សេដ្ឋកិច្ច

អូស្ត្រាលី សន្យាបន្តជួយអភិវឌ្ឍសេដ្ឋកិច្ច និងជំរុញការវិនិយោគនៅកម្ពុជា

បានផុស

៤ years មុន

នៅ

ថ្ងៃសៅរ៍ ១២ វិច្ឆិកា ២០២២

ដោយ

លោក អេនថូនី អាល់បានីស (Anthony Albanese) នាយករដ្ឋមន្ត្រីអូស្ត្រាលី បានបញ្ជាក់ថា អូស្ត្រាលី នឹងបន្តគាំទ្រការអភិវឌ្ឍលើកម្មវិធីអភិវឌ្ឍន៍ដោយចីរភាព សេដ្ឋកិច្ចឌីជីថល ថាមពលវ័យឆ្លាត សេដ្ឋកិច្ចបៃតង និងវិស័យដទៃទៀត ដើម្បីរួមចំណែកធ្វើឱ្យប្រទេសកម្ពុជា ព្រមទាំងប្រទេសនៅក្នុងតំបន់ទទួលបានស្ថេរភាព និងវិបុលភាព។ លោកនាយករដ្ឋមន្រ្តីអូស្រ្តាលី ថ្លែងបែបនេះ នៅក្នុងជំនួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្រ្តីកម្ពុជា នៅថ្ងៃទី ១២ ខែវិច្ឆិកានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈលោក អ៊ាង សុផល្លែត ជំនួយការផ្ទាល់របស់សម្តេចតេជោ បានឱ្យដឹងថា នាយករដ្ឋមន្ត្រីអូស្ត្រាលី បានវាយតម្លៃខ្ពស់ ចំពោះការដឹកនាំរបស់សម្តេចតេជោ ដែលបានធ្វើឱ្យកម្ពុជាមានការអភិវឌ្ឍន៍យ៉ាងឆាប់រហ័ស។ លើសពីនេះទៀត លោក អេនថូនី អាល់បានីស (Anthony Albanese) បានបង្ហាញការអបអរសាទរជូនចំពោះកម្ពុជា ដែលទទួលបានជោគជ័យលើការដឹកនាំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅក្នុងឆ្នាំ២០២២នេះ។

សម្តេចតេជោ ហ៊ុន សែន នាយករដ្ឋមន្រ្តី បានសម្តែងនូវការពេញចិត្តចំពោះទំនាក់ទំនងកម្ពុជា និងអូស្ត្រាលី ហើយក៏បានថ្លែងអំណរគុណលោកនាយករដ្ឋមន្ត្រី និងរដ្ឋាភិបាលអូស្ត្រាលី ដែលបានបានជួយដល់ការអភិវឌ្ឍរបស់កម្ពុជាតាំងពីដើមមក។

សម្តេចក៏បានសម្តែងនូវការរីករាយចំពោះកិច្ចសហប្រតិបត្តិការ រវាងប្រទេសទាំងពីរ។ ជាពិសេសកំណើនវិនិយោគរបស់អូស្ត្រាលី នៅកម្ពុជា។

សម្តេចតេជោ ក៏បានថ្លែងអរគុណអូស្ត្រាលី សម្រាប់ការជួយកម្ពុជាលើវិស័យកសិកម្ម ជួយកម្ពុជាស្វែងរកសុខសន្តិភាព ជួយកម្ពុជាអភិវឌ្ឍន៍ធនធានមនុស្ស ផ្តល់វ៉ាក់សាំងដល់កម្ពុជា និងចូលរួមចំណែកក្នុងការអភិវឌ្ឍកម្ពុជា តាមរយៈផ្តល់ជំនួយ និងជំរុញការវិនិយោគមកកម្ពុជា។

រយៈពេល ៩ខែឆ្នាំ២០២២ ទំហំពាណិជ្ជកម្មទ្វេភាគី កម្ពុជា-អូស្ត្រាលី មានទឹកប្រាក់ ៤០៤,៤៧លានដុល្លារ កើនឡើង ១០០,៣% ធៀបនឹងឆ្នាំ២០២១ ដែលមានទឹកប្រាក់ ២០១,៨៨លានដុល្លារ។ បើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា ក្នុងនោះកម្ពុជានាំទៅអូស្ត្រាលី មានចំនួន ២៨៣,៥៥លានដុល្លារ កើនឡើង ១៣២,៦% និងការនាំទំនិញពីអូស្ត្រាលីមានទឹកប្រាក់ ១២០,៩១លានដុល្លារ កើនឡើង ៥១,២%៕