អ្នកវិនិយោគ ចិន សម្រុកទិញអចលនទ្រព្យគ្រប់ប្រភេទនៅ ភូកេត

បើយោងតាមអ្នកប្រឹក្សាអចលនទ្រព្យនៃទីភ្នាក់ងារ Knight Frank Thailand បានឲ្យដឹងថា វិនិយោគិនចិនកំពុងប្រញាប់ប្រញាល់ទិញអចលនទ្រព្យនៅខេត្តភូកេត ដូចជា ខុនដូ ផ្ទះវីឡា ហាងទំនិញ និងសូម្បីតែចម្ការទុរេន ក៏ពួកគេប្រមូលទិញ​យកដែរ ។

លោក Nattha Kahapana ប្រធានទីប្រឹក្សាបាននិយាយថា ពេលនេះ តម្រួវការទីផ្សារអចលនទ្រព្យភូកេត កំពុងតែកើនឡើងខ្លាំង​​ពីសំណាក់វិនិយោគិនអចលនទ្រព្យចិន និងអ្នកទិញរុស្ស៊ី។ ដោយឡែក​ ចំពោះរុស្ស៊ី ពួកគេទិញអចលនទ្រព្យនៅភូកេត គឺដើម្បីរស់នៅ ។

ស្របពេលរុស្ស៊ីចាប់អារម្មណ៍ទិញ​ផ្ទះរស់នៅ ផ្ទុយមកវិញ វិនិយោគិនចិន គឺចាប់អារម្មណ៍លើអលនទ្រព្យគ្រប់ប្រភេទតែម្តង។ ទន្ទឹមនោះ លោក Nattha បញ្ជាក់ថា វិនិយោគិនចិន បានស្នើទិញចម្ការ​ទុរេន ដើម្បីធ្វើជាកន្លែងសម្រាប់ទេសចរចិនមកកម្សាន្តផងដែរ ។

គួរបញ្ជាក់ថា នៅក្នុងអំឡុងឆមាស​ទី ២​ ក្នុងឆ្នាំ​នេះ បន្ទាប់ពីចិន​បើកសេដ្ឋកិច្ចឡើងវិញ ថៃសង្ឃឹមនឹងមានវិនិយោគិន​កាន់តែច្រើនឡើង​ចូលមកក្នុងប្រទេស ជាពិសេសគឺលំហូរភ្ញៀវទេសចរពីប្រទេសចិននេះឯង ៕

ប្រែសម្រួលដោយ ៖ នាង រតនៈ

ប្រភព ៖ Bangkok Posts