សេដ្ឋកិច្ច

សម្តេចតេជោ៖ កម្ពុជា អាចក្លាយជាប្រទេសមានទីផ្សារធំកែច្នៃវត្ថុធាតុដើមចែកចាយគ្រាប់ស្វាយចន្ទី

បានផុស

១ សប្តាហ៍ មុន

នៅ

ថ្ងៃចន្ទ ២៧ កុម្ភៈ ២០២៣

ដោយ

សម្តេចតេជោ ហ៊ុន សែន នាយករដ្ឋមន្រ្តីបានលើកឡើងថា ប្រសិនបើកម្ពុជាមានលទ្ធភាព កម្ពុជា អាចក្លាយជាប្រទេសដែលចែកចាយគ្រាប់ស្វាយចន្ទីខ្លាំងមួយ នៅក្នុងចំណោមអ្នកខ្លាំង។ សម្តេចគូសបញ្ជាក់ថា ក្នុងមួយឆ្នាំ កម្ពុជា បាននាំចេញគ្រាប់ស្វាយចន្ទីប្រមាណជាង ១លានតោន ដែលមិនទាន់កែច្នៃ។ សម្តេចថ្លែងដូច្នេះថា« សព្វថ្ងៃយើងកែច្នៃខ្លួនឯងបានតិចតួចណាស់»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចនាយករដ្ឋមន្រ្តីលើកឡើងបែបនេះ នៅក្នុងពិធីប្រគល់សញ្ញាបត្រដល់និស្សិតបច្ចេកវិទ្យា និង គរុនិស្សិតបច្ចេកទេស ជ័យលាភីនៃវិទ្យាស្ថានជាតិបណ្តុះបណ្តាលបច្ចេកទេស (NTTI) នាព្រឹកថ្ងៃទី ២៧ ខែ កុម្ភៈ។

ពាក់ព័ន្ធនឹងស្វាយចន្ទីនេះ កម្ពុជា បានសម្រេចអនុម័តលើសេចក្តីព្រាង “គោលយោបាយជាតិស្តីពីស្វាយចន្ទី ឆ្នាំ ២០២២-២០២៧” ដើម្បីអភិវឌ្ឍន៍ផលិតកម្ម កែច្នៃ និងទីផ្សារស្វាយចន្ទីឱ្យមានលក្ខណៈប្រកួតប្រជែងប្រកបដោយបរិយាប័ន្ន ធានានូវនិរន្តរភាព និងការធ្វើពិពិធកម្មសេដ្ឋកិច្ច កាលខែមករា កន្លងទៅ។ គោលនយោបាយស្វាយចន្ទីនេះ គឺជាយុទ្ធសាស្ត្រមួយសម្រាប់ជំរុញទីផ្សារ និងជួយកសិករ ផលិតកម្មកសិកម្ម ជាពិសេស ជួយពង្រីកការកែច្នៃស្វាយចន្ទីឱ្យមានលទ្ធភាពនាំចេញបានកាន់តែច្រើនថែមមួយកម្រិតទៀត និងបង្កើនតម្លៃបន្ថែមក្នុងសេដ្ឋកិច្ចជាតិ ជាពិសេសគឺជួយបង្កើតកម្លាំងពលកម្មជូនប្រជាពលរដ្ឋផងដែរ។

បើតាមសម្តេចតេជោ គោលនយោបាយនេះ គឺសំដៅទាក់ទាញការកែច្នៃនៅក្នុងស្រុក។ សម្តេចបន្តថា«កម្ពុជា មានវត្ថុធាតុដើមប៉ុន្តែការកែច្នៃមិនទាន់មានគ្រប់គ្រាន់ ដូច្នេះកម្ពុជា ចង់ទាក់ទាញវិនិយោគមកកែច្នៃវត្ថុធាតុដើមដែលមានក្នុងស្រុក»។

តាមរយៈការកែច្នៃក្នុងស្រុកនេះ សម្តេចសង្កត់ធ្ងន់ថា នឹងបង្កើតបានការងារធ្វើសម្រាប់ប្រជាលរដ្ឋក្នុងប្រទេស និងតម្លៃបន្ថែមសម្រាប់ផលិតកម្មរបស់យើង៕