​ថៃ​ប្ដេជ្ញាជួយ​ពលរដ្ឋតាមព្រំដែន ដែល​ប៉ះពាល់​ពីបញ្ហាព្រំដែន-ពាណិជ្ជកម្ម ជាមួយ​កម្ពុជា ​

ក្រសួងពាណិជ្ជកម្មថៃបានប្តេជ្ញាផ្តល់ការគាំទ្រយ៉ាងដិតដល់ ដល់ប្រជាពលរដ្ឋថៃដែលរស់នៅតាម​បណ្ដោយព្រំដែនជាប់កម្ពុជា ដើម្បីកាត់បន្ថយផលប៉ះពាល់នៃការរំខានពាណិជ្ជកម្មដោយ​ការបិទច្រកព្រំដែន​ និងពន្លឿនការចែកចាយបន្លែ-ផ្លែឈើស្រស់ដើម្បីជួយដល់កសិករក្នុងស្រុក ជាពិសេសក្រោយពេលដែលកម្ពុជាបិទការនាំចូលបន្លែផ្លែ-ឈើពីថៃ ដែលធ្វើឱ្យតម្លៃផ្លែឈើថៃធ្លាក់ចុះ។ នេះបើតាមការចុះផ្សាយរបស់កាសែត The Nation។

រដ្ឋមន្ត្រីក្រសួងពាណិជ្ជកម្មថៃ លោក Pichai Naripthaphan បានប្រកាសកាលពីថ្ងៃអង្គារ ក្រោយកិច្ចប្រជុំជាមួយ​លោកស្រីនាយករដ្ឋមន្រ្តី ផែថងថាន ស៊ីណាវ៉ាត្រ ថា លោកស្រីបាន​បានណែនាំ​ឱ្យ​ក្រសួងពាណិជ្ជកម្ម ត្រួតពិនិត្យឱ្យ​បានដិតដល់នូវសុខុមាលភាព និងទុក្ខលំបាករបស់ប្រជាពលរដ្ឋនៅតាមតំបន់ព្រំដែន ដោយអនុវត្តវិធានការឲ្យបានគ្រប់ជ្រុងជ្រោយ ដើម្បីកាត់បន្ថយផលប៉ះពាល់អវិជ្ជមាននានា។

កិច្ចខិតខំប្រឹងប្រែង​ជួញពលរដ្ឋ​នឹង​ធ្វើឡើងតាមខេត្តថៃចំនួន ៧ ជាប់ព្រំដែនកម្ពុជារួមមាន​ ​ខេត្ត​អូប៊ុនរាជថានី ស៊ីសាកេត សុរិន្ទ ខេត្តបុរីរម្យ ស្រះកែវ ច័ន្ទបុរី និងត្រាត ប្រសិនបើបញ្ហាកើតឡើង ​រួមទាំងបញ្ហាតម្លៃសម្រាប់ទំនិញកសិកម្ម និងទំនិញប្រើប្រាស់។

ដោយសារភាព​តានតឹងនៅព្រំដែនកម្ពុជា ដែលឈានទៅដល់ការបិទច្រកទ្វារពាណិជ្ជកម្មមួយចំនួន ក្រសួងពាណិជ្ជកម្ម តាមរយៈនាយកដ្ឋានពាណិជ្ជកម្មផ្ទៃក្នុងរបស់ខ្លួន កំពុងតាមដានស្ថានការណ៍យ៉ាងដិតដល់។​

កន្លងមក ថៃបាន​ចាត់វិធានការផ្សេងៗ ដើម្បីសម្រួលដល់ការចែកចាយកសិផលក្នុងស្រុក។ នេះរួមបញ្ចូលទាំងការផ្តោតជាពិសេសលើការផ្លាស់ប្ដូរខ្សែច្រវ៉ាក់ផ្គត់ផ្គង់ផ្លែឈើ ៣ ០០០ តោន ពីតំបន់ភាគខាងកើតទៅកាន់ទីផ្សារក្នុងស្រុក ដែលជាកិច្ចខិតខំប្រឹងប្រែងរួមគ្នារវាងវិស័យសាធារណៈ និងឯកជន។