លោក អូន ព័ន្ធមុនីរ័ត្ន ៖ សសរស្តម្ភចំនួនបី ជំរុញគោលនយោបាយសេដ្ឋកិច្ច និងសង្គមឌីជីថលឱ្យរស់រវើក

រាជរដ្ឋាភិបាល បានដាក់ចេញឱ្យអនុវត្តនូវក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១​-២០៣៥ កាលពីឆ្នាំ ២០២១ ដែលជាក្របខណ្ឌរួម និងជាផែនទីចង្អុលផ្លូវក្នុងគោលដៅជំរុញដំណើរការបរិវត្តកម្មឌីជីថល លើគ្រប់តួអង្គ ក្នុងសេដ្ឋកិច្ច និងសង្គមជាតិកម្ពុជា ទាំងមូល។ នេះបើតាមការបញ្ជាក់របស់លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ថ្លែងនៅក្នុងពិធីសម្ពោធជាផ្លូវការមជ្ឈមណ្ឌលអាស៊ានសម្រាប់ការអប់រំឌីជីថល ថ្ងៃទី ០១ ខែ វិច្ឆិកា ឆ្នាំ ២០២២។

បើតាមលោករដ្ឋមន្រ្តី បានគូសបញ្ជាក់ថា ក្របខណ្ឌគោលនយោបាយនេះ មានសសរស្តម្ភចំនួនបី រួមមានទី ការកសាងរដ្ឋាភិបាលឌីជីថល ទី២ ការកសាងធុរកិច្ចឌីជីថល និងទី៣ ការកសាងពលរដ្ឋឌីជីថល។

លោក អូន ព័ន្ធមុនីរ័ត្ន បានបញ្ជាក់ថា ចំពោះការកសាងពលរដ្ឋឌីជីថល ទាំងផ្នែកអក្ខរកម្ម និងសមត្ថភាព ជាកិច្ចការមួយដ៏មានសារៈសំខាន់បំផុត ដែលត្រូវការពេល និងធនធាន ដើម្បីធានានូវការចូលរួមពេញលេញរបស់​ប្រជាពលរដ្ឋ​ក្នុងសង្គម ឌីជីថលមួយដែលរស់រវើក ប្រកបដោយបរិយាប័ន្ន និងសុវត្ថិភាព។

ការសម្ពោធ មជ្ឈមណ្ឌលអាស៊ានសម្រាប់ការអប់រំឌីជីថល នាពេលនេះ បានឆ្លុះបង្ហាញនូវកិច្ចខិតខំប្រឹងប្រែង និងការឆ្លើយតបរបស់រាជរដ្ឋាភិបាលកម្ពុជា តាមរយៈក្រសួងអប់រំ ក្នុងការពន្លឿនបរិវត្តកម្មឌីជីថល នៅក្នុងប្រ​ព័ន្ធអេកូឡូស៊ីនៃការអប់រំ ការបង្ខិតបច្ចេកទេសវិទ្យាអប់រំឱ្យបានដល់ដៃសិក្សានុសិស្ស ការច្បាមយក​កាលានុវត្តភាព​នៃនវានុវត្តន៍ផ្នែកបច្ចេកវិទ្យាសម្រាប់អប់រំ និងជំរុញភាពឈានមុខរបស់កម្ពុជា នៅក្នុងកម្រិតតំបន់ លើដំណើរ​សមាហរណកម្មនៃបច្ចេកវិទ្យាអប់រំ។ បើតាមលោក ឧបនាយករដ្ឋមន្រ្តីសេដ្ឋកិច្ច សង្កត់ធ្ងន់ថា ពិធីនាពេលនេះ ក៏បង្ហាញពីការប្តេជ្ញាចិត្តរបស់កម្ពុជា ក្នុងការចូលរួមសម្រេចឱ្យបាននូវ «The Bandar Seri Begawan Roadmap 2021-2025» ដែលជារបៀបវារៈបរិវត្តកម្មឌីជីថលអាស៊ាន ដើម្បីពន្លឿនការងើបឡើងវិញនៃសេដ្ឋកិច្ច និងសមាហរណកម្មសេដ្ឋកិច្ចឌីជីថលផងដែរ។

ជាមួយនឹងការសម្ពោធជាផ្លូវការនូវ«មជ្ឈមណ្ឌលអាស៊ានសម្រាប់ការអប់រំឌីជីថល» នេះ លោក អូន ព័ន្ធមុនីរ័ត្ន បានលើកឡើងនូវចំណុចចំនួន ៦ ដើម្បីអភិវឌ្ឍវិស័យអប់រំឌីជីថល រួមមាន៖ ការបន្តលើកកម្ពស់អក្ខរកម្មឌីជីថល, ការពង្រឹងការអភិវឌ្ឍសមត្ថភាព និងជំនាញឌីជីថល, ការពង្រឹងតួនាទីរបស់សកលវិទ្យាល័យ និងអប់រំនៅកម្រិត​ឧត្តមសិក្សា, ការបន្តអភិវឌ្ឍហេដ្ឋារចនាសម្ព័ន្ធ និងថ្នាលឌីជីថល ដែលគាំទ្រដល់ការអប់រំឌីជីថល, ការផ្សព្វផ្សាយ​បរិវត្តកម្មឌីជីថលនៃការអប់រំនៅកម្ពុជា និងការបន្តពង្រឹងប្រព័ន្ធអប់រំឱ្យមានភាពធន់ និងបុរសកម្ម។

ទោះយ៉ាងណា លោករដ្ឋមន្រ្តី អូន ព័ន្ធមុនីរ័ត្ន បានសង្កត់ធ្ងន់ទៀតថា ក្នុងខណៈដែលយើងទទួលស្គាល់​ពីសារៈសំខាន់​នៃបច្ចេកវិទ្យាឌីជីថល បច្ចេកវិទ្យានេះគ្រាន់តែជាឧបករណ៍ដែលជួយឱ្យការរៀន និងបង្រៀនកាន់តែមានប្រសិទ្ធភាព​ប៉ុណ្ណោះ។ ប៉ុន្តែឧបករណ៍នេះ នឹងមិនមែនជារបស់ដែលត្រូវយកមកជំនួយឱ្យការរៀន និងបង្រៀនដោយផ្ទាល់នោះ​បានទេ ដែលមានន័យថា «បច្ចេកវិទ្យា គឺជាឧបករណ៍ជំនួយ តែមិនមែនជាឧបករណ៍ជំនួស នោះឡើយ»៕