ព័ត៌មានអន្ដរជាតិ

វៀតណាមកំណត់គោលដៅកំណើនសេដ្ឋកិច្ច ១០% ឆ្នាំក្រោយ

បានផុស

៨ ខែ មុន

នៅ

ថ្ងៃព្រហស្បតិ៍ ១៦ តុលា ២០២៥

ដោយ

រដ្ឋាភិបាលវៀតណាមបានកំណត់គោលដៅកំណើនផលិតផលក្នុងស្រុកសរុប (GDP) ដល់ ១០ ភាគរយ សម្រាប់ឆ្នាំ ២០២៦ ដោយរំពឹងឱ្យវៀតណាមក្លាយជាប្រទេសមានសេដ្ឋកិច្ចធំបំផុតទី៣នៅអាស៊ីអាគ្នេយ៍ត្រឹមឆ្នាំ ២០៣០។ នេះបើតាមការចុះផ្សាយរបស់កាសែត The Investor។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុរដ្ឋមន្ត្រីក្រសួងហិរញ្ញវត្ថុវៀតណាម លោក Nguyen Duc Chi បានបង្ហាញពីអត្រាគោលដៅនេះ ក្នុងបទបង្ហាញនៅសម័យប្រជុំគណៈកម្មាធិការអចិន្ត្រៃយ៍រដ្ឋសភា កាលពីថ្ងៃពុធ។ គោលដៅផ្សេងៗទៀត រួមទាំងកំណើន GDP សម្រាប់មនុស្សម្នាក់ចន្លោះពី ៥ ៤០០-៥ ៥០០ ដុល្លារ/ម្នាក់។

ឧបនាយករដ្ឋមន្ត្រីវៀតណាម លោក Nguyen Hoa Binh បានឱ្យដឹងកាលពីថ្ងៃចន្ទមុននោះថា ក្នុងអត្រា ១០ ភាគរយ/ឆ្នាំ ចាប់ពីឆ្នាំក្រោយ ដល់ឆ្នាំ ២០៣០ នោះ GDP សម្រាប់មនុស្សម្នាក់របស់វៀតណាម នឹងកើនដល់ ៨ ៥០០ ដុល្លារ/ម្នាក់ នៅឆ្នាំ ២០៣០ ហើយវៀតណាមនឹងជាប់ក្នុងបញ្ជីប្រទេសមានសេដ្ឋកិច្ចធំបំផុតទាំង ៣០ លើពិភពលោក។

យោងតាមទិន្នន័យផ្លូវការរបស់រដ្ឋាភិបាល GDP របស់វៀតណាមបានកើនឡើង ៧,៨៥ ភាគរយ ក្នុងរយៈពេល ៩ ខែដំបូងដើមឆ្នាំនេះ និង ៨,២៣ ភាគរយ នៅត្រីមាសទី៣។ តួលេខនេះ គឺខ្ពស់បំផុតទី២ក្នុងរយៈពេល ១១ ឆ្នាំ ដោយនៅតែពីក្រោយឆ្នាំ ២០២៣ ដែលសេដ្ឋកិច្ចស្ទុះងើបពីវិបត្តិកូវីដ១៩ប៉ុណ្ណោះ។

GDP របស់វៀតណាមរំពឹងនឹងកើន ៨ ភាគរយ ដល់ ៥១០ ប៊ីលានដុល្លារឆ្នាំនេះ ដោយធំបំផុតលំដាប់ទី ៣២ លើពិភពលោក ដោយកើនឡើង ៥ លេខ ធៀបនឹង ៥ ឆ្នាំមុន។ អ្នកជំនាញមើលឃើញថា អត្រាខ្ពស់នេះជួយវៀតណាមក្នុងសម្រេចបានកំណើនគោលដៅ ១០ ភាគរយ នៅឆ្នាំក្រោយ។

លោក Chi បាននិយាយថា អាទិភាពអភិវឌ្ឍន៍សំខាន់ៗសម្រាប់ឆ្នាំ ២០២៦ រួមមានការរៀបចំរចនាសម្ព័ន្ធសេដ្ឋកិច្ចឡើងវិញ ជាពិសេសនៅក្នុងប្រព័ន្ធឥណទាន ការដោះស្រាយបំណុលពិបាកទារ និងការលើកកម្ពស់សេដ្ឋកិច្ចឌីជីថល និងបៃតង បច្ចេកវិទ្យាបន្ទះឈីប និងបញ្ញាសិប្បនិម្មិត (AI)ជាដើម៕