រំហូរទុនវិនិយោគក្នុងតំបន់អាស៊ានកើនឡើងវិញប្រមាណ ១៧៤ពាន់លានដុល្លារ

អាស៊ានទទួលស្គាល់ថា សេដ្ឋកិច្ចពិភពលោក ក៏ដូចជាតំបន់អាស៊ាន កំពុងជួបប្រទះបញ្ហាប្រឈមជាច្រើន ដែលបណ្តាលមកពីការរាតត្បាតនៃជំងឺកូវីដ-១៩ សង្រ្គាមនៅអ៊ុយក្រែន ភាពតានតឹងភូមិសាស្រ្តនយោបាយ និងការប៉ុនប៉ងញែកសេដ្ឋកិច្ចពិភពលោកជាប្លុកសេដ្ឋកិច្ចដាច់ដោយឡែក និងការប្រែប្រួលអាកាសធាតុជាដើម។ ប៉ុន្តែទោះជាមានឧបសគ្គជាច្រើនបែបនេះយ៉ាងណា ក៏សេដ្ឋកិច្ចអាស៊ានមានការកើនឡើងគួរកត់សម្គាល់ ជាក់ស្តែងរំហូរទុនវិនិយោគក្នុងតំបន់អាស៊ាននៅឆ្នាំ ២០២១ ដល់ប្រមាណ ១៧៤ពាន់លានដុល្លារ ដែលស្មើនឹងរំហូរទុនវិនិយោគនៅឆ្នាំ ២០១៩ មុនពេលតំបន់ទាំងមូលទទួលរងនូវឥទ្ធិពលជំងឺកូវីដ។ នេះបើតាមរបាយការណ៍ស្តីពីការអង្កេតការវិនិយោគអាស៊ានឆ្នាំ ២០២២ ដែលត្រូវបានចងក្រងដោយ​សន្និសិទអង្គការសហប្រជាជាតិសម្រាប់ពាណិជ្ជកម្ម និងការអភិវឌ្ឍ ហៅកាត់ថា UNCTAD។

ក្នុងចំណោមទុនវិនិយោគទាំងនេះ ការបោះទុនវិនិយោគក្នុងវិស័យកម្មន្តសាលដែលជាកត្តាលីករក្នុងការស្តារសេដ្ឋកិច្ច​អាស៊ាន​នៅក្រោយវិបត្តិកូវីដ-១៩ មានភាពលេចធ្លោជាងគេ។

លោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋមន្រ្តីក្រុមប្រឹក្សាតំបន់វិនិយោគអាស៊ានតំណាងកម្ពុជា បានលើកឡើងថា រដ្ឋមន្រ្តីវិនិយោគនៃបណ្តាប្រទេសអាស៊ានបានសាទរ ចំពោះរបាយការណ៍នេះ ខណៈរដ្ឋមន្រ្តីវិនិយោគ​មួយចំនួនបានបន្ថែមថា ការតភ្ជាប់ក្នុងតំបន់ ជាពិសេសតភ្ជាប់តាមព្រំដែននៃប្រទេសជិតខាង នឹងផ្តល់សារៈប្រយោជន៍​ទៅដល់កិច្ចសម្របសម្រួលពាណិជ្ជកម្ម និងការវិនិយោគកាន់តែល្អប្រសើរ។

ទន្ទឹមនឹងនេះ ការធ្វើសាមញ្ញកម្មនីតិវិធីក្នុងការសម្រេចកិច្ចកិច្ចការពាក់ព័ន្ធនឹងការវិនិយោគ និងការជំរុញនូវឌីជីថល​ភាវូបនីយកម្ម ដើម្បីពន្លឿនការសម្រេចឱ្យបាននូវក្របខណ្ឌនៃការវិនិយោគរួមមួយដែលហៅថា ក្របខណ្ឌឌីជីថល​តែមួយ។

លោក សុខ ចិន្តាសោភា ថ្លែងបែបនេះ នៅក្នុងកិច្ចប្រជុំក្រុមប្រឹក្សាតំបន់វិនិយោគអាស៊ានលើកទី ២៥ ដែលជាកិច្ចប្រជុំតំ​ណាល​គ្នានឹងកិច្ចប្រជុំរដ្ឋមន្រ្តីសេដ្ឋកិច្ចអាស៊ានលើកទី ៥៤ ដែលបាននិងកំពុងប្រព្រឹត្តិទៅពីថ្ងៃទី ១៤ -១៨ ខែ កញ្ញា  ឆ្នាំ ២០២២ នៅខេត្តសៀមរាប៕