ព័ត៌មានអន្ដរជាតិ

ការសិក្សា៖ ការងារ ៥ ភាគរយ នៅអាមេរិក ឡាទីន អាចបាត់បង់ទាំងស្រុងដោយ AI

បានផុស

២ years មុន

នៅ

ថ្ងៃព្រហស្បតិ៍ ១ សីហា ២០២៤

ដោយ

ការសិក្សាស្រាវជ្រាវរួមរបស់អង្គការពលកម្មអន្តរជាតិ និងធនាគារពិភពលោក ដែលចេញផ្សាយកាលពីថ្ងៃពុធ បានបង្ហាញថា ការងារប្រមាណចន្លោះពី ២-៥ ភាគរយ នៅអាមេរិកឡាទីន និងតំបន់ការ៉ាអ៊ីប ត្រូវបានគំរាមកំហែងដោយបញ្ញាសិប្បនិមិត្ត (AI) និងមានហានិភ័យនៃការបាត់បង់ទាំងស្រុងដោយសារតែការធ្វើស្វ័យប្រវត្តិកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍នៃការសិក្សាដែលមានចំណងជើងថា «Buffer or Bottleneck? Employment Exposure to Generative AI and the Digital Divide in Latin America» បាននិយាយថា ការងាររបស់ស្ត្រី និងកម្មករវ័យក្មេង ដែលស្ថិតនៅវិស័យក្នុងប្រព័ន្ធ ប្រឈមមុខនឹងហានិភ័យកាន់តែច្រើន ពីបញ្ញាសិប្បនិមិត្តបង្កើត (Generative AI)។ ការណ៍នេះក្លាយជាបន្ទុកដ៏ធំសម្រាប់ប្រជាជនក្នុងតំបន់ ដែលជួបបញ្ហាវិសមភាពរួចទៅហើយ ដោយសារតែការងារដែលទទួលបានប្រាក់កម្រៃទាប ក្នុងសេដ្ឋកិច្ចក្រៅប្រព័ន្ធដែលកាន់តែរីករាលដាល។

យ៉ាងណាមិញ របាយការណ៍បានគូសបញ្ជាក់ថា៖ «គម្លាតក្នុងហេដ្ឋារចនាសម្ព័ន្ធឌីជីថល និងវិសមភាពផ្សេងៗទៀត អាចរារាំងផលប៉ះពាល់សំខាន់ៗនៃ AI ក្នុងតំបន់»។ សរុបមក ចន្លោះពី ២៦-៣៨ ភាគរយ នៃការងារនៅអាមេរិកឡាទីន និងតំបន់ការ៉ាអ៊ីប អាចរងផលប៉ះពាល់ពី AI បង្កើត តាមរបៀបផ្សេងៗគ្នា។

ទោះជាយ៉ាងណាក៏ដោយ ការសិក្សាដដែលបានបញ្ជាក់ថា AI ក៏មានផលវិជ្ជមានផងដែរ ដោយវាអាចជួយបង្កើនផលិតភាពការងារចន្លោះពី ៨-១៤ ភាគរយនៃការងារ ជាពិសេសនៅក្នុងទីក្រុង វិស័យអប់រំ និងក្នុងចំណោមការងារដែលមានប្រាក់ចំណូលខ្ពស់៕