កម្ពុជានឹងបង្កើតនិយតករទឹកស្អាតដើម្បី ប្រសិទ្ធភាពនៃការទទួលសេវាទឹកនៅកម្ពុជា

លោក ហែម វណ្ណឌី រដ្ឋមន្ត្រី​ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កាលពីថ្ងៃទី១៣ ខែតុលា ឆ្នាំ២០២៥ បានលើកឡើងថា កម្ពុជានឹងបង្កើត​និយតករ​ទឹកស្អាត​​ ដើម្បី​ធានា​បាន​នូវនិរន្តរភាព ប្រសិទ្ធភាព និងភាពយុត្តិធម៌នៃការទទួលបានសេវាទឹកស្អាតដល់គ្រប់វិស័យ។

ថ្លែងក្នុង​កិច្ច​ប្រជុំ​អន្តរ​ក្រសួង ដើម្បីពិនិត្យពិភាក្សា និងជំរុញការបង្កើតនិយតករទឹកស្អាតនៅកម្ពុជា ដែល​ជា​អាទិភាព​កំណែ​ទម្រង់​សំខាន់​មួយ ដែលត្រូវបានចង្អុលបង្ហាញដោយយុទ្ធសាស្ត្របញ្ចកោណដំណាក់កាលទី១ របស់​រាជរដ្ឋាភិបាល លោក​ ហែម វណ្ណឌី បានលើកឡើងថា ទឹក​ស្អាត​ប្រៀបដូច​ជា​សរសៃ​ឈាមនៃ​សេដ្ឋកិច្ច​របស់​យើង ដែលគាំទ្រ​ឧស្សាហកម្ម ​ពាណិជ្ជកម្ម និងសេវាកម្ម ព្រមទាំង​លើកកម្ពស់សុខភាព​សាធារណៈ​ និងដោះស្រាយតម្រូវការចាំបាច់ប្រចាំថ្ងៃ។

ក្នុងកិច្ចប្រជុំនេះ តំណាងធនាគារពិភពលោកបានបង្ហាញគំរូនិយតករក្នុងវិស័យផ្សេងៗនៅកម្ពុជា ព្រម​ទាំង​គំរូ​និយតករ​ទឹកស្អាតនៃបណ្តាប្រទេសនៅលើពិភពលោក ពិសេសប្រទេសព័រទុយហ្គាល់ ដែល​ក្រុមហ៊ុន​ទឹកស្អាត​របស់​រដ្ឋ និង​និយតករ​ទឹកស្អាត​ជាតិ​ព័រទុយហ្គាល់ ត្រូវបានបង្កើតឡើងក្នុងទសវត្សរ៍ឆ្នាំ១៩៩០ ដើម្បី​ជំរុញ​កំណែ​ទម្រង់​វិស័យ​ទឹកស្អាត​របស់ខ្លួនប្រកបដោយជោគជ័យ។

លោក​រដ្ឋមន្ត្រី ដែលទើបបានដឹកនាំគណៈប្រតិភូធ្វើទស្សនកិច្ចនៅប្រទេសព័រទុយហ្គាល់ បានលើកឡើងថា ព័រទុយហ្គាល់ មានប្រតិបត្តិករផ្តល់សេវាផ្គត់ផ្គង់ទឹកស្អាតជាង ២០០ អង្គភាព ដែលស្ថិត​ក្រោម​ការគ្រប់គ្រង​របស់​រដ្ឋបាលក្រុង។ ចំណែក​​នៅកម្ពុជា ក្នុងចំណោមអាជ្ញាប័ណ្ណផ្តល់សេវាផ្គត់ផ្គង់ទឹកស្អាតជាង ៥០០ មានតែ ១១ ស្ថាប័ន​ប៉ុណ្ណោះ​ដែល​ជារដ្ឋាករទឹកសាធារណៈ ក្រៅពីនោះ ​ភាគច្រើនជាប្រតិបត្តិករឯកជនខ្នាតតូច។

ដូច្នេះ គំរូនិយតករទឹកស្អាតរបស់​កម្ពុជាត្រូវតែមានលក្ខណៈសមស្របទៅនឹងស្ថានភាព និងតថភាពជាក់ស្តែងរបស់ប្រទេសយើង។

ជា​មួយ​គ្នា​នោះ កិច្ចប្រជុំក៏បានពិនិត្យពិភាក្សាគំរូអភិបាលកិច្ច សិទ្ធិនិងអំណាច វិសាលភាព និងទិដ្ឋភាពពាក់ព័ន្ធសំខាន់ៗ សម្រាប់និយតករទឹកស្អាតរបស់កម្ពុជា ដើម្បីស្នើសុំការសម្រេចចុងក្រោយពីប្រមុខរាជរដ្ឋាភិបាល ព្រមទាំងបានបង្ហាញការគាំទ្រចំពោះការអនុវត្តវិធីសាស្រ្តសន្សឹមៗ តាមដំណាក់កាល ដើម្បីធានាបាននូវទំនុកចិត្ត តម្លាភាព និងការអនុវត្តប្រកបដោយប្រសិទ្ធភាព៕