គ្រឹះស្ថានឥណទានជនបទ ១០៥ ត្រូវបានលុប អាជ្ញាបណ្ណចេញពីបញ្ជីធនាគារជាតិ

គិតត្រឹមឆមាសទី១ ឆ្នាំ២០២៣ ធនាគារជាតិនៃកម្ពុជា បានបញ្ជាក់ថា គ្រឹះស្ថានឥណទានជនបទចំនួន ១០៥ គ្រឹះស្ថាន ត្រូវបានលុបឈ្មោះចេញពី​បញ្ជីរបស់ធនាគារជាតិ ដើម្បីពង្រឹងវិស័យនេះ។

សមាគមមីក្រូហិរញ្ញវត្ថុកម្ពុជា មើលឃើញថា គ្រឹះស្ថានឥណទានជនបទបាន និងកំពុងរួមចំណែកផ្តល់សេវាឥណទាន ខ្នាតតូចនៅតាមតំបន់មូលដ្ឋាន ដើម្បីបំពេញតម្រូវការឥណទានទៅតាមប្រភេទអាជីវកម្មរបស់ប្រជាពលរដ្ឋ។

គ្រឹះស្ថានឥណទានជនបទ ទទួលបានវិញ្ញាបនបត្រពីធនាគារជាតិនៃកម្ពុជា ដោយផ្តល់ឥណទានដល់អតិថិជនសរុប ៨៤.២៣៦ គណនី ស្មើនឹង ១៧៧,៤ ប៊ីលានរៀល បើគិតជាដុល្លារស្មើនឹង ៤៣,៧ លានដុល្លារអាមេរិក។ គិតត្រឹម ឆមាសទី១ ឆ្នាំ២០២៣។

យោងតាមរបាយការណ៍ប្រចាំឆមាសទី១ របស់ធនាគារជាតិនៃកម្ពុជា បានបង្ហាញថា ទ្រព្យសកម្មគ្រឹះស្ថានមីក្រូហិរញ្ញវត្ថុ បានកើនឡើង ១៦,៣% ដល់ ៤៧,៨ ទីលានរៀល (១១,៨ ប៊ីលានដុល្លារអាមេរិក) ដែលក្នុងនោះ ឥណទានអតិថិជន បានកើនឡើង ១៤,៨% ដល់ ៤០ ទ្រីលានរៀល (៩,៧ ប៊ីលានដុល្លារអាមេរិក) ដោយមាន ២,២ លានគណនី។

ឥណទានទាំងនេះ បានផ្ដល់ទៅកាន់វិស័យសំខាន់ៗក្នុងសេដ្ឋកិច្ចរួមមាន៖ អង្គភាពគ្រួសារ ៣៤% (មានកំណើន ១៨,៤%) ពាណិជ្ជកម្មនិងជំនួញ ២៣,២% (១៥%) កសិកម្ម ១៧,៦% (១៣,២%) សេវាកម្ម ១៣,៤% (៨,៩%) ដឹកជញ្ជូន ៤,២% (០,២%) សំណង់ ៤,៤% (១៤%) កម្មន្តសាល ១,៩% (៣០,៨%) និងផ្សេងៗ ១,៣% (៤២,៤%)។ ទន្ទឹមនេះ វិស័យមីក្រូហិរញ្ញវត្ថុ បានទទួលប្រាក់បញ្ញើ ២០ទីលានរៀល (៤,៩ ប៊ីលានដុល្លារអាមេរិក) ស្មើនឹង ២,៧ លានគណនី។

សូមបញ្ជាក់ថា ប្រព័ន្ធធនាគារនៅកម្ពុជា មានធនាគារពាណិជ្ជ ៥៩ ធនាគារឯកទេស ៩ គ្រឹះស្ថានមីក្រូហិរញ្ញវត្ថុ ទទួល ប្រាក់បញ្ញើ ៥ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៨២ គ្រឹះស្ថានឥណទានជនបទ ១១៨ គ្រឹះស្ថានភតិសន្យា ហិរញ្ញវត្ថុ ១៧ អ្នកដំណើរការតតិយភាគី ៦ គ្រឹះស្ថានផ្តល់សេវាទូទាត់សងប្រាក់ ៣៥ អ្នកផ្តល់សេវាប្រព័ន្ធចែករំលែក ព័ត៌មានឥណទាន ១ ការិយាល័យតំណាងធនាគារបរទេស ៦ និងអាជីវកម្មប្ដូរប្រាក់ ២.៨៩០៕

អត្ថបទ៖ ផល ធារិត