Apple ដណ្ដើមតំណែងកំពូលលើទីផ្សារស្មាតហ្វូននៅចិនមកវិញ ក្រោយលក់ iPhone បញ្ចុះតម្លៃ

ក្រុមហ៊ុនបច្ចេកវិទ្យាយក្សអាមេរិក Apple បាន​ដណ្ដើមតំណែងកំពូលលើទីផ្សារស្មាតហ្វូននៅក្នុងប្រទេសចិនមកវិញ ដោយកាន់កាប់ចំណែកទីផ្សារ​ប្រមាណ ២១,៥ ភាគរយ​ កាលពីសប្ដាហ៍មុន ក្រោយលក់ iPhone បញ្ចុះតម្លៃខ្លាំងរហូតដល់ ៣៥០ ដុល្លារ។ នេះបើតាមការចុះផ្សាយបន្តរបស់កាសែត VnExpress។

គេហទំព័របច្ចេកវិទ្យា PhoneArena បានរាយការណ៍ថា ​Apple បានលក់ iPhone បញ្ចុះតម្លៃដើម្បីទទួលបានសន្ទុះលក់ឡើងវិញ បន្ទាប់ពី​ធ្លាក់តំណែងកំពូលអស់ជាច្រើនខែទៅឱ្យ​គូប្រកួតប្រជែងក្នុងស្រុកចិន ដូចជា Huawei និង Xiaomi ជាដើម។ ​យុទ្ធសាស្រ្តបញ្ចុះតម្លៃបច្ចុប្បន្ន ​ត្រូវបានដាក់ចេញមុនព្រឹត្តិការណ៍ទិញទំនិញពាក់កណ្តាលឆ្នាំ​នៅចិន ពោលគឺ «618 Festival» នៅថ្ងៃទី ១៨ ខែមិថុនា។

វេទិកាពាណិជ្ជកម្មអេឡិចត្រូនិក ​JD.com ​បានកំណត់តម្លៃ iPhone 16 Pro (128 GB) នៅតម្លៃ ៥ ៤៦៩ យន់ (៧៥៩ ដុល្លារ) ពោលគឺធ្លាក់ចុះ ២ ៥៣០ យន់ (៣៥០ ដុល្លារ) ធៀបនឹងតម្លៃផ្លូវការរបស់ Apple។ ​វេទិកា Tmall របស់ Alibaba ​បានកំណត់តម្លៃស្មាតហ្វូនម៉ាកដដែល ក្នុងតម្លៃប្រហាក់ប្រហែលគ្នា ប្រមាណ ៥ ៤៩៩ យន់។ ​​

យុទ្ធសាស្រ្តនេះបានផល ដោយ​ ​​PhoneArena បានរាយការណ៍ថា ក្នុងរយៈពេលត្រឹមតែ ១ សប្ដាហ៍ Apple លក់ទូរស័ព្ទ 16 Pros បានជាង ៥២០ ០០០ គ្រឿង និង 16 Pro Max ៣២០ ០០០ គ្រឿង។ ​

គួរគូសបញ្ជាក់ថា ចំណែកទីផ្សាររបស់ក្រុមហ៊ុន Apple ​នៅចិន ដែលជាទីផ្សារស្មាតហ្វូនដ៏ធំបំផុតមួយ​របស់​ពិភព​លោក ​បាន​ប្រឈមមុខនឹងការប្រកួតប្រជែងកាន់តែខ្លាំង រួមទាំងសង្រ្គាមតម្លៃ។​

ភាព​តានតឹង​ភូមិសាស្ត្រ​នយោបាយ​ក៏ជាបញ្ហាផងដែរ ដោយ​អតិថិជនចិន​ងាកទៅប្រើប្រាស់ផលិតផលក្នុងស្រុក ដោយសារតែកំណើនជាតិនិយម ចំពេលសហរដ្ឋអាមេរិក និងចិន​ ធ្វើសង្រ្គាមពាណិជ្ជកម្មពន្ធគយជាមួយ​គ្នា​៕ ​