ទីផ្សារបរធនបាលកិច្ចកើនដល់១,៥១៥ ពាន់លានដុល្លារ​គិតត្រឹមថ្ងៃទី១៥ខែកក្កដា​

មន្រ្តីជាន់ខ្ពស់នៃនិយ័តករបរធនបាលកិច្ច (ន.ប.ធ.) ​បានបង្ហាញថា​គិតត្រឹមពាក់កណ្តាលខែកក្កដានេះ ទីផ្សារបរធនបាលកិច្ចមានទំហំចំនួន ១,៥១៥ ពាន់លានដុល្លារអាម៉េរិក និងមានបរធនបាលកិច្ចចំនួន ៩៥៣ ដែលបានបង្កើត និងចុះបញ្ជី ព្រមទាំងមានប្រតិបត្តិករបរធនបាលសរុបចំនួន ២៩។

ការបង្ហាញរបស់ន.ប.ធ.ធ្វើឡើង​នាព្រឹកថ្ងៃចន្ទ ​ ត្រូវនឹងថ្ងៃទី១៥ ខែកក្កដា ឆ្នាំ២០២៤ ​ក្នុងការ​សិក្ខាសាលាផ្សព្វផ្សាយអំពីប្រកាសស្តីពី «វិធានក្នុងការគ្រប់គ្រង ការរៀបចំ និងការប្រព្រឹត្ដទៅរបស់បរធនបាលកិច្ច» នៅខេត្ត​សៀមរាប ​

លោក សុខ ដារ៉ា អគ្គនាយកនៃន.ប.ធ.​ បានគូសរំលេចផងដែរអំពីតួនាទី និងសារសំខាន់របស់យន្ដការបរធនបាលកិច្ចក្នុងការបង្កើតទំនុកចិត្ត ក៏ដូចជាការទាក់ទាញការវិនិយោគបន្ថែម ជាពិសេសចូលរួមចំណែកក្នុងការជំរុញដំណើរការអភិវឌ្ឍន៍គម្រោងធុរកិច្ចនានាក្នុងខេត្ដសៀមរាប ដោយអនុលោមតាមច្បាប់ និងបទប្បញ្ញត្ដិជាធរមាន។

លោកថាគិតត្រឹមបច្ចុប្បន្ន ទីផ្សារបរធនបាលកិច្ចមានទំហំចំនួន ១.៥១៥ លានដុល្លារអាម៉េរិក និងមានបរធនបាលកិច្ចចំនួន ៩៥៣ ដែលបានបង្កើត និងចុះបញ្ជី ព្រមទាំងមានប្រតិបត្តិករបរធនបាលសរុបចំនួន ២៩ ដែលក្នុងនោះរួមមាន ក្រុមហ៊ុនបរធនបាលចំនួន ១២ និងធនាគារពាណិជ្ជដែលជាប្រតិបត្តិករបរធនបាលផ្តល់សេវារក្សាសុវត្ថិភាព ឬសេវារក្សាទុកចំនួន ១៧ ធនាគារ, បរធនបាលរូបវន្តបុគ្គលចំនួន ៦៣ រូប ដែលទទួលបានអាជ្ញាបណ្ណ/ការអនុញ្ញាតពី ន.ប.ធ. និងក្រុមហ៊ុនផ្តល់សេវាវាយតម្លៃចំនួន ១៤ និងក្រុហ៊ុនផ្តល់សេវាសវនកម្មចំនួន ១៤ ដែលទទួលបានការទទួលស្គាល់ពី ន.ប.ធ.។

សូមបញ្ជាក់ថា បរធនបាលកិច្ច គឺជាសេវាហិរញ្ញវត្ថុមួយមិនមែនធនាគារ មានតួនាទីគ្រប់គ្រង មើលថែរក្សា ឬចាត់ចែក​ទ្រព្យសម្បត្តិរបស់បុគ្គល ឬក្រុមហ៊ុនណាមួយ សម្រាប់ជាប្រយោជន៍ដល់ក្រុមគោលដៅណាមួយ ដែលស្ថិតក្នុង​អនុលោមតាមលិខិតបរធនបាលកិច្ច ឬបទប្បញ្ញត្តិជាធរមាន។ បរធនបាលកិច្ចនេះ ជាវិស័យមួយ​ដែលជួយដល់ការ​អភិវឌ្ឍវិស័យពាណិជ្ជកម្ម និងសង្គមជាតិ តាមរយៈការទាក់ទាញនូវមូលនិធិសង្គមនានា និង​លំហូរទុនវិនិយោគទាំងក្នុង និងក្រៅប្រទេស៕

​