ព័ត៌មានអន្ដរជាតិ

ម៉ាឡេស៊ីចង់នាំមុខគេលើការផ្លាស់ប្ដូរថាមពលស្អាត នៅអាស៊ាន

បានផុស

៤ ខែ មុន

នៅ

ថ្ងៃពុធ ៤ ធ្នូ ២០២៤

ដោយ

ម៉ាឡេស៊ីកំពុងស្ថិតនៅលើផ្លូវឆ្ពោះទៅរកគោលដៅបង្កើនថាមពលស្អាតឱ្យបាន ៣១ ភាគរយ នៃល្បាយថាមពលរបស់ប្រទេស នៅឆ្នាំ ២០២៥ ដែលឆ្លុះបញ្ចាំងពីការប្តេជ្ញាចិត្តរបស់ខ្លួនដើម្បីក្លាយជាកម្លាំងឈានមុខគេមួយ លើការផ្លាស់ប្តូរទៅប្រើប្រាស់ថាមពលបៃតងនៅអាស៊ាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងវិទ្យាសាស្ត្រ បច្ចេកវិទ្យា និងនវានុវត្តន៍របស់ម៉ាឡេស៊ី លោក Chang Lih Kang បានថ្លែងថា ដំណើរផ្លាស់ប្តូរពណ៌បៃតង មិនអាចសម្រេចឡើងដោយក្រសួង ឬអង្គការតែមួយបាននោះទេ។

លោកបានថ្លែងយ៉ាងដូច្នេះថា៖ «ការសម្រេចបាននូវគោលដៅទាំងនេះ ទាមទារលើសពីកិច្ចខិតខំប្រឹងប្រែងរបស់រដ្ឋាភិបាលតែម្នាក់ឯង ដោយត្រូវមានកិច្ចសហការគ្នារវាងក្រសួង ស្ថាប័ន និងអ្នកពាក់ព័ន្ធ»។

លោកបន្តថា៖ «តាមរយៈការអនុម័តវិធីសាស្រ្តរដ្ឋាភិបាលទាំងមូល យើងអាចជំរុញគោលនយោបាយប្រកបដោយប្រសិទ្ធភាព លើកកម្ពស់កំណើនសេដ្ឋកិច្ច និងនាំមុខគេលើការអភិវឌ្ឍប្រកបដោយចីរភាពនៅទូទាំងតំបន់»។

គួរបញ្ជាក់ថា ល្បាយថាមពលរបស់ម៉ាឡេស៊ី គឺឥន្ធនៈហ្វូស៊ីលជាចម្បង រួមមាន ធ្យូងថ្ម ប្រេង និងឧស្ម័នធម្មជាតិ។ បច្ចុប្បន្ន ថាមពលស្អាតរួមចំណែកត្រឹមតែប្រមាណ ១៩ ភាគរយ ប៉ុណ្ណេះ នៃល្បាយថាមពលរបស់ប្រទេស ដោយ ១៧ ភាគរយ ក្នុងនោះ ជាថាមពលវារីអគ្គិសនី។ នេះបើតាមទិន្នន័យពីស្ថាប័នស្រាវជ្រាវថាមពលអន្តរជាតិ Ember៕