អ្នកជំនាញ ៖ វិស័យអចលនទ្រព្យ វៀតណាម នឹងមានកំណើននៅឆមាសទី ២ ឆ្នាំក្រោយ

វិស័យអចលនទ្រព្យវៀតណាម​ត្រូវបានអ្នកវិភាគ​ព្យាករណ៍ថា នឹងនៅជួបប្រទះបញ្ហាប្រឈម​រយៈពេល ៣ ត្រីមាសទៀត មុនមានភាពល្អប្រសើរឡើងវិញនៅឆមាសទី ២ នៃឆ្នាំ ២០២៤ ។

យោងតាមសមាគមអ្នកអចលនទ្រព្យវៀតណាមបញ្ជាក់ថា នៅក្នុងត្រីមាសទី ៣ ប្រតិបត្តិការអចលនទ្រព្យវៀតណាមនៅទូទាំងប្រទេស​មានចំនួន​ ៦ ពាន់ ដោយបានកើនឡើង ១.៥ ដងច្រើនជាងត្រីមាសទី ២ ។ ក្នុងនោះគ្រាន់តែនៅត្រីមាសទី ៣ អាផាតមិន ផ្ទះ និងដីចំនួន ៤,៨០០ ត្រូវបានដំណើរការនៅក្នុងទីផ្សារនៅភាគខាងត្បូង ហើយមាន ៧០ ភាគរយត្រូវបានលក់ចេញ ។

ទោះបីជាមានកំណើនក៏ពិតមែន ប៉ុន្តែអ្នកជំនាញនៅក្នុងទីផ្សារអចលនទ្រព្យយល់ឃើញថា នៅមិនទាន់មានភាពល្អប្រសើរនៅឡើយនោះទេ ដោយត្រូវរងចាំ​រហូតដល់ខែកក្កដានៃឆមាសទី ២ ឆ្នាំក្រោយ ទើបអចលនទ្រព្យមានកំណើនល្អប្រសើរឡើងវិញ ។

បន្ថែមពីនេះ ជាមួយនឹងការជំរុញកំណើន ត្រូវតែមានការគាំទ្រពីសំណាក់រដ្ឋាភិបាល​ ខណៈបច្ចុប្បន្ន រដ្ឋាភិបាលបានបញ្ចុះ​អត្រាកម្ចីប្រាក់ដើម្បីងាយស្រួលសម្រាប់ប្រជាពលរដ្ឋ ។

ទន្ទឹមនឹងនេះ ការងើបឡើងវិញនៃ​ឆមាសទី ២ ឆ្នាំក្រោយ ​សម្រាប់តែ​អចលនទ្រព្យដែលមានតម្លៃសមរម្យ និងមធ្យមប៉ុណ្ណោះ ខណៈអ្នកជំនាញ​យល់ថា ផលិតផលលំដាប់ខ្ពស់ដូចជាវីឡា និងផ្ទះលក់ទំនិញ នឹងងើបឡើងវិញយឺតនៅដើមឆ្នាំ ២០២៥ ៕

ប្រែសម្រួល៖ នាង រតនៈ

ប្រភព៖​ VN Express