ផ្សារហ៊ុន ថៃ កំពុង​ធ្លាក់ចុះ ចំពេលស្ថានភាពនយោបាយក្នុងប្រទេសកំពុង​ចលាចល

សន្ទស្សន៍ផ្សារហ៊ុនថៃ (SET) កាលពីថ្ងៃព្រហស្បតិ៍បានចាប់ផ្តើមធ្លាក់ចុះ បន្ទាប់ពីមានកំណើនជាច្រើនថ្ងៃ ស្របពេលស្ថានភាពនយោបាយនៅក្នុងប្រទេសកំពុងមានភាពចលាចល ។

សន្ទស្សន៍ផ្សារភាគហ៊ុនថៃបានបិទនៅតម្លៃ ១,៥២១.១៨ ពិន្ទុកាលពីថ្ងៃព្រហស្បតិ៍ ដែលធ្លាក់ចុះ ១.០១ ភាគរយ នៅក្នុងទីផ្សារពាណិជ្ជកម្មដែលមានតម្លៃ ១.៣២ ពាន់លានដុល្លារ ។

ចំពោះការធ្លាក់ចុះនេះដែរ អ្នកជំនាញខាងវិភាគយល់ថា បើសិនជាគណបក្សភូមិចៃថៃ ដែលមានសំឡេងគាំទ្រច្រើននៅក្នុងសភាលំដាប់លេង ៣ រួមបញ្ចូលជាមួយគណបក្សចលនាឆ្ពោះទៅមុខ និងភឿថៃ ក្នុងការបង្កើតរដ្ឋាភិបាលចម្រុះ​ នោះភាគហ៊ុននឹងអាចកើនឡើងវិញ ។

ជាពិសេស ប្រសិនបើគណបក្សភឿថៃបង្កើតរដ្ឋាភិបាលដោយជោគជ័យ នោះសន្ទស្សន៍ភាគហ៊ុនរំពឹងថា​ នឹងជួញដូរនៅចន្លោះ ១,៥៧០ ទៅ ១,៥៩០ ពិន្ទុ ខណៈឈ្មួញកណ្តាលបាននិយាយថា បន្ទាប់ពីរដ្ឋាភិបាលថ្មីប្រកាសគោលនយោបាយសេដ្ឋកិច្ចរបស់ខ្លួន នោះសន្ទស្សន៍ផ្សារហ៊ុនថៃនឹងកើនឡើងបន្ថែមទៀតផងដែរ ។

ប៉ុន្តែ​ទោះជាយ៉ាងណា អ្នកជំនាញព្រមានថា ប្រសិនបើសមាសភាពរដ្ឋាភិបាលថ្មីផ្លាស់ប្តូរ ហើយគណបក្សដែលមានសំឡេងភាគតិចបង្កើតរដ្ឋបាលថ្មី នោះសន្ទស្សន៍ភាគហ៊ុន អាចធ្លាក់ចុះដល់ក្រោម ១,៥០០ ពិន្ទុម្តងទៀត ៕

ប្រែសម្រួល៖ នាង រតនៈ

ប្រភព៖ Bangkok Post

ចុចអាន ៖ សមាជិកសភា ថៃ ជាច្រើនរូបចេញតាមទ្វារក្រោយ និងជិះទូកត្រឡប់ទៅផ្ទះ ក្រោយបោះឆ្នោតដកសិទ្ធិលោក Pita