ព័ត៌មានអន្ដរជាតិ

Toyota គ្រោងបង្កើតរោងចក្រផលិតរថយន្តអគ្គិសនីនៅចិន ខណៈការប្រកួតប្រជែងកាន់តែខ្លាំង

បានផុស

១ year មុន

នៅ

ថ្ងៃអង្គារ ២៤ ធ្នូ ២០២៤

ដោយ

ក្រុមហ៊ុនផលិតរថយន្តជប៉ុន Toyota Motor បានសម្រេចចិត្តគ្រោងនឹងសាងសង់រោងចក្រផលិតរថយន្តអគ្គិសនីថ្មីមួយនៅក្នុងប្រទេសចិន ខណៈការប្រកួតប្រជែងលើវិស័យរថយន្តអគ្គិសនីកាន់តែខ្លាំងឡើងៗ។ នេះបើតាមការរាយការណ៍របស់កាសែត Nikkei កាលពីថ្ងៃចន្ទ។

Nikkei បានស្រង់សម្ដីប្រភពជាច្រើនរូប ដែលអះអាងថា រោងចក្រថ្មីរបស់ Toyota មានទីតាំងនៅទីក្រុងសៀងហៃ ហើយគ្រោងនឹងផលិតរថយន្តម៉ាក Lexus អគ្គិសនីនៅទីនោះ។

ការរាយការណ៍ដដែលបានបន្តថា កន្លងមក ក្រុមហ៊ុន Toyota បានប្រតិបត្តិការក្នុងប្រទេសចិនតាមរយៈការបណ្តាក់ទុនរួមគ្នាជាមួយក្រុមហ៊ុនផលិតរថយន្តក្នុងស្រុក ប៉ុន្តែសម្រាប់រោងចក្រថ្មី ក្រុមហ៊ុននឹងដំណើរការវាដោយខ្លួនឯង ហើយគ្រោងនឹងចាប់ផ្ដើមប្រតិបត្តិការនៅឆ្នាំ ២០២៧។

យ៉ាងណាមិញ ក្រុមហ៊ុន Toyota មិនទាន់ចេញប្រតិកម្មអ្វីនៅឡើយទេ ចំពោះការរាយការណ៍របស់កាសែត Nikkei។ គេកត់សម្គាល់ឃើញថា បច្ចុប្បន្នការប្រកួតប្រជែងលើវិស័យរថយន្តកំពុងតែកាន់តែខ្លាំងឡើងៗ ចំពេលដែលតម្រូវការរថយន្តអគ្គិសនីក៏ស្ទុះឡើងក្នុងបរិបទនៃការផ្លាស់ប្ដូរបៃតង។

ចិនគឺជាទីផ្សាររថយន្តដ៏ធំបំផុតមួយរបស់ពិភពលោក ហើយប្រទេសនេះនាំមុខគេលើការលក់រថយន្តអគ្គិសនីទូទាំងសកល ដោយមានក្រុមហ៊ុន BYD ក្នុងស្រុក ជាអ្នកកាន់កាប់ចំណែកទីផ្សារច្រើនជាងគេ។ ការវាតទីលើចំណែកទីផ្សាររបស់ក្រុមហ៊ុនចិនទាំងក្នុង និងក្រៅស្រុក ក៏ធ្វើឱ្យបណ្ដាក្រុមហ៊ុនផលិតរថយន្តអន្តរជាតិផ្សេងៗទៀត ងាកមកផ្ដោតលើការប្រកួតប្រជែងលើវិស័យរថយន្តអគ្គិសនីផងដែរ៕