Apple ទាញទម្លាក់ Samsung ឡើងឈរលេខ១ ជាក្រុមហ៊ុនលក់ស្មាតហ្វូនដាច់បំផុតលើលោក

ក្រោយកាន់តំណែងកំពូលអស់រយៈពេល១២ឆ្នាំ ពេលនេះក្រុមហ៊ុន Samsung ត្រូវបាន Apple ទាញទម្លាក់មកលេខ២វិញ លែងកាន់តំណែងជាក្រុមហ៊ុនលក់ស្មាតហ្វូតដាច់ជាងគេបំផុតលើពិភពលោកទៀតហើយ។ នេះបើតាមសេចក្តីរាយការណ៍របស់ BBC នៅថ្ងៃពុធទី១៧ខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមទិន្នន័យពីសាជីវកម្មទិន្នន័យអន្តរជាតិ (IDC) បានឲ្យដឹងថា ក្រុមហ៊ុនទូរស័ព្ទយក្សរបស់អាមេរិក គឺមានចំណែកជាងមួយភាគប្រាំ នៃស្មាតហ្វូនដែលនាំចេញកាលពីឆ្នាំកន្លងទៅ។

ក្រៅពី Samsung ជាប់លេខ២ ក្រុមហ៊ុនដែលជាប់ចំណាប់ថ្នាក់ជាបន្តបន្ទាប់មានដូចជា Xiaomi, OPPO និង Transsion។

IDC រាយការណ៍ថា ស្មាតហ្វូនជិត១.២ពាន់លានគ្រឿងត្រូវបានលក់កាលពីឆ្នាំ២០២៣ ពោលគឺធ្លាក់ចុះជាង ៣% បើធៀបនឹងឆ្នាំ២០២២។

នេះគឺជាតួលេខលក់ដាច់ស្មាតហ្វូនទាបបំផុត ក្នុងរយៈពេលមួយទសវត្សរ៍ ព្រោះថា អ្នកប្រើប្រាស់ជាច្រើន លែងសូវចេញលុយពីកាបូបទិញរបស់របរទៀត ដោយបញ្ហាប្រឈមផ្នែកសេដ្ឋកិច្ច និងអត្រាការប្រាក់ខ្ពស់ ប៉ុន្តែអ្នកជំនាញព្យាករថា ទីផ្សារនឹងរើបឡើងវិញនៅឆ្នាំនេះ។

ចំពោះ Apple, ឆ្នាំមុនក្រុមហ៊ុននេះ លក់ស្មាតហ្វូនដាច់បាន២៣៤.៦លានគ្រឿង ខណៈ Samsung លក់បាន២២៦.៦លានគ្រឿង រីឯ​ Xiaomi លក់បាន១៤៥.៩លានគ្រឿង, OPPO លក់បាន ១០៣.១លានគ្រឿង និង Transsion លក់បាន៩៤.៩លានគ្រឿង។

តាមការអះអាងពី IDC, កត្តារួមផ្សំមួយចំនួនដែលនាំឲ្យ Apple ឡើងឈរទីកំពូលបែបនេះគឺបណ្តាលមកពី មនុស្សបង្វែមកប្រើ iPhone ព្រោះជាទូរស័ព្ទពេញនិយមគ្រប់ស្រទាប់វណ្ណៈ ភាពឡូយឆាយ និងភ្ជាប់ជាមួយមុខងារដែលមានសមត្ថភាពខ្ពស់៕

អត្ថបទ៖ សុខ សុវណ្ណ

ចុចអាន៖ iPhone នៅតែលក់ដាច់ខ្លាំងក្នុងទីផ្សារ ចិន ទោះមានការប្រជែងពីក្រុមហ៊ុន Huawei