លោក ស៊ីន ចាន់សេរីវុត្ថា៖ អាកាសយានដ្ឋានអន្តរជាតិតេជោភ្នំពេញថ្មី​សាងសង់សម្រេចបាន ​៤៣ភាគរយ

អ្នកនាំពាក្យអាកាសចរស៊ីវិលកម្ពុជា លោក ស៊ីន ចាន់សេរីវុត្ថា បានឱ្យដឹងថា គម្រោងសាងសង់អាកាស​យានដ្ឋានអន្តរជាតិតេជោភ្នំពេញថ្មី សម្រេចបាន ៤៣ភាគរយហើយ នៅដំណាក់កាលទី១នេះ។

ការសាងសង់អាកាសយានដ្ឋានអន្តរជាតិតេជោមាន៣ដំណាក់។ ក្នុងដំណាក់កាលទី១នេះ ក្រុមហ៊ុនបាននិងកំពុង​សាងសង់ផ្លូវរត់ចំងាយ៤ គីឡូម៉ែត្រ សម្រាប់ចុះចតយន្តហោះខា្នតធំប្រភេទ 4F ដែលមានសមត្ថភាពទទួលអ្នកដំណើរ​បានជាង ១៥លាននាក់ក្នុង១ឆ្នាំ នៅឆ្នាំ២០៣០។ ចំណែកដំណាក់កាលទី២ ក្រុមហ៊ុននឹងពង្រីកសាងសាងផ្លូវ​រត់ចំនួន២ស្របគ្នា ដែលអាចទទួលអ្នកដំណើររហូតដល់ ៣០លាននាក់ ក្នុង១ឆ្នាំ នៅឆ្នាំ២០៥០ និងដំណាក់កាលទី៣ ចាប់ពីឆ្នាំ២០៥០តទៅ ក្រុមហ៊ុននឹងបន្តបន្ថែមសាងសង់ផ្លូវរត់ទី៣ ដើម្បីទទួលអ្នកដំណើរជាតិអន្តរជាតិឱ្យបាន ៤៥លាននាក់ក្នុង១ឆ្នាំ។

បើតាមលោក ស៊ីន ចាន់សេរីវុត្ថា គម្រោងសាងសង់អាកាសយានដ្ឋានអន្តរជាតិតេជោភ្នំពេញថ្មីនេះ គ្រោងចំណាយថវិកា​ប្រមាណ ​៦១៧លានដុល្លារ។ គម្រោងនេះ បានចាប់ផ្តើមដំណើរការសាងសង់នៅឆ្នាំ២០១៩ ហើយគ្រោងនឹងបញ្ចប់​នៅពាក់កណ្តាលឆ្នាំ២០២៤ (ដំណាក់កាលទី១) (យោងលើកម្មវិធីការងារមេ Updated Master Schedule) ដែលបានធ្វើបច្ចុប្បន្នភាពចុងក្រោយដោយ CAIC/Cambodia Airport Investment Co.,Ltd )។

អាកាសយាន្តដ្ឋានអន្តរជាតិតេជោ ត្រូវបានរាជរដ្ឋាភិបាលផ្តល់សិទ្ធិឱ្យក្រុមហ៊ុន CAIC ដែលជាក្រុមហ៊ុនបណ្តាក់ទុនរួម​គ្នា​រវាងរាជរដ្ឋាភិបាលកម្ពុជា និងក្រុមហ៊ុន OCIC សាងសង់អភិវឌ្ឍអាកាសយានដ្ឋានអន្តរជាតិភ្នំពេញថ្មី នៅខេត្ត​កណ្តាល និងខេត្តតាកែវ លើផ្ទៃដីទំហំ ២ ៦០០ហិចតា ស្ថិតនៅចម្ងាយ ២០គីឡូម៉ែត្រពីភាគខាងត្បូងភ្នំពេញ។

តាមការសិក្សា និងស្រាវជ្រាវ ឯកសារអន្តរជាតិ បានបង្ហាញឱ្យឃើញថា ការស្ទុះងើបឡើងវិញនៃចរាចរណ៍តាមផ្លូវ​អាកាស​សម្រាប់ប្រទេសកម្ពុជា នៅចុងឆ្នាំ២០២៤ ឬដើមឆ្នាំ២០២៥ នឹងអាចកើតឡើងស្មើនឹងឆ្នាំ២០១៩ ស្របទៅតាម​និន្នាការនៃការស្ទុះងើបឡើងវិញរបស់ពិភពលោក ប្រសិនបើគ្មានអ្វីប្រែប្រួល។

អ្នកនាំពាក្យអាកាសចរស៊ីវិល លោក ស៊ីន ចាន់សេរីវុត្ថា បានសង្កត់ធ្ងន់ថា ដើម្បីជំរុញកំណើនប្រកបដោយនិរន្តរភាព ការវិនិយោគមួយចំនួនធំក្នុងការធ្វើទំនើបកម្ម និងការពង្រឹងពង្រីកហេដ្ឋារចនាសម្ព័ន្ធអាកាសចរណ៍ប្រកបដោយគុណភាព ត្រូវទាមទារក្នុងរយៈពេលវែង និង ប្រកបដោយគុណភាព ដោយគិតឱ្យបានស៊ីជម្រៅដល់បញ្ហាសុវត្ថិភាព សន្តិសុខ និងភាពធន់ នៅពេលដែលមានការកើនឡើងនៃតម្រូវការចរាចរណ៍ផ្លូវអាកាស និងឆ្លើយតបទៅនឹងតម្រូវការ​ចម្រុះ​របស់អ្នក​ផ្តល់សេវា អ្នកប្រើប្រាស់ និងអតិថិជន, ការព្រួយបារម្ភអំពីបញ្ហាបរិស្ថានជាសកល និងបញ្ហាផ្សេងៗទៀត ដែលមានសារៈសំខាន់នៅក្នុងប្រព័ន្ធដឹកជញ្ជូនតាមផ្លូវអាកាសបច្ចុប្បន្ន៕