ព័ត៌មានជាតិ

មួយថ្ងៃម្សិលមិញនេះ អ្នកដំណើរតាមផ្លូវអាកាសចូលប្រទេសកម្ពុជាមានជិត ១ ម៉ឺននាក់

បានផុស

២ years មុន

នៅ

ថ្ងៃចន្ទ ៧ តុលា ២០២៤

ដោយ

បើតាមមន្រ្តីអាកាសចរណ៍ស៊ីវិលបានឲ្យកម្ពុជាថ្មីដឹងថា មួយថ្ងៃម្សិលមិញនេះ មានអ្នកដំណើរតាមផ្លូវអាកាសចូលប្រទេសកម្ពុជាមានជិត ១ ម៉ឺននាក់។

លោក ស៊ីន ចាន់សេរីវុត្ថា រដ្ឋលេខាធិការ និងជាមន្រ្តីអ្នកនាំពាក្យអាកាសចរស៊ីវិលបានឲ្យកម្ពុជាថ្មីដឹងនៅព្រឹកនេះថា អ្នកដំណើរដែលចូលប្រទេសតាមផ្លូវអាកាសនៅថ្ងៃទី០៦ ខែតុលា ឆ្នាំ២០២៤ ម្សិលមិញសរុបមានចំនួន ៩ ៨៩៦ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ីន ចាន់សេរីវុត្ថា បានបញ្ជាក់បន្ថែមថា «អ្នកដំណើរជិត ១ ម៉ឺននាក់មាន ៨១ សញ្ជាតិ ខណៈប្រទេសដែលនាំមុខគេមានចិនមានចំនួន ៣ ១៥៥ នាក់ ម៉ាឡេស៊ី ៣១៣ នាក់, កូរ៉េខាងត្បូង ២៨៦ នាក់ និង ថៃ ២៤២នាក់»។

បើតាមរបាយការណ៍ពីអាកាសចរណ៍ស៊ីវិល ក្នុងរយៈពេល ៧ ខែ ឆ្នាំ២០២៤ អាកាសយានដ្ឋានអន្តរជាតិទាំង ៣ របស់ប្រទេសកម្ពុជា មានអ្នកដំណើរឆ្លងកាត់ជាង ៣ លាននាក់ បើធៀបរយៈពេលដូចគ្នាកាលពីឆ្នាំមុនកើនឡើង ២០ ភាគរយ។

គិតចាប់ពីដើមខែមករា ដល់ខែកក្កដា ឆ្នាំ២០២៤ អាកាសយានដ្ឋានអន្តរជាតិទាំង ៣ មានភ្នំពេញ សៀមរាប និងខេត្តព្រះសីហនុ មានជើងហោះហើរចេញ-ចូល (ទ្វេទិស) មានចំនួនជាង ៣ ម៉ឺនជើង, អ្នកដំណើរចេញ-ចូល (ទ្វេទិស) មានចំនួនជាង ៣ លាននាក់ និងទំនិញតាមផ្លូវអាកាសចេញ-ចូល (ទ្វេទិស) មានចំនួនជាង ៤២ លានគីឡូក្រាម។

បើធៀបរយៈពេល ៧ ខែ (មករា-កក្កដា) ឆ្នាំ២០២៤ ទៅនឹងរយៈពេល ៧ខែ (មករា-កក្កដា) ឆ្នាំ២០២៣ កំណើនជាមធ្យមសម្រាប់ចំនួនជើងហោះហើរកើនឡើងប្រមាណ ១៣%, ចំនួនអ្នកដំណើរកើនឡើងប្រមាណ ២០% និងចំនួនទំនិញតាមផ្លូវអាកាសកើនឡើងប្រមាណ ៤៤%៕

Related Topics:លោក ស៊ីន ចាន់សេរីវុត្ថា