ព័ត៌មានអន្ដរជាតិ

តម្លៃប្រេងកើនឡើងជុំវិញសុទិដ្ឋិនិយមនៃការចរចាពន្ធអាមេរិក-ចិន

បានផុស

៥០ វិនាទី មុន

នៅ

ថ្ងៃចន្ទ ១២ ឧសភា ២០២៥

ដោយ

តម្លៃប្រេងអន្តរជាតិ បានកើនឡើងសម្រាប់ការជួញដូរលើទីផ្សារនៅអាស៊ីនាព្រឹកថ្ងៃចន្ទនេះ ជុំវិញសញ្ញានៃការបន្ធូរបន្ថយភាពតានតឹងពាណិជ្ជកម្ម ក្រោយមន្រ្តីជាន់ខ្ពស់អាមេរិក និងចិន បង្ហាញពីសុទិដ្ឋិនិយមលើការចរចាពន្ធកាលពីចុងសប្ដាហ៍កន្លងទៅ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ធៀបនឹងអត្រាបញ្ចប់ការជួញដូរកាលពីថ្ងៃសុក្រ តម្លៃប្រេងនាពេលអនាគតម៉ាក Brent បានកើនឡើង ០,៣៧ ដុល្លារ ឬ ០,៥៨ ភាគរយ ដោយជួញដូរនៅតម្លៃ ៦៤,២៨ ដុល្លារ/បារ៉ែល គិតត្រឹមម៉ោង ១១ ព្រឹក (ម៉ោងនៅក្រុងបាងកក) ថ្ងៃចន្ទនេះ។ ចំណែកឯប្រេងអាមេរិក ម៉ាក WTI វិញ បានកើនឡើង ០,៣៨ ដុល្លារ ឬ ០,៦២ ភាគរយ ដោយជួញដូរនៅតម្លៃ ៦១,៤០ ដុល្លារ/អោន។

កាលពីសប្ដាហ៍មុន តម្លៃប្រេងទាំង ២ បានកើនឡើងជាង ៤ ភាគរយ ដោយសារតែការបន្ធូរបន្ថយភាពតានតឹងពាណិជ្ជកម្ម។ ក្រោយជួបប្រជុំចរចាពន្ធ ២ ថ្ងៃ នៅទីក្រុងហ្សឺណែវ (ស្វីស) កាលពីចុងសប្ដាហ៍ ឧបនាយករដ្ឋមន្ត្រីចិន លោក He Lifeng បានលើកឡើងថា «កិច្ចប្រជុំសម្រេចបានការរីកចម្រើនយ៉ាងខ្លាំង និងឈានដល់ការយល់ព្រមដ៏សំខាន់»។

រដ្ឋមន្ត្រីក្រសួងរតនាគារអាមេរិក លោក Scott Bessent និងឧបនាយករដ្ឋមន្ត្រីចិន លោក He Lifeng (ខាងស្ដាំ)

អនុរដ្ឋមន្ត្រីក្រសួងពាណិជ្ជកម្មចិន លោក Li Chenggang ឯណោះវិញ បាននិយាយថា វានឹងមាន «ដំណឹងល្អសម្រាប់ពិភពលោក» ចំពេលដែលរដ្ឋមន្ត្រីក្រសួងរតនាគារអាមេរិក លោក Scott Bessent និងតំណាងសភាពាណិជ្ជកម្មអាមេរិក លោក Jamieson Greer បានលើកឡើងពីការចរចាពាណិជ្ជកម្ម «ប្រកបដោយផលិតភាព» និង «វឌ្ឍនភាពគួរឱ្យកត់សម្គាល់»។

ជាធម្មតា ការចរចាជាវិជ្ជមានរវាងមហាអំណាចសេដ្ឋកិច្ចទាំង២របស់ពិភពលោក អាចជួយជំរុញតម្រូវការប្រេងឆៅ ខណៈតម្លៃប្រេងធ្លាក់ចុះនាពេលកន្លងមក ដោយសារតែកង្វល់កម្សោយសេដ្ឋកិច្ចដោយសារតែសង្រ្គាមពាណិជ្ជកម្ម។ យ៉ាងណាមិញ អ្នកជំនាញលើកឡើងថា លទ្ធភាពនៃការដំឡើងផលិតកម្មប្រេងរបស់អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) ធ្វើឱ្យកំណើនប្រេងនៅមានកំណត់៕