ព័ត៌មានអន្ដរជាតិ

តម្លៃប្រេងឆៅកើនឡើងជាថ្មី ក្រោយទឹកដីដែលអ៊ីស្រាអែលគ្រប់គ្រង រងការវាយប្រហារដោយរ៉ុក្កែត

បានផុស

២ years មុន

នៅ

ថ្ងៃចន្ទ ២៩ កក្កដា ២០២៤

ដោយ

តម្លៃប្រេងឆៅសកល បានកើនឡើងតិចតួចសារជាថ្មី ដោយងើបពីការធ្លាក់ចុះក្នុងការជួញដូរកាលពីសប្ដាហ៍មុន ក្រោយតំបន់ Golan Heights ដែលអ៊ីស្រាអែលគ្រប់គ្រង បានរងការវាយប្រហារដោយរ៉ុក្កែត ដោយសម្លាប់មនុស្សជាង១០នាក់ ហើយអាមេរិក និងអ៊ីស្រាអែល ចោទប្រកាន់ក្រុមសកម្មប្រយុទ្ធហេសប៊ូឡា របស់លីបង់។ នេះបើតាមការចុះផ្សាយរបស់ទីភ្នាក់ងារសារព័ត៌រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រេងឆៅនាពេលអនាគតម៉ាក Brent បានកើនឡើង ២០ សេន ឬ ០,៣ ភាគរយ ដល់ ៨១,៣៣ ដុល្លារ/បារ៉ែលក្នុងការជួញដូរនាព្រលឹមថ្ងៃចន្ទនេះ ខណៈប្រេងឆៅនាពេលអនាគតរបស់អាមេរិក West Texas Intermediate (WTI) បានកើនឡើង ៩ សេន ឬ ០,១ ភាគរយ ដោយជួញដូរនៅតម្លៃ ៧៧,២៥ ដុល្លារ/បារ៉ែល។

កាលពីសប្តាហ៍មុន តម្លៃប្រេងម៉ាក Brent បានធ្លាក់ចុះ ១,៨ ភាគរយ ខណៈតម្លៃប្រេងម៉ាក WTI បានធ្លាក់ចុះ ៣,៧ ភាគរយ ដោយសារតែកម្សោយនៃតម្រូវការប្រេងក្នុងប្រទេសចិន និងមានក្ដីសង្ឈឹមកាន់តែខ្លាំងនៃកិច្ចព្រមព្រៀងនៅហ្គាហ្សា រវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន ហាម៉ាស់។

យ៉ាងណាមិញ កាលពីថ្ងៃអាទិត្យ គណៈរដ្ឋមន្ត្រីសន្តិសុខរបស់អ៊ីស្រាអែល បានអនុញ្ញាតឱ្យរដ្ឋាភិបាលរបស់លោកនាយករដ្ឋមន្ត្រី Benjamin Netanyahu សម្រេចចិត្តលើ «របៀប និងពេលវេលា» នៃការឆ្លើយតបចំពោះការវាយប្រហារដោយគ្រាប់រ៉ុក្កែតកាលពីថ្ងៃសៅរ៍នៅតំបន់ Golan Heights ដែលបានសម្លាប់ក្មេងជំទង់ និងក្មេងៗ ចំនួន ១២ នាក់។ នេះជាការវាយប្រហារលើអ៊ីស្រាអែលដ៏ធំបំផុត ក្រោយការវាយប្រហារថ្ងៃទី ៧ តុលា ឆ្នាំមុនរបស់ក្រុមហាម៉ាស់ដែលបង្កជម្លោះបច្ចុប្បន្ន ហើយសម្លាប់ប្រជាជនប៉ាឡេស្ទីនជាង ៣៩ ០០០ នាក់ ដែលភាគច្រើនជាជនស៊ីវិល។

អ្នកវិភាគលើកឡើងថា ការវិវត្តចុងក្រោយ បង្កការព្រួយបារម្ភថា ជម្លោះនៅតំបន់មជ្ឈិមបូព៌ានឹងកើនឡើងកាន់តែក្ដៅ ទោះបីជាក្រុមហេសប៊ូឡា ដែលគាំទ្រដោយអ៊ីរ៉ង់ បដិសេធការវាយប្រហារកាលពីថ្ងៃសៅរ៍ក៏ដោយ ដែលនេះបន្តការរំខានផ្នែកផ្គត់ផ្គង់ប្រេងឆៅសកល ហើយធ្វើឱ្យតម្លៃប្រេងកើនឡើង។ យ៉ាងណាមិញ កំណើនតម្លៃស្ថិតនៅកម្រិតតិចតួច ដោយសារតែតម្រូវការប្រេងឆៅរបស់ចិន ដែលជាប្រទេសនាំចូលប្រេងឆៅធំជាងគេបំផុតលើពិភពលោក នៅតែបន្តទន់ខ្សោយ៕