សេដ្ឋកិច្ច

ការកក់បន្ទប់ផ្ទះសំណាក់ សណ្ឋាគារ តាមបណ្ដាខេត្តគោលដៅទេសចរណ៍ ចាប់ផ្ដើមកើនឡើង ក្នុងឱកាសបុណ្យអុំទូក

បានផុស

៨ ខែ មុន

នៅ

ថ្ងៃពុធ ២៩ តុលា ២០២៥

ដោយ

អ្នកស្រី ម៉ាលីស បុគ្គលិកនៅសណ្ឋាគារ La Palmeraie d’Angkor Charming Hotel នៅខេត្តសៀមរាប បានឱ្យដឹងថា ការកក់បន្ទប់ស្នាក់នៅរបស់ភ្ញៀវទេសចរក្នុងស្រុក ក្នុងឱកាសបុណ្យអុំទូកចាប់ផ្ដើមមានបណ្ដើរៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ម៉ាលីស បញ្ជាក់ថា រាល់ថ្ងៃមានភ្ញៀវខ្មែរខលសួរច្រើន ប៉ុន្តែទីតាំងអ្នកស្រី អត់មានកន្លែងដាក់ ដោយសារពួកគាត់មកជាក្រុមៗច្រើនគ្នា។

បុគ្គលិកសណ្ឋាគារ Rambutan Hotel នៅខេត្តសៀមរាបបានប្រាប់ដែរថា សណ្ឋាគាររបស់លោកភាគច្រើនទទួលភ្ញៀវបរទេស មិនផ្ដោតលើភ្ញៀវក្នុងស្រុកនោះទេ ប៉ុន្តែតាមការអង្កេតមានភ្ញៀវក្នុងស្រុកសួរនាំច្រើន ពីការកក់បន្ទប់ស្នាក់នៅ។

បុគ្គលិកសណ្ឋាគារ SARA VOAN នៅខេត្តកំពត អ្នកស្រី មុំ បានប្រាប់ថា ឆ្នាំនេះ មិនសូវមានភ្ញៀវកក់បន្ទប់ស្នាក់នៅក្នុងពេលបុណ្យអុំទូកនោះទេ ដោយថ្ងៃទី ៤ ខែ ១១ អ្នកស្រីមានភ្ញៀវកក់ចំនួន ១៣ បន្ទប់ ក្នុងចំណោម ១៦ បន្ទប់។ ក្រៅពីថ្ងៃទី០៤ គឺមិនសូវមានភ្ញៀវកក់នោះទេ។

លោក ខៀវ ធី ប្រធានសមាគមន៍មគ្គុទ្ទេសក៏ទេសចរអង្គរជឿជាក់ថា បុណ្យអុំទូកឆ្នាំនេះ ភ្ញៀវទេសចរក្នុងស្រុក នឹងមកលេងនៅខេត្តសៀមរាបច្រើនដូចឆ្នាំមុនដែរ។

ការរៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមបណ្តាខេត្តនានានៅឆ្នាំនេះ អាចប្រព្រឹត្តទៅជាធម្មតាតាមទំនៀមទម្លាប់ប្រពៃណី ដែលមានរយៈពេល ៣ ថ្ងៃ ចាប់ពីថ្ងៃទី ០៤-០៦ ខែវិច្ឆិកា ឆ្នាំ ២០២៥៕