ណេតាន់យ៉ាហ៊ូ ប្រកាសជោគជ័យជាប្រវត្តិសាស្រ្តលើ អ៊ីរ៉ង់

ក្នុងសុន្ទរកថាទៅកាន់ប្រទេសជាតិកាលពីរាត្រីថ្ងៃអង្គារទី២៤ខែមិថុនាឆ្នាំ២០២៥ នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ ប្រកាសថា ប្រទេសរបស់លោក បានទទួលជ័យជម្នះជាប្រវត្តិសាស្រ្តលើអ៊ីរ៉ង់ ក្នុងសង្គ្រាមរយៈពេល១២ថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា អ៊ីស្រាអែល បានលុបបំបាត់ការគំរាមកំហែងនុយក្លេអ៊ែររបស់អ៊ីរ៉ង់មកលើខ្លួន និងថែមបំផ្លាញមីស៊ីលបាលិស្ទិកអ៊ីរ៉ង់រាប់ពាន់គ្រាប់ថែមទៀតផង។

ក្នុងអំឡុងពេលនោះដែរ លោកណេតាន់យ៉ាហ៊ូ បានបង្ហាញការប្តេជ្ញាចិត្តធ្វើឲ្យអ៊ីរ៉ង់ចុះខ្សោយ និងកម្ចាត់ក្រុមហាម៉ាស ហើយធានាការរំដោះចំណាប់ខ្មាំងនៅក្នុងតំបន់ហ្គាហ្សា។

សុន្ទរកថានេះកើតឡើងបន្ទាប់ពីបទឈប់បាញ់ដែលសម្របសម្រួលដោយអាមេរិក បានចូលជាធរមានកាលពីថ្ងៃអង្គារ ខណៈរដ្ឋមន្ត្រីការពារជាតិអ៊ីស្រាអែល Israel Katz បញ្ជាក់ទៅសមភាគីអាមេរិក Pete Hegseth ថា ខ្លួននឹងគោរពបទឈប់បាញ់ដរាបណាអ៊ីរ៉ង់គោរពដែរ។

ទន្ទឹមនោះ លោក Katz ក៏បានអរគុណដល់លោក Hegseth ដែរ សម្រាប់ការសម្រេចចិត្តរបស់ប្រធានាធិបតី ដូណាល់ ត្រាំ ចូលរួមជាមួយអ៊ីស្រាអែល ប្រឆាំងកម្មវិធីនុយក្លេអ៊ែររបស់អ៊ីរ៉ង់។

សូមជម្រាបជាថ្មី សង្គ្រាមផ្ទុះឡើងនៅពេលអ៊ីស្រាអែល បើកប្រតិបត្តិការ «Risisng Lion» កាលពីថ្ងៃសុក្រទី១៣ខែមិថុនាឆ្នាំ២០២៥ ដោយបាញ់មីស៊ីលលើទីក្រុងតេហេរ៉ង់យ៉ាងភ្ញាក់ផ្អើលជាទីបំផុត។ 

ជុំវិញប្រតិបត្តិការនេះ ប្រធានាធិបតី​អ៊ីស្រាអែល Isaac Herzog បានបញ្ជាក់ក្នុងបទសម្ភាសជាមួយ Sky News ​ថា ប្រទេសរបស់លោកគ្មាន​ជម្រើស​ផ្សេងក្រៅ​ពី​វាយ​អ៊ីរ៉ង់ឡើយ ព្រោះអ៊ីរ៉ង់កំពុង​ស្ថិតនៅលើផ្លូវឈានឆ្ពោះទៅរកការផលិតបាន​គ្រាប់បែក​នុយក្លេអ៊ែរហើយ៕

អត្ថបទ៖ សុខ សុវណ្ណ

ចុចអាន៖ រដ្ឋមន្ត្រីការបរទេស​អ៊ីរ៉ង់ ​ទៅជួប ​ពូទីន ដើម្បីសុំជំនួយ​យោធា