កោះភូគុកវៀតណាម កំណត់គោលដៅទាក់ទាញភ្ញៀវទេសចរជាង ៨ លាននាក់ ឆ្នាំនេះ

កោះត្រល់ ឬកោះភូគុករបស់វៀតណាម រំពឹងថានឹង​ទាក់ទាញភ្ញៀវទេសចរ​ឱ្យ​បានប្រមាណ ៨,៥ លាននាក់នៅឆ្នាំនេះ ដោយកើនឡើងប្រមាណ ៥% ធៀបនឹង​ឆ្នាំ ២០២៥។ នេះបើតាមការចុះផ្សាយរបស់កាសែត VnExpress កាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមនោះ កោះដដែលបាន​កំណត់គោលដៅភ្ញៀវទេសចរបរទេសឱ្យ​បាន​ ២ លាននាក់ ដោយ​កើនឡើង ១១% ធៀបនឹងឆ្នាំមុនដូចគ្នា។

បើតាម VnExpress សន្ទុះភ្ញៀវទៅលេងកោះភូគុកដើមឆ្នាំនេះគឺល្អ ដោយកន្លែងស្នាក់នៅជាច្រើននៅលើកោះ ត្រូវបាន​ភ្ញៀវកក់ពេញៗ អំឡុងថ្ងៃឈប់សម្រាកឆ្លងឆ្នាំកន្លងទៅ។ ​

អាកាសយានដ្ឋានអន្តរជាតិភូគុកឯណោះ ក៏​បានកត់ត្រាចំនួនជើងហោះហើរអន្តរជាតិមកដល់ច្រើនបំផុតក្នុងប្រវត្តិសាស្ត្រ​កាលពីថ្ងៃទី៣ ខែមករា ​ប្រមាណ​ចំនួន៤៦ ជើង ដោយនាំមកនូវភ្ញៀវទេសចររាប់ពាន់នាក់។ ​​

យ៉ាងណាមិញ កំណើននៃភ្ញៀវទេសចរ​ក៏ដាក់បន្ទុកលើសមត្ថភាពផ្ដល់កន្លែងស្នាក់នៅរបស់កោះផងដែរ។ មាន​ភ្ញៀវទេសចរបរទេសមួយចំនួន បាន​រាយការណ៍ពីភាពលំបាកផ្សេងៗពាក់ព័ន្ធនឹង​ការធានាបាននូវកន្លែងស្នាក់នៅ ទោះបីជាពួកគេកក់ជាមុនរួចទៅហើយក្ដី។ ​

ឆ្នាំ ២០២៥ កន្លងទៅ ត្រូវបាន​គេមើលឃើញថាជាឆ្នាំដ៏ខ្លាំងសម្រាប់ទេសចរណ៍កោះភូគុក ដោយទទួលបាន​ភ្ញៀវប្រមាណ ៨,១ លាននាក់ រួមទាំងភ្ញៀវបរទេស ១,៨ លាននាក់៕