លោកស្រី ឆាយ ស៊ីវលីន៖ វិស័យទេសចរណ៍​ហក់ឡើង ៩៩០ភាគរយ ខណៈកម្ពុជា​កំពុងទាក់ទាញភ្ញៀវបន្ថែមពីឥណ្ឌា

ស្ថានភាពវិស័យទេសចរណ៍នាពេលនេះហក់ឡើងខ្លាំងគួរឱ្យកត់សម្គាល់។ ជាក់ស្តែង ត្រឹមរយៈពេល ១០ខែ ឆ្នាំ ២០២២ មានកំណើនភ្ញៀវទេសចរអន្តរជាតិប្រមាណ ១លាន៦សែននាក់ បើធៀបនឹងឆ្នាំ ២០២១ កើនឡើង ៩៩០ភាគរយ។

ក្នុងនោះផ្នែកដែលកំពុងដំណើរការ និងលូតលាស់ខ្លាំង គឺវិស័យដឹកជញ្ជូន បដិសណ្ឋារកិច្ច និងវិស័យសេវាកម្មម្ហូប​អាហារ។ នេះជាការបញ្ជាក់របស់លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា (CATA)។

ថ្លែងប្រាប់អ្នកយកព័ត៌មានកម្ពុជាថ្មី លោកស្រី ឆាយ ស៊ីវលីន បានលើកឡើងថា វិស័យទេសចរណ៍មានសក្ដាពលខ្ពស់ ដោយសារកម្ពុជា មានវប្បធម៌ស្រស់ផូផង់ ឆ្នេរសមុទ្រស្រស់ស្អាត មានអេកូទេសចរណ៍ សហគមន៍ទេសចរណ៍ ដែលទាំងអស់នេះ គឺជាសសរស្តម្ភដ៏សំខាន់នៃវិស័យទេសចរណ៍ ទាក់ទាញភ្ញៀវពីគ្រប់ទិសទី។ ទន្ទឹមនេះ តាមរយៈវិស័យ​ទេសចរណ៍ បានបង្កើតឱកាសការងារជូនប្រជាពលរដ្ឋនៅក្នុងស្រុកជាច្រើន និងបានស្រូបទាញ​វិនិយោគផងដែរ។

លោកស្រី ថ្លែងដូច្នេះថា«សម្រាប់ខ្ញុំផ្ទាល់ ខ្ញុំមានសុទិដ្ឋិនិយមចំពោះសេដ្ឋកិច្ចកម្ពុជា ដែលមានការកើនឡើង ដោយពឹងផ្អែកវិស័យទេសចរណ៍ជាផ្នែកមួយដ៏សំខាន់»។ លោកស្រី ថ្លែងបែបនេះ ក្រោយពីឃើញ​របាយការណ៍​របស់ធនាគារពិភពលោក បានចេញផ្សាយដោយលើកអំពីវិស័យទេសចរណ៍ ក្នុងការជួយជ្រោងកំណើនសេដ្ឋកិច្ចជាតិ ឱ្យកើនឡើងក្នុងរង្វង់ជិត ៥ភាគរយ នៅឆ្នាំ ២០២២ និង ៥.២ ភាគរយ នៅឆ្នាំ ២០២៣។

លើសពីនេះទៀត លោកស្រីបញ្ជាក់ថា សមាគមទេសចរណ៍កម្ពុជា Cata កំពុងធ្វើយុទ្ធសាស្រ្តទាក់ទាញទីផ្សារភ្ញៀវ​ទេសចរឥណ្ឌា ដែលមិនទាន់មានជើងហោះហើរត្រង់មកកម្ពុជា។ ឥណ្ឌាគឺជាទីផ្សារធំ បន្ទាប់ពីទីផ្សារចិន  ដែលកន្លងមក​មិនទាន់ទទួលបានភ្ញៀវទេសចរច្រើននៅឡើយសម្រាប់កម្ពុជា។ នេះជាការបន្ថែមរបស់លោកស្រី ឆាយ ស៊ីវលីន។ បើតាមលោកស្រី ស៊ីវលីន យុទ្ធសាស្រ្តរបស់ Cata គឺផ្តួចផ្តើមសហការជាមួយក្រុមហ៊ុនអាកាសចរណ៍កម្ពុជា ដោយភ្ជាប់ទំនាក់ទំនងជាមួយទីភ្នាក់ងារទេសចរណ៍ឥណ្ឌា ដើម្បីរួមគ្នា បង្កើតឱ្យមានកញ្ចប់ល្អៗ សម្រាប់ទីផ្សារឥណ្ឌា​ចូលមកកម្ពុជា។ លើសពីនេះទៀត Cata ជំរុញឱ្យមានការពង្រីកសេវាកម្មបម្រើដល់ទីផ្សារឥណ្ឌា ដោយសារភ្ញៀវឥណ្ឌា ចូលមកភាគច្រើនជាក្រុមធំៗ ហើយកន្លងមក ទីផ្សារឥណ្ឌនៅមានចំនួនតិចតូចនៅឡើយ។

សូមបញ្ជាក់ថា វិស័យទេសចរណ៍ ត្រូវបានរាជរដ្ឋាភិបាល ចាត់ទុកជាមាសបៃតង កាន់តែចាយ កាន់តែកើនមិនចេះអស់ និងអត្ថបប្រយោជន៍ដែលទទួលបានគឺជាចំណូលត្រជាក់ មិនត្រឹមតែជួយចំណូលជាតិប៉ុណ្ណោះទេ ថែមទាំងជួបង្កើនប្រាក់​ចំណូល​ដល់ពលរដ្ឋនៅក្នុងសហគមមូលដ្ឋានផងដែរ។

បើតាមរបាយការណ៍របស់ក្រសួងទេសចរណ៍រយៈពេល ១០ខែ ឆ្នាំ ២០២២នេះ នៅទូទាំងប្រទេសទទួលបានភ្ញៀវ​ទេសចរអន្តរជាតិប្រមាណ ១.៥៧លាននាក់ កើនឡើង ៩៩១ភាគរយ ធ្វើនឹងឆ្នាំ ២០២១។ ចំណែកភ្ញៀវទេសចរផ្ទៃក្នុង​មានចំនួនជាង​ ១០.៨៦លាននាក់ កើនឡើង ២៣៤ភាគរយ ធៀបនឹងរយៈពេលដូចគ្នា កាលពីឆ្នាំ ២០២១៕