កម្ពុជាកំពុងសម្លឹងការង្រីកទីផ្សារកសិផលទៅកាន់ទីផ្សារអាមេរិក

សភាពាណិជ្ជកម្មកម្ពុជា និងធុរជនក្នុងស្រុកកំពុងតែនាំយក​ផលិតកសិកម្មរបស់ខ្លួនដើម្បីពង្រីកទីផ្សារនៅសហរដ្ឋអាមេរិក ស្របពេលដែលតម្រូវការលើផលិតផលខ្មែរកំពុងទទួលបានការពេញនិយម។

លោក​តាន់ មុនីវណ្ណ អនុប្រធានសភាពាណិជ្ជកម្មកម្ពុជា បានកំពុងដឹកនាំបណ្តាគណៈប្រតិភូធរុកិច្ចកម្ពុជា ទស្សនកិច្ចធុរកិច្ចនៅអាមេរិក និងចូលរួមជំនួបពាណិជ្ជកម្មអាមេរិកកម្ពុជាឆ្នាំ២០២៤ចាប់ពីថ្ងៃទី១៧ដល់ថ្ងៃទី២១ ខែកញ្ញានេះ។​ កម្មវិធណីនេះត្រូវបានសហការរៀបចំដោយ ការិយាល័យតំណាងសភាពាណិជ្ជកម្មកម្ពុជាប្រចាំរដ្ឋកាលីហ្វ័រញ៉ា សហរដ្ឋអាមេរិក ។​

បើយោងតាមសភាពាណិជ្ជកម្មកម្ពុជាបានលើកឡើងថា៖«ជំនួបពាណិជ្ជកម្មនេះ ត្រូវបានរៀបចំឡើងក្នុងគោលបំណង ជំរុញការនាំចេញផលិតផលកម្ពុជា ទៅក្នុងទីផ្សារសហរដ្ឋអាមេរិក រួមមាន អង្ករ ម្រេច គ្រាប់ស្វាយចន្ទី ដំណាប់ផ្លែឈើ ខ្ញី ដំឡូងជ្វា ត្រីងៀត ទឹកត្រី  ទុរេន និង មៀន»។

​សម្រាប់ជំនូបពាណិជ្ជកម្មកម្ពុជា-អាមេរិកឆ្នាំ២០២៤ ​មានការ​​ចូលរួមពីក្រុមហ៊ុនកម្ពុជាជាង ៥០ ក្រុមហ៊ុន និងក្រុមហ៊ុនអាមេរិកផ្នែកនាំចូល ចែកចាយ និងផ្សារទំនើប ជាច្រើនក្រុមហ៊ុន ក្នុងវិស័យម្ហូបអាហារ និងផលិតផលកសិកម្ម។

កម្មវិធីបើកជំនូបពាណិជ្ជកម្មកម្ពុជា-អាមេរិក ​មានការអញ្ជើញចូលរួមពីប្រធានរតនា​គាររដ្ឋកាលីហ្វ័រញ៉ា អភិបាលក្រុងឡុងប៊ិច ប្រធានកំពង់ផែក្រុងឡុងប៊ិច និងតំណាងអាជ្ញាធរពាក់ព័ន្ធ។​ ក្រៅពីនេះ នឹងមានការធ្វើបទបង្ហាញ ស្តីពីនិន្នាការទីផ្សារ អនុលោមភាពបទប្បញ្ញត្តិ និងប្រព័ន្ធភស្តុភារ ដែលជាព័ត៌មានគន្លឹះសម្រាប់ធុរជនកម្ពុជា ក្នុងការនាំផលិតផលចូលក្នុងទីផ្សារអាមេរិក។

បន្ទាប់មក ធុរជនកម្ពុជា និងអាមេរិក នឹងជួបពិភាក្សាគ្នាដោយផ្ទាល់ ដើម្បីពិនិត្យលទ្ធភាពកិច្ចសហប្រតិបត្តិការរួម។ ផលិតផលកម្ពុជាដែលយកមកចូលរួមក្នុងកម្មវិធីជំនូបពាណិជ្ជកម្មនេះ។ ទន្ទឹមនឹងនេះ គណៈប្រតិភូសភាពាណិជ្ជកម្មកម្ពុជា នឹងបំពេញទស្សនកិច្ចទៅកាន់ផ្សារទំនើប និងក្រុមហ៊ុន ចែកចាយផលិតផលនៅទីផ្សារសហរដ្ឋអាមេរិកដើម្បីស្វែងយល់ពីតម្រូវការទីផ្សារ និងខ្សែច្រវ៉ាក់ផ្គត់ផ្គង់។

យោងតាមរបាយការណ៍ពីអគ្គនាយកដ្ឋានគយ ការដោះដូរពាណិជ្ជកម្មទ្វេរភាគីរវាងកម្ពុជា និងអាមេរិកសម្រេចបានទឹកប្រាក់ប្រមាណ​ ៤,៥២៩ពាន់លានដុល្លារ ក្នុងឆមាសទី១ឆ្នាំ២០២៤កើនឡើង៤ភាគរយធៀបនឹងរយៈពេលដូចគ្នាកាលពីឆ្នាំមុន។​

ក្នុងនោះការនាំចេញរបស់កម្ពុជាសម្រេចបាន៤,៤០១ពាន់លានដុល្លារកើនឡើង៣,​៩​%ធៀបនឹងរយៈពេលដូចគ្នាក្នុងឆ្នាំ២០២៣ ខណៈការនាំចូលពីអាមេរិកមានទឹកប្រាក់១២៧,៧៨៨លានដុល្លារ កើនឡើង៦,​៩​%៕