ព័ត៌មានអន្ដរជាតិ

ឈ្មួញនាំចេញអង្ករវៀតណាមព្រួយបារម្ភ ជុំវិញការហាមឃាត់ការនាំចូលអង្កររបស់ហ្វីលីពីន

បានផុស

៨ ខែ មុន

នៅ

ថ្ងៃចន្ទ ១៧ វិច្ឆិកា ២០២៥

ដោយ

ឈ្មួញនាំចេញវៀតណាមកំពុងព្រួយបារម្ភខ្លាំងជុំវិញការបន្តហាមឃាត់ការនាំចូលអង្ករដល់ចុងឆ្នាំរបស់ប្រទេសហ្វីលីពីន ដែលជាទីផ្សាររួមចំណែកប្រមាណ ៤០% នៃការនាំចេញអង្ករសរុបរបស់វៀតណាម។ នេះបើតាមការចុះផ្សាយរបស់កាសែត Viet Nam News ថ្ងៃចន្ទនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្ដាហ៍មុន ប្រធានាធិបតីហ្វីលីពីន លោក ហ្វឺរឌីណង់ ម៉ាកូស ជូនៀ បានចុះហត្ថលេខាលើបទបញ្ជាមួយ ដោយបន្លាយពេលការហាមឃាត់ការនាំចូលអង្កររហូតដល់ថ្ងៃទី ៣១ ខែធ្នូ ឆ្នាំ ២០២៥ ដើម្បីការពារកសិករក្នុងស្រុក ធ្វើឱ្យទីផ្សារអង្ករមានស្ថិរភាព និងការពារអ្នកប្រើប្រាស់។

វិធានការនេះ បានបង្កក្ដីបារម្ភពីក្រុមហ៊ុននាំចេញរបស់វៀតណាម ដែលធ្លាប់រំពឹងថាប្រទេសហ្វីលីពីន ដែលរងផលប៉ះពាល់យ៉ាងខ្លាំងដោយព្យុះទីហ្វុងជាបន្តបន្ទាប់់ នឹងបើកការនាំចូលអង្ករឡើងវិញក្នុងខែធ្នូ ដើម្បីបំពេញបន្ថែមការផ្គត់ផ្គង់ក្នុងស្រុក។

ប្រធានសមាគមម្ហូបអាហារវៀតណាម (VFA) លោក Đỗ Hà Nam បានមានប្រសាសន៍ថា ក្រុមហ៊ុនវៀតណាមនានាត្រូវសម្របខ្លួនទៅនឹងគោលនយោបាយថ្មី និងតាមដានយ៉ាងដិតដល់នូវការវិវឌ្ឍបន្ថែមទៀត។ លោកបានកត់សម្គាល់ថា ក្រុមហ៊ុនវៀតណាមជាច្រើនបានធ្វើពិពិធកម្មទៅក្នុងទីផ្សារអាហ្វ្រិក និងមជ្ឈិមបូព៌ារួចហើយ ជាជាងរង់ចាំឱ្យប្រទេសហ្វីលីពីនបើកការនាំចូលឡើងវិញ។

កន្លងមក មានសេចក្ដីរាយការណ៍ថា ហ្វីលីពីនអាចនឹងបន្តបិទការនាំចូលរហូតដល់ខែមេសា ដោយបើកតែក្នុងខែមករាមួយប៉ុណ្ណោះ ដោយបង្កក្ដីបារម្ភសម្រាប់ប្រទេសនាំចេញអង្ករធំៗរួមមានថៃ និងវៀតណាម ចំពេលដែលតម្លៃអង្ករអន្តរជាតិធ្លាក់ចុះរួចស្រាប់ហើយ។

វៀតណាមបាននាំចេញអង្ករប្រមាណ ៧,២ លានតោន ដែលមានតម្លៃ ៣,៧ ប៊ីលានដុល្លារអាមេរិកក្នុងរយៈពេល ១០ ខែដើមឆ្នាំ ២០២៥ ដោយធ្លាក់ចុះ ៦,៥% គិតជា បរិមាណ និង ២៣,៨% គិតជាតម្លៃ៕