សម្ដេចធិបតីលើកឡើងថា កម្ពុជាមានកាលានុវត្តភាពខ្ពស់ក្នុងការវិនិយោគលើវិស័យបច្ចេកវិទ្យា

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា របៀបរបបនៃ​ការ​រៀប​ចំ​របស់កម្ពុជាមានការប្រែប្រួល ដែលឆ្លុះបញ្ចាំងទៅលើការអភិវឌ្ឍ​ចំពោះវិស័យបច្ចេកវិទ្យា។

សម្ដេច ហ៊ុន ម៉ាណែត មានប្រសាសន៍នៅក្នុងពិធីបើក «ពិព័រណ៍ពាណិជ្ជកម្មកម្ពុជា» នៅព្រឹកថ្ងៃទី ១៣ ខែធ្នូ ឆ្នាំ ២០២៤ ថា ​ផលិតផលកម្ពុជា មិនមានត្រឹមតែវត្ថុធាតុដើម ដូចជាស្រូវ អង្ករ សម្រាប់ផ្គត់ផ្គង់ក្នុងស្រុក និងនាំចេញនោះទេ កម្ពុជាមាន​ផលិត​ផលសម្រេចផងដែរ ដូចជាស្វាយ​កញ្ចប់ សម្រាប់នាំចេញ។

សម្ដេច ហ៊ុន ម៉ាណែត ថ្លែងថា៖ «មិញក៏ឃើញសមត្ថភាពរបស់កូនខ្មែរ កាម៉ង់តែជ្រក់ ខ្ញុំធ្លាប់​តែ​មានអាហ្នឹងនៅជប៉ុន នៅអី ឥឡូវ​​យើងគ្រាន់តែចុច ប៊ូតុង បញ្ជានៅហ្នឹង ហើយ Scan QR Code គឺដៃរ៉ូបូតមួយ ធ្វើទឹក​ក្រូចឆ្មា​ឱ្យ​យើងផឹក ហើយសួរថាបច្ចេកវិទ្យាហ្នឹងយកមកពីណា គឺ​និស្សិត​របស់​​យើង​នៅ​សាលា ធ្វើជាសារ​ណា​​ស្រាប់បញ្ចប់ការសិក្សា ហើយនេះគឺសមត្ថភាពរបស់កូនខ្មែរ​ ខ្ញុំមានមោទនភាពណាស់ ហើយ​នេះហើយគឺជាអ្វីដែលយើងត្រូវបង្ហាញប្រជាពលរដ្ឋខ្មែរ និងបរទេស នូវអ្វីដែលជាសក្តានុពល កា​លា​នុវត្តភាព និងសមត្ថភាពរបស់កូនខ្មែរ»។

សម្ដេចធិបតីបានបញ្ជាក់ថា ការប្រើបច្ចេកវិទ្យាគឺសំខាន់ កិច្ចការពាណិជ្ជកម្មមានពីរ កិច្ចការពា​ណិជ្ជកម្ម​ក្នុងស្រុក និងក្រៅស្រុក សំខាន់បង្វែរពីអ្នកផលិត ទៅជាអ្នកទិញមិនថាក្នុងស្រុក ឬក្រៅ​ស្រុក។

សម្ដេនាយករដ្ឋមន្ត្រីបានលើកឡើងថា ការដោះដូរពាណិជ្ជកម្ម​ទាមទាឱ្យការផ្លាស់ប្ដូរនូវ​របៀបរបប​ធ្វើការ ផ្លាស់ប្ដូរបច្ចេកវិទ្យា និងវិធីសាស្ត្រតភ្ជាប់ច្រវាក់ផលិតកម្ម ចាប់តាំងពីអ្នកផលិត ខណៈបច្ចុប្បន្ន​អ្នកផលិតគឺលែងជាកសិករមួយៗ​ហើយ គាត់ចងជាសហគមន៍ ទើបធានាបាន​នូវមាត្រដ្ឋាន និងគុណភាព។

សម្ដេចនាយករដ្ឋមន្ត្រីបានបន្ថែមថា បច្ចេកវិទ្យាអាចធ្វើការផ្ទាល់ជាមួយក្រុមហ៊ុន ហើយ​ក្រុមហ៊ុន​ដែល​​កុងត្រាជា​មួយសហគមន៍គាត់ជួយបច្ចេកទេស ធានាផ្សេងៗ ដើម្បីតភ្ជាប់ និងជាអ្នករកទីផ្សារ។

សម្ដេច ហ៊ុន ម៉ាណែត បន្ថែមថា៖ «មិញគ្រាន់តែខ្ញុំដើរបន្តិច ខ្ញុំឃើញថា របៀបរបបនៃការ​រៀប​ចំរបស់​យើងប្រែប្រួល ការអភិវឌ្ឍ អញ្ចឹងចឹងវាខុសពីកំណើនសេដ្ឋកិច្ច កំណើនសេដ្ឋកិច្ចយើង​មើលតែតួលេខ តែការអភិវឌ្ឍសេដ្ឋកិច្ច បានន័យថា វាប្រែប្រួលរបៀប​របបការងារ របៀបរបបគ្រប់​គ្រង ខ្សែច្រវាក់នៃការផលិត ទំនើបបកម្មយ៉ាងណា»។

សម្ដេចនាយករដ្ឋមន្ត្រីបន្តថា ទាំងការផលិត ទាំងការប្រមូលផ្ដុំលក់ទាំងការចែកចាយ ធានា​គុណភាព ទាំងក្នុងនិងក្រៅប្រទេស  ដែលសម្ដេចអះអាងថា វិធីសាស្ត្របែបនេះ គឺជាវិធី​សាស្ត្រ​ល្អបំផុត នៅក្នុងការភ្ជាប់ផលិតផលក្នុងស្រុក និងទីផ្សារក្នុងស្រុក និងក្រៅប្រទេស មិនថា​ផលិតផលស្បៀងអាហារ ឬបច្ចេកវិទ្យា។

សម្ដេច ហ៊ុន ម៉ាណែតបញ្ជាក់ថា៖ «ឥឡូវពិនិត្យមើលក្នុងការចាប់យកកានុវត្តភាព ឥឡូវយើងភ្ជាប់​រវាងអ្នកលក់ ហើយអ្នក​ទិញតាម​ប្រព័ន្ធ​អិនធើណិត បញ្ហាមួយទៀតគឺដោះស្រាយបញ្ហាដឹកជញ្ជូន អញ្ចឹងអ្នកវិនិយោគអាច​ពិនិត្យ​មើល​អាហ្នឹងទៀត គាត់អាចផ្ដល់ជាសេវា»៕

អត្ថបទ៖ ឡេង ដេត