រុស្ស៊ី ដំឡើងអត្រាការប្រាក់ដល់ចំណុច ១៣ ភាគរយ

ធនាគារកណ្តាលរបស់ប្រទេសរុស្ស៊ីបានដំឡើងអត្រាការប្រាក់សំខាន់ៗរបស់ខ្លួនចំនួន ១០០ ពិន្ទុមូលដ្ឋាន ស្មើនឹង ១ ភាគរយកាលពីថ្ងៃសុក្រ ដោយបំពេញតាមការព្យាករណ៍ទីផ្សារ ។

ការដំឡើង ១ ភាគរយបន្ថែមនេះ ធ្វើឲ្យអត្រាសំខាន់ត្រូវបានកើនឡើងដល់ ១៣ ភាគរយក្នុងមួយឆ្នាំ ដើម្បីកាត់បន្ថយសម្ពាធអតិផរណានៅក្នុងសេដ្ឋកិច្ច ។

កាលនៅក្នុងកិច្ចប្រជុំចុងក្រោយរបស់ខ្លួននៅក្នុងខែសីហា ធនាគារកណ្តាលនៃប្រទេសរុស្ស៊ីបានសម្រេចដំឡើងអត្រាគន្លឹះរបស់ខ្លួនចំនួន ៣៥០ ចំណុចមូលដ្ឋានដល់ ១២ ភាគរយ ដើម្បីគាំទ្រដល់ការធ្លាក់ចុះនៃប្រាក់រូប្លិ៍ ។

ធនាគារកណ្តាលរុស្ស៊ី បានបង្កើនការព្យាករណ៍អតិផរណារបស់ខ្លួនសម្រាប់ឆ្នាំនេះដល់ ៦ ភាគរយ ទៅ ៧ ភាគរយ និងរក្សាគោលដៅ ៤ ភាគរយសម្រាប់ឆ្នាំ ២០២៤ ។

គួរបញ្ជាក់ថា អត្រាអតិផរណាប្រចាំឆ្នាំរបស់រុស្ស៊ីបានកើនឡើងដល់កម្រិតខ្ពស់រយៈពេល ៦ ខែគឺ ៥.២ ភាគរយនៅក្នុងខែសីហា និង ៤.៣ ភាគរយក្នុងខែកក្កដា ៕

ប្រែសម្រួល៖ នាង រតនៈ

ប្រភព៖​ Anadolu