ប្រេងសាំងធម្មតាបន្តឡើងថ្លៃ ៥៦០០រៀល ក្នុងមួយលីត្រ ខណៈម៉ាស៊ូតចុះមក ៥៤០០រៀល

ប្រេងសាំងធម្មតាបន្តឡើងថ្លៃ ៥៦០០រៀល ក្នុងមួយលីត្រ ខណៈដែលប្រេងម៉ាស៊ូត បានចុះថ្លៃមកត្រឹម ៥៤០០រៀល។ តម្លៃប្រេងលក់រាយនេះ ចាប់អនុវត្តពីថ្ងៃទី ២១ ឧសភា រហូតដល់ថ្ងៃទី ៣១ ខែ ឧសភា ឆ្នាំ ២០២២។ នេះបើតាមលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា ជម្រាបជូនសម្តេចតេជោ ហ៊ុន សែន នាយករដ្ឋមន្រ្តី កាលពីយប់ថ្ងៃទី ២១ ខែ ឧសភា នៅក្នុងពិធីជួបសំណេះសំណាលជាមួយសហគមន៍ខ្មែររស់នៅទ្វីបអឺរ៉ុប ក្នុងទីក្រូងហ្សូរិច ប្រទេសស្វីស។

សូមបញ្ជាក់ថា តម្លៃប្រេងសាំង និងម៉ាស៊ូត ដែលរដ្ឋមន្រ្តីក្រសួងពាណិជ្ជកម្មបង្ហាញនេះ បើធៀបនឹងតម្លៃ​ដើមកាលពីសប្តាហ៍មុន ប្រេងសាំងធម្មតា មានតម្លៃ ៥៥៥០រៀល ក្នុងមួយលីត្រ ពោលគឺឡើងថ្លៃ ៥០រៀល ខណៈដែលប្រេងម៉ាស៊ូត កាលពីសប្តាហ៍មុន មានតម្លៃ ៥៨០០រៀល ក្នុងសប្តាហ៍នេះចុះ ៤០០រៀល នៅត្រឹម ៥៤០០រៀលក្នុងមួយលីត្រ។

ក្រសួងពាណិជ្ជកម្ម បានដូរគោលការណ៍ការក្នុងចេញប្រកាសតម្លៃប្រេងឥន្ធនៈ រៀងរាល់ ១០ថ្ងៃម្តង ដើម្បីសម្រួលដល់វិស័យលក់រាយ និងប្រជាពលរដ្ឋ ស្របពេលដែលតម្លៃប្រេងឥន្ធនៈមានការប្រែប្រួលលឿន ក្នុងរយៈពេលចុងក្រោយនេះ។

លោកបណ្ឌិត គី សេរីវឌ្ឍន៍ អ្នកវិភាគសេដ្ឋកិច្ច នៅរាជបណ្ឌិត្យសភាកម្ពុជា បានលើកឡើងថា ការឡើងថ្លៃប្រេង គឺជាប្រភពនៃការកើនឡើងថ្លៃដើម។ លោកថា គ្រប់មុខទំនិញទាំងអស់ ទំនិញណាក៏ប្រើប្រាស់ការដឹកជញ្ជូនដែរ។ ទោះជាផលិតក្នុងស្រុក គឺត្រូវដឹកពីចម្ការមកកាន់ផ្សារ ដឹកពីផ្សារទៅផ្ទះ សុទ្ធតែប្រើប្រាស់ប្រេងទាំងអស់ ដែលនេះធ្វើឱ្យមានការកើនឡើងថ្លៃដើមផលិតកម្ម ដែលយើងហៅថា ជាមូលដ្ឋាននៃអតិផរណា។

លោកបណ្ឌិតបន្តថា នេះគឺជាបញ្ហាសកលមិនមែនកម្ពុជាឡើងថ្លៃប្រេងតែម្នាក់ឯងនោះទេ។« វាជារឿងមួយដែលជៀសមិនផុតទេ ព្រោះវាជារឿងសកល គឺជាការកើនឡើងថ្លៃប្រេងនៅលើសកលលោក អ៊ីចឹងចង់មិនចង់កម្ពុជាត្រូវតែរងឥទ្ធិពលនៃការកើនឡើងថ្លៃប្រេងនេះ»។ នេះជាការបន្ថែមរបស់លោកបណ្ឌិត គី សេរីវឌ្ឍន៍៕