អាមេរិកប្រាប់វៀតណាមថា ឱនភាពពាណិជ្ជកម្មមានទំហំធំពេក និងជាកង្វល់ចម្បង ​

សហរដ្ឋអាមេរិកបានប្រាប់​វៀតណាម​ថា ​ឱនភាពពាណិជ្ជកម្មរបស់ខ្លួនជាមួយវៀតណាម មាន​ទំហំធំពេក ហើយជា​កង្វល់ដ៏ធំ ខណៈប្រទេសទាំង២កំពុងចរចាពន្ធគយបដិការ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ ដែលស្រង់ព័ត៌មាន​បន្តពី​ប្រព័ន្ធផ្សព្វផ្សាយរដ្ឋវៀតណាម​នៅថ្ងៃសុក្រនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីរាយការណ៍ឱ្យដឹងថា មន្ត្រីជាន់ខ្ពស់ក្រសួងរតនាគារសហរដ្ឋអាមេរិក លោក Robert Kaproth បាននិយាយ​ក្នុងកិច្ចប្រជុំកាលពីថ្ងៃព្រហស្បតិ៍ជាមួយអនុរដ្ឋមន្ត្រីក្រសួងហិរញ្ញវត្ថុវៀតណាម លោក Cao Anh Tuan ថា វៀតណាមត្រូវតែចាត់វិធានការដើម្បីប្រយុទ្ធប្រឆាំងនឹងការ​ដឹកជញ្ជូនទំនិញឆ្លងកាត់ខុសច្បាប់ និងការក្លែងបន្លំពាណិជ្ជកម្ម​ផ្សេងៗទៀត​។

ជាការឆ្លើយតប លោក Tuan បានស្នើឱ្យលោក Kaproth ជួយសម្រួលដល់ការនាំចូលផលិតផលបច្ចេកវិទ្យាខ្ពស់​អាមេរិករបស់វៀតណាម ដែលជាផ្នែក​មួយនៃកិច្ចខិតខំប្រឹងប្រែង​ដើម្បីបង្រួមឱនភាពពាណិជ្ជកម្ម ដែលមានទំហំជាង ១២៣ ប៊ីលាន​ដុល្លារ កាលពីឆ្នាំមុន។ ​

លោក Tuan បាននិយាយថា៖ «វៀតណាមមានតម្រូវការសម្រាប់ផលិតផល ដែលជាចំណុចខ្លាំងរបស់សហរដ្ឋអាមេរិកក្នុងវិស័យថាមពល បច្ចេកវិទ្យាខ្ពស់ អាកាសចរណ៍ គ្រឿងចក្រ ​និងផលិតផលកសិកម្ម​»។

គួរគូស​បញ្ជាក់ថា វៀតណាម ដែលរងពន្ធគយបដិការ ៤៦ ភាគរយ ​កំពុងចរចាពន្ធនេះជាមួយសហរដ្ឋអាមេរិក ដើម្បីបញ្ចៀសការអនុវត្ត ដែលគ្រោងចាប់ផ្ដើមពីដើមខែកក្កដា​តទៅ។

​គេមើលឃើញថា ដើម្បីកាត់បន្ថយអតិរេកពាណិជ្ជកម្មជាមួយ​អាមេរិក​ វៀតណាម​ថ្មីៗនេះ​បានចាត់វិធានការជាច្រើន រួមទាំង​ការសន្យាបង្កើនការនាំចូលពីអាមេរិក និងបង្រ្កាបលើទំនិញចិន ដែលប្រើប្រាស់វៀតណាមជាផ្លូវនាំចេញទៅសហរដ្ឋអាមេរិកដើម្បីចៀសវាងពន្ធ៕