តម្លៃមាស ប្រេងអន្តរជាតិហក់ឡើងខ្ពស់ ក្រោយអ៊ីស្រាអែលវាយប្រហារអ៊ីរ៉ង់

តម្លៃមាស និងប្រេងអន្តរជាតិ​ បាន​ហក់ឡើងខ្ពស់ជាថ្មី ក្រោមបរិបទនៃកំណើនភាពតានតឹងនៅមជ្ឈិមបូព៌ា ដោយអ៊ីស្រាអែលវាយប្រហារ «គោលដៅនុយក្លេអ៊ែរ» របស់អ៊ីរ៉ង់នៅដើមព្រឹកថ្ងៃសុក្រនេះ។

តម្លៃប្រេងអន្តរជាតិនាពេលអនាគត ម៉ាក Brent បាន​កើនឡើង ៥,៨៦ ដុល្លារ ឬ ៨,៤៥ ភាគរយ ដោយ​ជួញដូរនៅតម្លៃ ៧៥,២២ ដុល្លារ/បារ៉ែល សម្រាប់ការជួញដូរនៅព្រឹកថ្ងៃសុក្រនេះ គិតត្រឹមម៉ោង ៩ និង ៣០ នាទី នៅក្រុងហុងកុង។ ចំណែកឯតម្លៃប្រេងអាមេរិក ម៉ោង WTI វិញ បាន​កើនឡើង ៦ ដុល្លារ ឬ ៨,៨២ ភាគរយ ដោយជួញដូរនៅតម្លៃ ៧៤,០៤ ដុល្លារ/បារ៉ែល។

តម្លៃមាសវិញ ក៏កើនឡើងគួរឱ្យកត់សម្គាល់​ផងដែរ​ ដោយ​តម្លៃមាសជួញដូរដោយផ្ទាល់ បាន​កើនឡើងប្រមាណ ១០២,១៥ ដុល្លារ ឬ ៣,០៧ ភាគរយ ដោយជួញដូរនៅតម្លៃ ៣ ៤២៦,៩៥ ដុល្លារ/អោន គិតត្រឹមម៉ោង ៩ និង ៤០ នាទីយប់ ថ្ងៃព្រហស្បតិ៍ នៅទីក្រុងញូវយ៉ក។

កំណើនតម្លៃទំនិញដ៏ខ្ពស់នេះ កើតឡើងក្រោយអ៊ីស្រាអែល​បាន​វាយប្រហារ​លើ​ហេដ្ឋា​រចនាសម្ព័ន្ធនុយក្លេអ៊ែរសំខាន់ៗរបស់អ៊ីរ៉ង់ រួមទាំងកន្លែងចម្រាញ់សារធាតុអ៊ុយរ៉ាញ៉ូម ក៏ដូចជា​រោងចក្រមីស៊ីលរបស់ប្រទេសនេះ។ ការវាយប្រហារនេះ ធ្វើឡើងក្រោយអាមេរិក​ប្រកាសត្រៀមជម្លៀសបុគ្គលិកការទូតពីអ៊ីរ៉ាក់ ក្រោយអ៊ីរ៉ង់ប្រកាសវាយប្រហារលើទីតាំងសំខាន់ៗរបស់អាមេរិកនៅមជ្ឈិមបូព៌ា ប្រសិន​បើ​ការចរចាកិច្ចព្រមព្រៀងអ៊ីរ៉ង់បរាជ័យ។

នេះបង្ហាញពីភាពតានតឹងកាន់តែខ្លាំងជាថ្មីនៃជម្លោះភូមិសាស្រ្តនយោបាយមជ្ឈិមបូព៌ា ​ដែលជាប្រភពផ្គត់ផ្គង់ប្រេងដ៏សំខាន់របស់សកល។ នេះនឹងបង្កការរំខានផ្នែកផ្គត់ផ្គង់ ដែល​ជំរុញឱ្យតម្លៃប្រេងហក់ឡើង។ ជាមួយគ្នានោះ តម្លៃមាសកើនឡើងដូចគ្នា នៅពេលដែលវិនិយោគិនងាកទៅទិញ ក្រោមបរិបទនៃ​ហានិភ័យភូមិសាស្រ្តនយោបាយ និងសេដ្ឋកិច្ច៕