ព័ត៌មានអន្ដរជាតិ

ឥណ្ឌាគ្រោងជំរុញវិស័យវាយនភណ្ឌ ខណៈវិបត្តិនយោបាយប៉ះពាល់ការនាំចេញរបស់បង់ក្លាដែស

បានផុស

១ year មុន

នៅ

ថ្ងៃពុធ ១៥ មករា ២០២៥

ដោយ

ប្រភពពីររបស់រដ្ឋាភិបាលឥណ្ឌាបានប្រាប់ទីភ្នាក់ងារសារព័ត៌មានរ៉យទ័រ ថា ឥណ្ឌាគ្រោងជំរុញឧស្សាហកម្មវាយនភណ្ឌ និងកាត់ដេររបស់ខ្លួន តាមរយៈការផ្ដល់ការគាំទ្រផ្នែកហិរញ្ញវត្ថុ ការកាត់បន្ថយពន្ធលើធាតុចូលសំខាន់ៗ និងការលើកទឹកចិត្តក្នុងការផលិតក្នុងស្រុកជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញរបស់ឥណ្ឌា ធ្វើឡើងចំពេលដែលវិបត្តិនយោបាយដែលកំពុងបន្តរបស់បង់ក្លាដែស បានញំញីវិស័យវាយនភណ្ឌរបស់ប្រទេសនេះ ធ្វើឱ្យបណ្ដាក្រុមហ៊ុនអន្តរជាតិងាកទៅបញ្ជាទិញសម្លៀកបំពាក់ពីប្រទេសផ្គត់ផ្គង់ជំនួសផ្សេងៗ រួមទាំងឥណ្ឌា។

អគ្គលេខាធិការនៃក្រុមប្រឹក្សាលើកកម្ពស់ការនាំចេញសម្លៀកបំពាក់ឥណ្ឌា លោក Mithileshwar Thakur បានថ្លែងថា៖ «ក្រុមហ៊ុននាំចេញរបស់ឥណ្ឌា កំពុងពិបាកក្នុងការបំពេញតាមការបញ្ជាទិញដែលប្រញាប់ប្រញាល់ក្នុងរយៈពេលប៉ុន្មានខែចុងក្រោយនេះ ខណៈក្រុមហ៊ុនអាមេរិកជាច្រើន កំពុងស្វែងរកអ្នកផ្គត់ផ្គង់ជំនួស»។

ប្រភពរដ្ឋាភិបាលម្នាក់ទៀត បានប្រាប់រ៉យទ័រថា វិស័យវាយនភ័ណ្ឌរបស់ឥណ្ឌាផ្ដល់ការងារដល់ប្រជាជនប្រមាណ ៤៥ លាននាក់ ហើយរដ្ឋាភិបាលកំពុងពិចារណាបង្កើនថវិកាសម្រាប់ក្រសួងវាយនភណ្ឌប្រចាំឆ្នាំ ២០២៥/២៦ ចន្លោះពី ១០-១៥ ភាគរយ ពីប្រមាណជាង ៥១១ លានដុល្លារ នៅឆ្នាំសារពើពន្ធបច្ចុប្បន្ន។

រដ្ឋាភិបាលក៏អាចបង្កើនថវិកាសម្រាប់គោលនយោបាយលើកទឹកចិត្ត ដែលទាក់ទងនឹងផលិតកម្មសម្រាប់វិស័យវាយនភណ្ឌផងដែរ។ ក្រោមគម្រោងនេះ រដ្ឋាភិបាលផ្តល់ការលើកទឹកចិត្តផ្នែកពន្ធ និងសម្បទានផ្សេងៗទៀត ដល់ក្រុមហ៊ុនដែលជ្រើសរើសផលិតក្នុងស្រុក។ ក្រៅពីនេះ រដ្ឋាភិបាលក៏ពិចារណាលើការកាត់បន្ថយពន្ធនាំចូលវត្ថុធាតុដើម៕