សេដ្ឋកិច្ច

ការនាំចេញ-ចូលរបស់ចិន កើនឡើងជាថ្មី ដោយបង្ហាញសញ្ញានៃការស្ទុះងើបឡើងវិញនៃតម្រូវការ

បានផុស

២ years មុន

នៅ

ថ្ងៃព្រហស្បតិ៍ ៩ ឧសភា ២០២៤

ដោយ

ទិន្នន័យគយចិន បានបង្ហាញថា ការនាំចេញ និងការនាំចូលរបស់ប្រទេសចិន បានមានកំណើនជាថ្មីឡើងវិញកាលពីខែមេសា ដោយបង្ហាញពីសញ្ញាស្ទុះងើបឡើងវិញនៃតម្រូវការទាំងក្នុង និងក្រៅប្រទេស។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ នាថ្ងៃព្រហស្បតិ៍នេះ។

ទិន្នន័យនេះបង្ហាញពីប្រសិទ្ធភាពនៃវិធានការគាំទ្រគោលនយោបាយក្នុងរយៈពេលជាច្រើនខែកន្លងមកនេះ ថាកំពុងទទួលបានភាពទាក់ទាញ និងជួយធ្វើឱ្យវិនិយោគិន និងទំនុកចិត្តអ្នកប្រើប្រាស់ មានស្ថិរភាព។

ការនាំចេញពីប្រទេសចិន បានកើនឡើង ១,៥ ភាគរយនៅខែមេសា បើប្រៀបធៀបនឹងរយៈពេលដូចគ្នាកាលពីឆ្នាំមុន ខណៈខែមីនា វាបានធ្លាក់ចុះរហូតដល់ ៧,៥ ភាគរយ ដែលនោះគឺជាការធ្លាក់ចុះលើកដំបូងចាប់តាំងពីខែវិច្ឆិកា។

ទិន្នន័យគយដដែលបន្តថា ការនាំចូលសម្រាប់ខែមេសា បានកើនឡើង ៨,៤ ភាគរយ ក្រោយធ្លាក់ចុះដល់ ១,៩ ភាគរយនៅខែមីនា។

លោក Zhang Zhiwei ប្រធានសេដ្ឋវិទូនៅក្រុមហ៊ុន Pinpoint Asset Management បាននិយាយថា៖ «ការនាំចេញ គឺជាចំណុចភ្លឺស្វាងនៅក្នុងសេដ្ឋកិច្ចរបស់ប្រទេសចិនក្នុងឆ្នាំនេះ។ តម្រូវការក្នុងស្រុកដែលខ្សោយ បាននាំឱ្យមានសម្ពាធបរិត្តផរណា ដែលជំរុញការប្រកួតប្រជែងការនាំចេញរបស់ប្រទេសចិន»។

គួរគូសភ្ជាប់ថា ប្រទេសចិនបានកំណត់គោលដៅកំណើនសេដ្ឋកិច្ចសម្រាប់ឆ្នាំ ២០២៤ ប្រហែល ៥ ភាគរយ ប៉ុន្តែអ្នកវិភាគជាច្រើន បាននិយាយថា វាអាចនឹងជាបញ្ហាប្រឈមមួយដើម្បីសម្រេចបានគោលដៅនេះ បើគ្មានការជំរុញឱ្យខ្លាំងបន្ថែមទៀត។

ក្រុមហ៊ុននាំចេញរបស់ចិន ប្រឈមមុខនឹងពេលវេលាដ៏លំបាកកាលពីឆ្នាំមុន ដោយសារការកើនឡើងអត្រាការប្រាក់ ដែលដាក់បន្ទុកលើតម្រូវការនៅក្រៅប្រទេស។ អ្នកវិភាគនិយាយថា ក្រុមហ៊ុននាំចេញរបស់ចិន កំពុងបន្តកាត់បន្ថយតម្លៃ ដើម្បីរក្សាការលក់នៅក្រៅប្រទេស ចំពេលដែលតម្រូវការក្នុងស្រុកចុះខ្សោយ៕