សហភាពអឺរ៉ុបប្រចាំអាស៊ាន ប្តេជ្ញាគាំទ្រវិស័យវិទ្យាសាស្ត្រ បច្ចេកវិទ្យា និងនវានុវត្តន៍ នៅកម្ពុជា

លើក​ឡើង​ក្នុង​សិក្ខាសាលា «អឺរ៉ុប-អាស៊ានលើកទី៦ នៃគម្រោងមជ្ឈមណ្ឌលគ្រប់គ្រងបច្ចេកវិទ្យាអាស៊ាន – ASEAN TMH » កាល​ពី​ពេល​ថ្មី​ៗ​កន្លង​ទៅ​នេះ​ លោក Sujiro Seam ឯកអគ្គរដ្ឋទូតសហភាពអឺរ៉ុបប្រចាំអាស៊ាន បាន​បញ្ជាក់​ការ​ប្ដេជ្ញាចិត្ត​របស់​សហភាព ចំពោះ​វិទ្យាសាស្ត្រ បច្ចេកវិទ្យា និងនវានុវត្តន៍នៅកម្ពុជា ដោយលើកឡើងថា ASEAN TMH នឹង​ផ្ដល់ជា​ថ្នាល​បច្ចេកវិទ្យា​រួម​មួយ​សម្រាប់​តម្រូវការ និង​បំណង​ប្រាថ្នា​របស់តំបន់។

លោក​ឯកអគ្គរដ្ឋទូត បាន​មាន​ប្រសាសន៍​ថា តាមរយៈគម្រោង E-READI សហភាពអឺរ៉ុប​បានគាំទ្រសិក្ខាសាលាជាច្រើនកន្លងមក ហើយសិក្ខាសាលាលើកទី៦នេះ ផ្តោត​លើការរៀប​​ចំ​បញ្ចប់​ផែនការ​អនុវត្តសម្រាប់ ASEAN TMH»។

លោក​ក៏បានគូសបញ្ជាក់ពីគំនិតផ្ដួចផ្ដើម Horizon Europe ដែលមានមូលនិធិ ៩៥,៥ ពាន់លានអឺរ៉ូ ដើម្បីគាំទ្រ​គម្រោងស្រាវជ្រាវនវានុវត្តន៍ ចាប់ពីឆ្នាំ២០២១ ដល់ឆ្នាំ២០២៧ ថាជា​ឧទាហរណ៍​គំរូមួយ​សម្រាប់​កិច្ច​សហប្រតិបត្តិការ​វិទ្យាសាស្ត្រ និង​នវានុវត្តន៍ជាសកលរបស់អឺរ៉ុប។

ក្នុង​ឱកាស​នោះ លោក ហ៊ុល សៀងហេង អនុរដ្ឋលេខាធិការ ក្រសួងឧស្សា​ហ​កម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធាន COSTI កម្ពុជា បាន​សង្កត់ធ្ងន់លើការកំណត់ជំហានច្បាស់លាល់សម្រាប់ការអនុវត្ត បន្ថែមពីលើការពិភាក្សា។

លោក​បានលើកឡើងថា ការពិភាក្សាអំពីតួនាទីរបស់​ក្រុម​ការងារ​ ASEAN TMH និងការរៀបចំឯកសារស្តីពីមុខងារ និង​លក្ខខណ្ឌ​តម្រូវបច្ចេកទេស គឺជាមូលដ្ឋានសម្រាប់ការអនុវត្តថ្នាលបច្ចេកវិទ្យានេះ។ ជា​ពិសេស​ការគាំទ្រ​របស់សហភាពអឺរ៉ុប តាមរយៈគម្រោង E-READI ដែល​ជា​មូល​ដ្ឋាន​គ្រឹះដ៏រឹងមាំសម្រាប់អាស៊ានក្នុងការជំរុញការផ្ទេរបច្ចេកវិទ្យា ការលើកកម្ពស់​ប្រព័ន្ធអេកូឡូស៊ីនវានុវត្តន៍ និងការជំរុញកំណើនប្រកបដោយភាពធន់ និងបរិយាបន្ន។

ដដែល​នោះ​ លោកស្រីបណ្ឌិត Elrade Rofaani តំណាងប្រធាន COSTI ឥណ្ឌូណេស៊ី បានលើកឡើងថា ASEAN​ TMH ត្រូវបានបង្កើតឡើងជាថ្នាលវិទ្យាសាស្ត្រ បច្ចេកវិទ្យា និងនវានុវត្តន៍អនឡាញ ដើម្បីភ្ជាប់ការស្រាវជ្រាវ​របស់​សាកលវិទ្យាល័យ ជាមួយ​ស្ថាប័នឯកជនដែលផ្តោតលើនវានុវត្តន៍ ក្នុងគោលដៅបង្កើន​ផលសម្រាប់សង្គម និង​សក្តានុ​ពល​ពាណិជ្ជ​កម្ម។ យើងរំពឹងថាថ្នាលអនឡាញនេះ នឹងរួមចំណែកដោះស្រាយ​បញ្ហាហេដ្ឋារចនាសម្ព័ន្ធបច្ចេកវិទ្យា​ក្នុងតំបន់ ដែល​ចាំបាច់​សម្រាប់ការធ្វើពាណិជ្ជកម្ម និងការពង្រីកផលនៃនវានុវត្តន៍។

លោកស្រី​បណ្ឌិត Zurina Moktar ប្រធាននាយកដ្ឋានវិទ្យាសាស្ត្រ និងបច្ចេកវិទ្យា នៃលេខាធិការដ្ឋានអាស៊ាន ក៏​បានលើកឡើងថា ជាង ៥០% នៃកំណើនផលិតផលក្នុងស្រុកសរុបនៅទសវត្សរ៍នេះ នឹងជំរុញដោយវិស័យដែល​មាន​ឫស​គល់​ក្នុង​នវានុវត្តន៍ និងបច្ចេកវិទ្យា។ ប្រសិនបើអាស៊ានចង់បន្តនាំមុខកំណើននេះ យើងត្រូវតែ​ធានាថា​ថ្នាល​បច្ចេកវិទ្យា​ដូចជា TMH មិន​ត្រឹមតែ​ជា​បំណងប្រាថ្នាប៉ុណ្ណោះទេ តែជាថ្នាលអាចដំណើរការប្រកបដោយប្រសិទ្ធិភាព ត្រឹមត្រូវតាម​បច្ចេក​ទេស មាននិរន្តរភាពហិរញ្ញវត្ថុ និងមានរចនាសម្ព័ន្ធរឹងមាំផងដែរ។

គម្រោងមជ្ឈមណ្ឌលគ្រប់គ្រងបច្ចេកវិទ្យាអាស៊ាន ត្រូវបានស្នើឡើងដំបូងដោយកម្ពុជា និងឥណ្ឌូណេស៊ីក្នុងឆ្នាំ២០២១ ហើយត្រូវបានគណៈកម្មាធិការអាស៊ាន COSTI ​គាំទ្រជាអាទិភាព​ប្រចាំឆ្នាំ២០២២ ២០២៣ និង ២០២៤។ គម្រោង​នេះ​មានគោល​ដៅផ្សារភ្ជាប់អ្នកស្រាវជ្រាវ ជាមួយ​វិស័យឯកជន ស្ថាប័នរដ្ឋាភិបាល អង្គការមិនមែនរដ្ឋា​ភិ​បាល ធុរកិច្ចបង្កើតថ្មី និងអ្នកវិនិយោគនៅទូទាំងតំបន់អាស៊ាន ដើម្បីលើកកម្ពស់ភាពជាដៃគូ បង្កើតការសហការ និងពន្លឿនការធ្វើពាណិជ្ជកម្ម​បច្ចេកវិទ្យាថ្មីៗ។ អ្នកទទួលផលសំខាន់ៗនៃ​គម្រោងនេះ រួមមានសាកលវិទ្យាល័យ​ដែល​ផ្ដោតលើវិទ្យាសាស្ត្រ បច្ចេកវិទ្យា និងនវានុវត្តន៍, សហគ្រាសធុនមីក្រូ តូច មធ្យម និងធំ, និងស្ថាប័នគោល​នយោ​បាយវិទ្យាសាស្ត្រ បច្ចេកវិទ្យា និងនវានុវត្តន៍ជាតិ៕