សិង្ហបុរី​ វ៉ាដាច់​ក្រុង​ឡុងដ៍ ក្លាយ​ជា​ក្រុង​អ្នក​មាន​ជាង​គេ​បំផុត​ទី​៤​លើ​ពិភព​លោក​​

បុគ្គល​​មាន​ទ្រព្យ​សម្បត្តិ​ស្តុក​ស្ដម្ភ​លើស​ពី​១​លាន​ដុល្លារ​សហរដ្ឋ​អាមេរិក​នៅក្នុង​​ប្រទេស​​សិង្ហបុរី​ បាន​កើនឡើង​​ចំនួន​​ ៣ ៤០០ នាក់កាលពី​ឆ្នាំ​មុន​​ ដែល​ធ្វើ​ឱ្យ​បុរី​រដ្ឋ​​អាស៊ី​អាគ្នេយ៍​មួយ​នេះ​ វ៉ាដាច់ទី​​​ក្រុង​ឡុងដ៍​របស់​ចក្រភព​អង់គ្លេស​ ក្លាយ​ជា​ក្រុង​អ្នក​មាន​ជាង​គេ​បំផុត​ទី​៤​ នៅ​លើ​ពិភព​លោក​។ នេះ​បើ​តាម​ការ​ចុះផ្សាយ​របស់​កាសែត ឌឹ ស្ត្រេតស៍ ថាមស៍។ ​

របាយការណ៍​ពី​​​ក្រុម​ហ៊ុន​ប្រឹក្សា​យោបល់​លើ​ការ​វិនិយោគ​នៅ​បរទេស​​ Henley & Partners ដែល​មាន​ឈ្មោះ​ថា​ «ក្រុង​មាន​ជាង​គេ​បំផុត​ប្រចាំ​ឆ្នាំ​ ២០២៤​» បាន​បង្ហាញ​ថា​ សិង្ហបុរី​បច្ចុប្បន្ននេះ​ ​មាន​សេដ្ឋី​ទ្រព្យ​​រាប់​លាន​ដុល្លារចំនួន​ ២៤៤ ៨០០ នាក់​ សេដ្ឋី​ទ្រព្យ​រាប់​រយ​លាន​ដុល្លារ​ចំនួន​ ៣៣៦ នាក់​ និង​មហាសេដ្ឋី​ទ្រព្យ​រាប់​ប៊ីលាន​ដុល្លារ​ចំនួន​ ៣០ នាក់​។  

របាយការណ៍​បាន​កត់​សម្គាល់​ថា​​ ចាប់​តាំង​ពី​ឆ្នាំ​ ២០១៣ ដល់​ឆ្នាំ​ ២០២៣ ​ចំនួន​បុគ្គល​​មាន​​ទ្រព្យ​សម្បត្តិ​ស្តុក​ស្ដម្ភ​ (HNWIs) នៅ​សិង្ហបុរី​ បាន​កើន​ឡើង​រហូត​ដល់​ ៦៤ ភាគរយ​។ ​​ទីក្រុង​តូក្យូ​របស់​ប្រទេស​ជប៉ុន​ជាប់​ចំណាត់​ថ្នាក់​លេខ​ ៣​ ជាមួយ​នឹង​​​ HNWIs ​ចំនួន​ ២៩៨ ៥៨១ នាក់​ ដោយ​ធ្លាក់​ចុះ​ ៥ ភាគ​រយ​ ក្នុង​រយៈ​ពេល​មួយ​ទសវត្សរ៍​កន្លង​មក​នេះ​។  ​

​ទីក្រុង​ឡុងដ៍​ ដែល​ជា​ទីក្រុង​​មាន​ទ្រព្យ​សម្បត្តិ​ច្រើន​ជាង​គេ​បំផុត​លើ​​​ពិភព​លោក​អស់​រយៈ​ពេល​ជា​ច្រើន​ឆ្នាំ​មក​ហើយ​នោះ​ បាន​បន្ត​ធ្លាក់​​ចំណាត់​ថ្នាក់​របស់​ខ្លួន​ ហើយ​ឥឡូវ​នេះ​ស្ថិត​នៅ​​លំដាប់​​​ទី​ ៥​ ដោយ​មាន​  HNWIs ចំនួន​ ២២៧ ៤០៥ នាក់​ ដោយ​ធ្លាក់​ចុះ​ ១០​ ភាគរយ​ក្នុង​រយៈ​ពេល​មួយ​ទសវត្សរ៍​កន្លង​មក​នេះ​។​

ចំណែក​ឯក្រុង​ញូវយ៉ក​របស់​សហរដ្ឋ​អាមេរិក​វិញ​ នៅ​តែ​បន្ត​ជា​ទីក្រុង​មាន​ទ្រព្យ​សម្បត្តិ​ច្រើន​ជាង​គេ​បំផុត​លើ​ពិភព​លោក​ លំដាប់​ទី​១​ ដោយចំនួន​​ HNWIs កើន​ឡើង​ ៤៨ ភាគរយ​ក្នុង​ទសវត្សរ៍​ឆ្នាំ​ ២០១៣-២០២៣។ ក្នុង​ឆ្នាំ​ ២០២៣​ ក្រុង​នេះ ​មាន​​​សេដ្ឋី​ទ្រព្យ​​រាប់​លាន​ដុល្លារចំនួន​ ​៣៤៩ ៥០០ នាក់​ សេដ្ឋី​ទ្រព្យ​រាប់​រយ​លាន​ដុល្លារ​ចំនួន​ ៧៤៤ នាក់​ និង​មហាសេដ្ឋី​ទ្រព្យ​រាប់​ប៊ីលាន​ដុល្លារ​ចំនួន​ ៦០ នាក់​។

បើ​តាម​របាយការណ៍​ដដែល​ តំបន់​ Bay Area នៃ​រដ្ឋ​កាលីហ្វូញ៉ា​ ដែល​រួម​បញ្ចូល​ក្រុង​សានហ្វ្រង់ស៊ីស្កូ​ និង​​ Silicon Valley ឈរ​នៅ​លំដាប់​ក្រុង​​ស្ដុក​ស្តម្ភ​បំផុត​លើ​ពិលោក​លំដាប់​ទី​២​ ដោយ​មានសរុប​​ HNWIs ចំនួន​ ៣០៦ ៤៤៣ នាក់​។

​លោក​ Juerg Steffen ​នាយក​ប្រតិបត្តិ​នៃ​ក្រុមហ៊ុន​ Henley & Partners ​បាន​និយាយ​ថា​ កត្តា​សំខាន់​ដែល​ជំរុញ​ឱ្យ​មា​ន​ការ​រីក​លូត​លាស់​នៅ​ក្នុង​ទីក្រុង​ដែល​មាន​ទ្រព្យ​សម្បត្តិ​ស្តុក​ស្ដម្ភ​ជាង​គេ​បំផុត​របស់​ពិភព​លោក​ គឺ​​ដោយ​សារ​ដំណើរ​ការ​ដ៏​រឹង​មាំ​នៃ​ទីផ្សារ​ហិរញ្ញ​វត្ថុ​ក្នុង​រយៈ​​ពេល​ប៉ុន្មាន​ឆ្នាំ​ថ្មី​ៗ​នេះ​។​ លោក​បន្ថែម​ផង​ដែរ​ថា​៖ «ភាព​ជឿន​លឿន​យ៉ាង​រហ័ស​នៃ​បញ្ញា​សិប្បនិមិត្ត​ (AI) ​មនុស្ស​យន្ត​ និង​បច្ចេក​វិទ្យា​ប្លុកឆេន​​ ​បាន​ផ្តល់​ឱកាស​ថ្មី​សម្រាប់​ការ​បង្កើត​ និង​ប្រមូល​ទ្រព្យ​សម្បត្តិ​»​៕