សេដ្ឋកិច្ច

កម្ពុជារកចំណូលបានជាង ២៦ លានដុល្លារ ពីការលក់សំបុត្រចូលទស្សនាអង្គរនៅឆមាសទី១

បានផុស

១០ ខែ មុន

នៅ

ថ្ងៃអង្គារ ១ កក្កដា ២០២៥

ដោយ

កម្ពុជារកចំណូលបានជាង ២៦,៣ លានដុល្លារ ពីការលក់សំបុត្រចូលទស្សនារមណីយដ្ឋានអង្គរនៅក្នុងឆមាសទី១ ឆ្នាំ ២០២៥ កើនឡើង ៨,០៤% ធៀបនឹងរយៈពេលដូចគ្នា នៅឆ្នាំ២០២៤។ នេះបើយោងតាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃទី ០១ ខែកក្កដា ឆ្នាំ ២០២៥។

របាយការណ៍របស់គ្រឹះស្ថានអង្គរបង្ហាញថា រយៈពេល ៦ ខែ ឆ្នាំ ២០២៥ ភ្ញៀវទេសចរណ៍អន្តរជាតិចំនួន ៥៦៧ ៦៧៣ នាក់ បានទិញសំបុត្រចូលទស្សនារមណីយដ្ឋានអង្គរ កើនឡើង ៨,៧៦% ដែលធ្វើឱ្យកម្ពុជារកចំណូលបានចំនួន ២៦ ៣១៦ ២២១ ដុល្លារ កើន ៨,០៤% ធៀបនឹងរយៈពេលដូចគ្នា នៅក្នុងឆ្នាំ ២០២៤។

លោក ខៀវ ធី ប្រធានសមាគមន៍មគ្គុទ្ទេសក៏ទេសចរអង្គរប្រាប់កម្ពុជាថ្មីនៅថ្ងៃទី ០១ ខែកក្កដា នេះថា ភ្ញៀវទេសចរបរទេសនៅក្នុងខែឧសភា និងខែមិថុនា ធ្លាក់ចុះ និងចាប់ផ្ដើមកើនឡើងនៅដើមខែ ៧ និងខែ ៨ ប្រទេសមួយចំនួននៅអឺរ៉ុបចាប់ផ្ដើមវិសមកាល ពោលគឺគេចាប់ផ្ដើមដើរលេង។

លោក ខៀវ ធី យល់ឃើញថា ស្ថានភាពភ្ញៀវទេសចរបរទេសនៅថេរ ខណៈ តួលេខភ្ញៀវទេសចរណ៍ នៅតែមានសន្ទុះកើនឡើង។ លោក ខៀវ ធី អះអាងថា ថៃបិទច្រកព្រំដែន មិនប៉ះពាល់ដល់ទេសចរណ៍នៅតំបន់អង្គរនោះទេ ខណៈទេសចរបរទេសភាគច្រើនមកតាមច្រកវៀតណាមប្រមាណ ៩០%។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) មានប្រសាសន៍ថា ពិភពលោកកំពុងច្របូកច្របល់ ជុំវិញភូមិសាស្ត្រនយោបាយ និងបញ្ហាផ្សេងៗ ខណៈកម្ពុជាក៏កំពុងមានបញ្ហាជាមួយថៃ ដែលស្ថានភាពមិនប្រាកដប្រជានេះ បានបង្ខំឱ្យកម្ពុជាពិបាក។

លោក យល់ថា៖«តួលេខទេសចរណ៍កើនឡើង យើងសារទរក្នុងកាលទេសៈនេះ យើងអត់អាចប្រៀបធៀបកម្ពុជាយើងទៅប្រទេសគេផ្សេងទេ ពីព្រោះ ខ្ញុំលើកឧទាហរណ៍ដូចជាវៀតណាម គេប្រទេសធំជាងយើង មានប្រជាជនច្រើន មធ្យោបាយផ្លូវអាកាសច្រើនជាងយើង និងការផ្សព្វផ្សាយទូលំទូលាយ នៅក្នុងកាលៈទេសៈមួយផ្សេង»។

យោងតាមក្រសួងទេសចរណ៍ នៅក្នុងរយៈពេល ៥ ខែ ឆ្នាំ ២០២៥កម្ពុជាទទួលបានភ្ញៀវទេសចរអន្តរជាតិជាតិ ២,៩៥ លាននាក់ កើនឡើង ១១,៧% ធៀបនឹងរយៈពេលដូចគ្នានៅឆ្នាំ ២០២៤ ទោះបីជាស្ថានសេដ្ឋកិច្ចសកល និងតំបន់នៅបន្តប្រឈមភាពមិនប្រាកដប្រជាខ្ពស់ក្តី។

កម្ពុជារំពឹងស្វាគមន៍ភ្ញៀវទេចរអន្តជាតិប្រមាណ ៧,៥ លាននាក់នៅឆ្នាំ២០២៥ ដែលនឹងបង្កើតចំណូលចូលសេដ្ឋកិច្ចជាង៥ពាន់លានដុល្លារ៕

អត្ថបទ៖ ឡេង ដេត