កម្ពុជាលើកលែងអាករពិសេសលើផលិតផលស៊ីម៉ងត៍ក្នុងស្រុករយៈពេល២ឆ្នាំ

រាជរដ្ឋាភិបាលកម្ពុជាបានលើកលែងអាករពិសេសលើផលិតផលស៊ីម៉ងត៍ក្នុងស្រុករយៈពេល២ឆ្នាំចាប់ពីឆ្នាំ២០២៥ដល់ដំណាច់ឆ្នាំ២០២៦ដើម្បីរក្សានូវនិរន្តរភាពនៃផលិតក្នុងស្រុកមួយនេះដែលបានទទួលរងនូវការធ្លាក់ចុះនៃតម្រូវការក្នុងស្រុក​ដោយសារការថមថយ​នៃការសាងសង់និងគម្រោងសំណង់ថ្មីៗដែលរងផលប៉ះពាល់អស់រយៈពេលជាច្រើនឆ្នាំចាប់តាំងពីការផ្ទុះការរីករាលដាលនៃជំងឺកូវីដ១៩ និងឥទ្ធិពេលនៃការឡើងកំដៅពីបញ្ហាភូមិសាស្រ្តនយោបាយ វិស័យសំណង់និងអចលនទ្រព្យនៅកម្ពុជាបានទទួលរងនូវការធ្លាក់ចុះជាលំដាប់​ដែលប៉ះពាល់ដល់តម្រូវការស៊ីម៉ងត៍ក្នុងស្រុក

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច​ និងហិរញ្ញវត្ថុដែលចុះហត្ថលេខាដោយលោក អូន ព័ន្ធមុន្នីរ័ត្នកាលពីថ្ងៃទី១១ខែមករា និងចេញផ្សាយនៅព្រឹកថ្ងៃ១៤ខែមករាស្តីពីការលើកលែងអាករពិសេសលើផលិតផលស៊ីម៉ងត៍ក្នុងស្រុក ដោយចាត់ទុកជាបន្ទុករបស់រដ្ឋដើម្បីចូលរួមគាំទ្រដល់ឧស្សាហកម្មផលិតស៊ីម៉ងត៍ក្នុងស្រុក។

ក្រសួងថា៖«ប្រកាសនេះ មានវិសាលភាពអនុវត្តចំពោះសហគ្រាសផលិតស៊ីម៉ងត៍ក្នុងស្រុក និងត្រូវចាត់ទុកជាបន្ទុករបស់រដ្ឋនូវអាករពិសេសតាមអត្រា ៥ ភាគរយ លើផលិតផលស៊ីម៉ងត៍ ក្នុងស្រុក សម្រាប់រយៈពេល ២ឆ្នាំ ចាប់ពីឆ្នាំ២០២៥ រហូតដល់ដំណាច់ឆ្នាំ២០២៦»។

កាលពីថ្ងៃទី ០៩ ខែមករា ឆ្នាំ ២០២៥ លោក កែវ រតនៈ រដ្ឋមន្ត្រីក្រសួងរ៉ែ និងថាមពលបានលើកឡើងនៅក្នុងពិធីប្រកាសលុបចោលអាជ្ញាបណ្ណរ៉ែថ្មកំបោរនៅខេត្តកំពតថា រោងចក្រស៊ីម៉ងត៍ដែលមានទំហំទុនវិនិយោគជាង ១ ពាន់លានដុល្លារ ក្នុងខេត្តកំពត អាចនឹងបិទទ្វារប្រសិនបើមិនមានការគាំទ្រពីរដ្ឋាភិបាល។

លោក កែវ រតនៈ បញ្ជាក់ថា៖«ប្រសិនបើរដ្ឋាភិបាលមិនយកចិត្តទុកដាក់ ហើយមិនជួយគាំទ្រតាម​រយៈ​គោល​នយោបាយផ្សេងៗ រោងចក្រនេះ នឹងរលាយទៅវិញ ហើយជាពិសេស​ក្នុងស្ថាន​ភាព​បច្ចុ​ប្បន្ននេះ ដែលសេដ្ឋកិច្ចមានការលំបាក ដោយសារវិស័យសំណង់ក៏រងការលំបាក ការលក់ផ្ទះ ធ្វើអាគារថមថយ ដោយសារសេដ្ឋកិច្ច​សកល មិនមែនតែយើងទេ ប្រទេសណាក៏ប៉ះពាល់ដែរ ដូច្នេះ វាដាក់សម្ពាធ​ទៅលើ​ការ​ទិញ​ស៊ីម៉ង់តិ៍​ ដោយសារការទិញស៊ីម៉ង់តិ៍តិចជាងមុន ដោយសារសំណង់​វាថយជាងមុន»។

យោងតាមប្រកាសរបស់ក្រសួងសេដ្ឋកិច្ច សហគ្រាសផលិតស៊ីម៉ងត៍ក្នុងស្រុកទាំងអស់ត្រូវ​ត្រូវដាក់លិខិតប្រកាសសារពើពន្ធប្រចាំខែនិងប្រចាំឆ្នាំ រួមទាំងពន្ធ-អាករដែលត្រូវបានចាត់ទុកជា បន្ទុករបស់រដ្ឋ ដោយប្រើប្រាស់ប្រព័ន្ធគ្រប់គ្រងការប្រកាសពន្ធតាមអនឡាញ (e-Filing) របស់ អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ; ត្រូវកាន់ កត់ត្រា និងថែរក្សាឯកសារបញ្ជីកាគណនេយ្យនិងព័ត៌មានដែលទាក់ទិននឹងសកម្មភាព អាជីវកម្ម ស្របតាមច្បាប់និងលិខិតបទដ្ឋានគតិយុត្តស្តីពីពន្ធដារជាធរមាន; ត្រូវខិតខំបង្កើនការបណ្តុះបណ្តាល និងផ្ទេរចំណេះដឹងនិងបច្ចេកទេសទៅបុគ្គលិកក្នុងស្រុកឱ្យ បានកាន់តែច្រើន និងល្អប្រសើរ ដើម្បីចូលរួមចំណែកអភិវឌ្ឍធនធានមនុស្ស; ត្រូវបំពេញកាតព្វកិច្ចចំពោះរដ្ឋឱ្យបានត្រឹមត្រូវ ដូចជា ការបង់ពន្ធ-អាករផ្សេងទៀត សួយសាររ៉ែ និងមូលនិធិបរិស្ថាននិងសង្គម; និងត្រូវរៀបចំរបាយការណ៍ប្រចាំឆ្នាំ ជូនក្រសួងសេដ្ឋកិច្ចនិងហិរញ្ញវត្ថុ ពាក់ព័ន្ធនឹងថ្លៃដើម សមត្ថភាព ផលិត ការប្រើប្រាស់វត្ថុធាតុដើម ការបណ្តុះបណ្តាល និងការផ្ទេរចំណេះដឹងនិងបច្ចេកទេសទៅ បុគ្គលិកក្នុងស្រុក និងការចូលរួមកិច្ចការសង្គម៕