ត្រាំ ដកការគំរាមពន្ធលើអឺរ៉ុប ក្រោយស្រុះស្រួលគ្នាលើបញ្ហាហ្រ្គីនឡែន

ប្រធានាធិបតីសហរដ្ឋអាមេរិក លោក ដូណាល់ ត្រាំ បាន​ផ្លាស់ប្ដូរទិសដៅភ្លាមៗ ដោយ​ប្រកាសលុបចោលការដាក់ពន្ធលើបណ្ដាប្រទេសនៅអឺរ៉ុប ដោយ​លើកឡើងពីការចរចាពាក់ព័ន្ធនឹង​បញ្ហាហ្រ្គីនឡែន និង​ការសម្រេចបាន​នូវ​«​ក្រប​ខ័ណ្ឌ​សម្រាប់កិច្ចព្រមព្រៀងនាពេលអនាគត» ​ជាមួយអគ្គលេខាធិការអង្គការណាតូ លោក Mark Rutte។ នេះបើតាមការចុះផ្សាយរបស់សារព័ត៌មាន Yahoo។

លោក ត្រាំ បានសរសេរនៅលើបណ្ដាញសង្គម​ Truth Social កាលពីថ្ងៃពុធយ៉ាងដូច្នេះថា៖ «ប្រសិនបើដំណោះស្រាយនេះសម្រេចបាន នោះវា​នឹងក្លាយជាដំណោះស្រាយដ៏អស្ចារ្យមួយសម្រាប់សហរដ្ឋអាមេរិក និងប្រទេសណាតូទាំងអស់។ ដោយផ្អែកលើការយល់ដឹងនេះ ខ្ញុំនឹងមិនដាក់ពន្ធគយ ដែល​គ្រោង​ចូលជាធរមាននៅថ្ងៃទី ១ ខែកុម្ភៈ នោះទេ»។

ការផ្លាស់ប្ដូររបស់លោក ត្រាំ ធ្វើឡើង​ក្រោយ​លោក​បានទៅដល់វេទិកាសេដ្ឋកិច្ចពិភពលោកនៅទីក្រុង ដាវ៉ូស (Davos) នៃប្រទេសស្វីសកាលពីថ្ងៃពុធ បន្ទាប់ពីលោកបានគំរាមកំហែងដាក់ពន្ធថ្មីលើបណ្ដាប្រទេសធំៗនៅអឺរ៉ុប ប្រសិនបើគ្មានកិច្ចព្រមព្រៀងលក់កោះហ្រ្គីនឡែនរបស់ដាណឺម៉ាក ឱ្យ​សហរដ្ឋអាមេរិកទេនោះ។ ​

ក្នុងសុន្ទរកថានៅវេទិកាសេដ្ឋកិច្ចដដែល ​លោក ត្រាំ បាន​ថ្លែងថា លោកចង់បានការចរចាជាបន្ទាន់លើបញ្ហាហ្រ្គីនឡែន ហើយគូសបញ្ជាក់ថា លោកនឹង​ប្រើកម្លាំងដើម្បីវាយយកកោះហ្រ្គីនឡែនពីដាណឺម៉ាក ដូចដែលលោក​ធ្លាប់គំរាមកំហែងពីមុនមកនោះទេ។ យ៉ាងណាមិញ លោកថ្លែងយ៉ាងដូច្នេះថា៖ ​«អ្នកអាចយល់ព្រម ហើយយើងនឹងអរគុណ ឬអ្នកអាចនិយាយថាទេ ​ប៉ុន្តែយើងនឹងចងចាំ»។

គួរគូសបញ្ជាក់ថា បណ្ដាប្រទេសនៅអឺរ៉ុប សុទ្ធតែប្រឆាំងនឹង​ផែនការទិញយកកោះហ្រ្គីនឡែនរបស់ ត្រាំ ហើយបង្ហាញការគាំទ្រចំពោះដាណឺម៉ាក រួមទាំងការបញ្ជូនទ័ពមួយចំនួនតូចទៅកោះដែលគ្របដណ្ដប់ដោយទឹកកកតំបន់ប៉ូលខាងជើងមួយនេះ។

កាលពីថ្ងៃសៅរ៍ លោក ត្រាំ បាន​ប្ដេជ្ញាចិត្តដាក់ពន្ធ ១០% ចាប់ពីថ្ងៃទី ១ កុម្ភៈ លើប្រទេសសមាជិក EU ផ្សេងៗ ដូចជា ដាណឺម៉ាក ស៊ុយអែត បារាំង អាល្លឺម៉ង់ ហូឡង់ និងហ្វាំងឡង់ រួមជាមួយប្រទេសនៅអឺរ៉ុបផ្សេងទៀត រួមមានចក្រភពអង់គ្លេស និងណ័រវែស។ អត្រាពន្ធ ដែលកំណត់គោលដៅលើគ្រប់ទំនិញនាំចូលអាមេរិក នេះ នឹង​ដំឡើងដល់ ២៥% នៅខែមិថុនា បើនៅតែគ្មានការព្រមព្រៀងលើហ្រ្គីនឡែន។

យ៉ាងណាមិញ សហភាពអឺរ៉ុប (EU) បាន​ស្រុះស្រួលគ្នាវាយបកទៅ​វិញ​ ដោយ​ផ្អាក​កិច្ចព្រមព្រៀង​ពាណិជ្ជកម្ម​របស់ខ្លួន​ជាមួយ​សហរដ្ឋអាមេរិក និងចរចាគ្នាលើការដាក់ពន្ធលើទំនិញអាមេរិកក្នុងតម្លៃជាង ១០៨ ប៊ីលាន​ដុល្លារ៕