ចំណូលក្រុមហ៊ុនផ្លូវដែក Royal Railway កើនឡើងតិចក្នុងត្រីមាសទី១កន្លងមកនេះ

ក្រុមហ៊ុនរ៉ូយ៉ាល់ រេលវេ (Royal Railway) ​រកចំណូលសរុបចំនួន ១៤ ០៥៦ លានរៀល ក្នុងត្រីមាសទី១ ឆ្នំា២០២៥ កើនឡើង ៥,៦៣% បើធៀប នឹងត្រីមាសទី១ ឆ្នំា២០២៤ ខណៈការខាតសុទ្ធក្នុងត្រីមាសនេះ​មានចំនួន ​៨ ០៧១​លានរៀលធ្លាក់ចុះ ចំនួន ៩៧ លានរៀលស្មើនឹង ​១,១៩%​ បើធៀបនឹងត្រីមាសទី១ ឆ្នំា២០២៤ ។

យោងតាមរបាយការណ៍របស់ក្រុមហ៊ុនផ្ញើរទៅកាន់ផ្សារមូលបត្រកម្ពុជា (CSX) សេវាកម្មសំខាន់ៗ របស់ រ៉ូយ៉ាល់ រេលវេ រួមមានសេវាកម្មដឹកជញ្ជូន (ប្រេងឥន្ធនៈ ស៊ីម៉ងត៍ ថ្ម អង្ករ ។ល។) ការដឹកជញ្ជូនឥន្ធនៈមាន ចំនួនច្រើនជាងការដឹកជញ្ជូនតាមកុងតឺន័រ (សម្លៀកបំពាក់ រថយន្ត អង្ករ កៅស៊ូ ស្ករ។ល។) មានឃ្លាំងសម្រាប់ជួលក្នុងការស្តុកទំនិញ និង សេវាកម្មរត់ឯកសារគយ និងពន្ធគយ។

អ្នកឧកញ៉ា គិត ម៉េង ប្រធានក្រុមប្រឹក្សាភិបាលក្រុមហ៊ុនបានលើកឡើងនៅក្នុងរយបាយការណ៍ថា សេដ្ឋកិច្ចកម្ពុជា ត្រូវបានព្យាករណ៍ថានឹងមានការលូតលាស់ចំនួន ៦,១% ក្នុងឆ្នាំ ២០២៥ និង ៦,២% ក្នុងឆ្នាំ ២០២៦។

លោកថា ការលូតលាស់នេះ បានជម្រុញ ដោយការកើនឡើងនៃទំនាក់ទំនងពាណិជ្ជកម្មក្រៅប្រទេសចំពោះការផលិតទំនិញក្នុងស្រុក និងការប្រសើរឡើងវិញ របស់ វិស័យទេសចរណ៍។ វិស័យសំណង់ និងអចលនទ្រព្យនឹងអាចកើនឡើងបន្តិចបន្តួច ខណៈពេលដែលវិស័យកសិកម្មនឹងបន្តមានការកើន ឡើង។

«ចំពេលបរិយាកាសធុរកិច្ចប្រកបដោយភាពប្រកួតប្រជែងនេះ រ៉ូយ៉ាល់ រេលវេ បានដើរតួយ៉ាងសំខាន់ក្នុងការរួមចំណែកដល់ការអភិវឌ្ឍន៍ សេដ្ឋកិច្ចប្រកបដោយនិរន្តរភាព តាមរយៈការបន្តចូលរួមជាមួយអតិថិជនថ្មីសម្រាប់សេវាកម្មដឹកជញ្ជូនទំនិញជាមួយនឹងតម្លៃសមរម្យបំផុត ដើម្បីសមជាមួយនឹងការផ្លាស់ប្តូរស្ថានភាពសេដ្ឋកិច្ចនេះ»។ នេះបើយោងតាមការបញ្ជាក់របស់អ្នកឧកញ៉ា។

ចំពោះផ្នែកប្រតិបត្តិការហិរញ្ញវត្ថុ គិតត្រឹមត្រីមាសទី១ ឆ្នាំ២០២៥ នេះក្រុមហ៊ុនមានទ្រព្យសកម្មសរុបមានចំនួន ១២១ ៣១៦ លានរៀល ដោយធ្លាក់ចុះចំនួន -១១,១២% បើធៀបនឹងត្រីមាសដូចគ្នានៃឆ្នាំ២០២៤។ ប្រាក់ចំណូលសរុបមានចំនួន ១៤ ០៥៦ លានរៀល កើនឡើង ៥,៦៣% បើធៀបនឹងត្រីមាសដូចគ្នានៃឆ្នាំ២០២៤។

អ្នកឧកញ៉ា​ គិត ម៉េងបានថ្លែងថា៖«លទ្ធផលទាំងនេះត្រូវបានជំរុញដោយការអនុវត្តជោគជ័យរបស់ក្រុមហ៊ុននៃយុទ្ធសាស្ត្រអាជីវកម្មដ៏ល្អរបស់ខ្លួនដោយភាពស៊ីសង្វាក់គ្នា និង ភាពមានវិន័យបន្តរហូតដល់សម្រេចគោលដៅរបស់ក្រុមហ៊ុន»។

ក្រុមហ៊ុនរ៉ូយ៉ាល់ រ៉េលវេ បានឱ្យដឹកកាលពីសប្តាហ៍មុនថា ខ្លួន​​​បានបញ្ជាទិញឈុត​កង់រថភ្លើងចំនួន ១៥០ ឈុត និងគ្រឿងបរិក្ខាមួយ​ចំនួន​ធំទៀតដើម្បីផ្គត់ផ្គង់ដល់ការមើលថែទាំទូរថភ្លើងដឹកទំនិញ។ កាលពីពេលកន្លងទៅថ្មីៗនេះ ក្រុមហ៊ុន​បាន​បញ្ជាទិញទូរថភ្លើងដឹកទំនិញថ្មីចំនួន ២២១ គ្រឿង ពីប្រទេសចិន ដើម្បីបង្កើនសមត្ថភាពដឹកជញ្ជូនឱ្យកាន់តែល្អប្រសើរជាងមុន។

ផ្លូវដែកនៅកម្ពុជាមានពីរខ្សែ គឺខ្សែខាងជើង និងខ្សែខាងត្បូង ដែលមានប្រវែងសរុប ៦៥០ គីឡូម៉ែត្រ។ ខ្សែខាងជើងមានប្រវែងសរុប ៣៨៦គីឡូម៉ែត្រ ពីភ្នំពេញទៅក្រុងប៉ោយប៉ែត (ព្រំដែនកម្ពុជា-ថៃ)។ ខ្សែខាងត្បូងមានប្រវែងសរុប ២៦៤គីឡូម៉ែត្រ៕