រដ្ឋមន្រ្តីពាណិជ្ជកម្មណែនាំវិស័យឯកជនបង្កើនទីផ្សារទៅសហភាពអឺរ៉ុបជំរុញកំណើននាំចេញស្រូវអង្ករកម្ពុជា

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានណែនាំវិស័យឯកជន ពិសេសសហព័ន្ធស្រូវអង្ករកម្ពុជា ជំរុញ​បង្កើនកិច្ចសហប្រតិបត្តិការរវាងវិស័យឯកជន និងសហភាពអឺរ៉ុប តាមរយៈការផ្លាស់ប្តូរព័ត៌មានទីផ្សារ និងលក្ខខណ្ឌ​តម្រូវសម្រាប់ការនាំចេញ ព្រមទាំងបទពិសោធន៍នានា សំដៅជំរុញវិស័យស្រូវអង្ករកម្ពុជា ឱ្យបានកាន់​តែប្រសើរឡើង។ លោករដ្ឋមន្រ្តីលើកឡើងបែបនេះ នៅក្នុងជំនួបពិភាក្សារវាងវិស័យរដ្ឋ និងឯកជន ដើម្បីជំរុញវិស័យស្រូវ-អង្ករកម្ពុជា កាលពីថ្ងៃទី ២២ កុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ាន សូរស័ក្តិ ថ្លែងដោយយោងតាមអនុសាសន៍ណែនាំរបស់សម្តេចតេជោនាយករដ្ឋមន្ត្រីថា វិស័យឯកជនមាន​តួនាទីយ៉ាងសំខាន់ក្នុងការសិក្សាពីលទ្ធភាព ដើម្បីជំរុញទំនិញពីកម្ពុជា រួមទាំងអង្ករ អាចធ្វើការជ្រៀតចូល​ទីផ្សារក្រៅ​ប្រទេសឱ្យបានកាន់តែទូលំទូលាយ ជាពិសេសការនាំចេញអង្ករទៅកាន់ទីផ្សារសហភាពអឺរ៉ុប។

លោករដ្ឋមន្រ្តី បានណែនាំដល់វិស័យឯកជន ពិសេសសហព័ន្ធស្រូវអង្ករកម្ពុជា ក្នុងការពិនិត្យនូវយន្តការអនុវត្តបច្ចុប្បន្ន និងកត្តាផ្សេងៗ ដែលពាក់ព័ន្ធដូចជា ប្រភព បរិមាណ និងតម្លៃអង្ករ ដែលកត្តាទាំងនេះ គឺជាមូលហេតុអាចជះ​ឥទ្ធិពលដល់ទីផ្សារអង្ករក្នុងទីផ្សារសហភាពអឺរ៉ុប។

លោក សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាសហប្រធានក្រុមការងារ “ឈ” ផ្នែកស្រូវ-អង្ករ ហើយក៏ជាប្រធានកិត្តិយសសហព័ន្ធស្រូវអង្ករកម្ពុជាបានរាយការណ៍​ពីសក្តានុពលនៃទីផ្សារនាំ​ចេញស្រូវ-អង្ករកម្ពុជាទៅកាន់ទីផ្សារក្រៅប្រទេស ពិសេសទីផ្សារសហភាពអឺរ៉ុប។

លោក បានឱ្យដឹងថា សហព័ន្ធស្រូវ-អង្ករកម្ពុជា និងសហភាពអឺរ៉ុប បានបង្កើតភាពជាដៃគូ កាន់តែស៊ីជម្រៅជាងមុន តាមរយៈការផ្លាស់ប្តូរ និងចែករំលែកនូវព័ត៌មាន ព្រមទាំងបានសហការជាមួយសហភាពអឺរ៉ុបគ្រប់ផ្នែក ដើម្បីស្វែងយល់​ពីគ្នា​ទៅវិញទៅមក ជាពិសេសស្វែងយល់ពីវិស័យស្រូវ-អង្ករកម្ពុជា ក៏ដូចជាពីទីផ្សារអង្ករនៅសហភាពអឺរ៉ុប។

សូមបញ្ជាក់ថា ក្នុងឆ្នាំ២០២២ កម្ពុជាបាននាំចេញអង្ករទៅអឺរុបក្នុងបរិមាណជាង ២០ម៉ឺនតោន​កើនឡើង ​៣២.១% បើធៀបនឹងរយៈពេលដូចគ្នាកាលពីឆ្នាំ២០២១ ដែលស្មើនឹង ៣៥%នៃបរិមាណនាំចេញសរុប។ ក្នុងរយៈពេល១០​ឆ្នាំចុងក្រោយនេះ ចាប់ពីឆ្នាំ២០១២ ដល់ឆ្នាំ២០២២ ការនាំចេញទៅកាន់ទីផ្សារសហគមន៍អឺរ៉ុប ​ធ្លាប់តែមានការថយចុះ​ពីមួយឆ្នាំទៅមួយឆ្នាំ ​គឺពី ៦៦% មកដល់២៥ % នៃបរិមាណនាំចេញសរុបប្រចាំ​ឆ្នាំ តែបែរជាមានកំណើនបន្តិច​​​ឡើងវិញ នៅឆ្នាំ២០២២​។ នេះបើតាមទិន្នន័យការនាំចេញអង្ករកម្ពុជា១០ឆ្នាំចុង របស់ក្រសួងកសិកម្ម រុក្ខាប្រមាញ់ និងនេសាទ៕