ត្រឹមពេល ១០ ខែដំបូងនៃឆ្នាំនេះ រុស្ស៊ី ប្រមូលពន្ធបានជាង ៤២៨ ពាន់លានដុល្លារ

​បើយោងតាមប្រធាន​សេវា​ពន្ធ​សហព័ន្ធរុស្ស៊ី (FTS) បានឲ្យដឹងថា រុស្ស៊ីប្រមូលពន្ធបានជាង ៤២៨ ពាន់លានដុល្លារសម្រាប់រយៈពេល ១០ ខែដំបូងនៃឆ្នាំនេះ ដោយកើនឡើង ១០ ភាគរយ​ស្មើនឹង ៤១ ពាន់លានដុល្លារ បើប្រៀបធៀបនឹងឆ្នាំមុន ។

លោក Daniil Egorov ប្រធាន FTS ដែលបានជួបជាមួយលោកប្រធានាធិបតី Vladimir Putin កាលពីថ្ងៃអង្គារបាននិយាយថា តួលេខពន្ធឆ្នាំនេះប្រមូលបាន ៤២៨ ពាន់លានដុល្លាររួចហើយក្នុងរយៈពេល ១០ ខែដំបូងនៃឆ្នាំ ២០២៣ នេះ ។ ចំពោះតួលេខនេះដែរ បានកើនឡើង ៤១ ពាន់លានដុល្លារ បើប្រៀបធៀបនឹងឆ្នាំមុន ហើយរំពឹងថា សេវាពន្ធនឹងកើនឡើង ៩ ភាគរយក្នុងរយៈពេលពេញមួយឆ្នាំ ។

ដោយឡែក​ពេញមួយឆ្នាំមុន​ រុស្ស៊ីប្រមូលពន្ធសរុបបាន ៤៧៨ ពាន់លានដុល្លារ ខណៈនៅក្នុងឆ្នាំនេះ រំពឹងប្រមូលបានចំនួន ៥២៣ ពាន់លានដុល្លារ ។

ទន្ទឹមនឹងនេះ ប្រាក់ចំណូលក្រៅពីប្រេង និងឧស្ម័ន, បង្កាន់ដៃពន្ធលើប្រាក់ចំណូលចន្លោះខែមករា និងខែតុលា បានកើនឡើង ២០ ភាគរយ ហើយពន្ធលើតម្លៃបន្ថែម (VAT) បានកើនឡើង ១១ ភាគរយ ។ បន្ថែមពីនេះ ពន្ធធានារ៉ាប់រងកើនឡើង ២៩ ភាគរយ ហើយពន្ធលើប្រាក់ចំណូលផ្ទាល់ខ្លួនបានកើនឡើង ១៣ ភាគរយ ៕

ប្រែសម្រួល៖ នាង រតនៈ

ប្រភព៖ RT