាងកកប៉ុស្តិ៍។

កាលពីចុងសប្ដាហ៍មុន តម្លៃអង្ករសថៃ បាក់ ៥ ភាគរយ បានធ្លាក់ចុះរហូតដល់ ៣៤០ ដុល្លារ/តោន ដែលជាកម្រិតទាបបំផុតក្នុងរយៈពេលជិត ១៨ ឆ្នាំ។ មន្រ្តី TREA បានរំពឹងថា តម្លៃអង្ករថៃនឹងរក្សាតម្លៃប្រហែល ៣៤០ ដុល្លារ/តោន ឆ្នាំនេះ ដោយធ្លាក់ចុះពីមធ្យម ៥០០ ដុល្លារ/តោន ឆ្នាំមុន។

មន្រ្តី TREA បានលើកឡើងថា ទស្សនវិស័យសម្រាប់ទីផ្សារអង្ករថៃ «គ្មានភាពវិជ្ជមាននោះទេ» នៅឆ្នាំក្រោយ ចំពេលលក្ខខណ្ឌធាតុអាកាសអំណោយផល ដែលសម្បូរភ្លៀងធ្លាក់ និងល្អសម្រាប់កសិកម្ម បង្កើនការផ្គត់ផ្គង់ទឹកនៅបណ្ដាប្រទេសដាំស្រូវសំខាន់ៗ រួមទាំងថៃ មីយ៉ាន់ម៉ា កម្ពុជា ជាដើម។

កន្លងមក អ្នកជំនាញបានគូសភ្ជាប់ការធ្លាក់ចុះតម្លៃអង្ករសកលឆ្នាំ ២០២៥ នេះ ទៅនឹងកំណើននៃការផ្គត់ផ្គង់ ក្រោយឥណ្ឌាបើកការនាំចេញអង្ករឡើងវិញ កំណើនផលិតកម្មដោយសារតែភ្លៀងធ្លាក់ច្រើនជាងឆ្នាំមុនៗ ការបិទ ឬកាត់បន្ថយការនាំចូលពីឥណ្ឌូណេស៊ី និងហ្វីលីពីនជាដើម។

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ តម្លៃអង្ករឥណ្ឌា បាក់ ៥ ភាគរយ ធ្លាក់ចុះដល់ ៣៤០-៣៤៥ ដុល្លារ/តោន ដែលជាកម្រិតទាបបំផុតរាប់តាំងពីឆ្នាំ ២០១៦ ខណៈអង្ករមីយ៉ាន់ម៉ាត្រឹម ៣១០ ដុល្លារ/តោន និងប៉ាគីស្ថាន ៣៣០ ដុល្លារ/តោន៕