ព័ត៌មានអន្ដរជាតិ

វៀតណាមសម្រេចកិច្ចព្រមព្រៀងពាណិជ្ជកម្មជាមួយអាមេរិក ដោយជាប់ពន្ធ ២០%

បានផុស

៣ នាទីutes មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

វៀតណាមក្លាយជាប្រទេសនៅអាស៊ីដំបូងគេ ដែលសម្រេចបានកិច្ចព្រមព្រៀងពាណិជ្ជកម្មជាមួយសហរដ្ឋអាមេរិកក្នុងបរិបទនៃពន្ធបដិការ ដោយលោកប្រធានាធិបតី ដូណាល់ ត្រាំ បានប្រកាសកាលពីថ្ងៃពុធថា ការព្រមព្រៀងគ្នារួមបញ្ជូលទាំងពន្ធ ២០ ភាគរយ លើទំនិញវៀតណាមនាំចូលទៅសហរដ្ឋអាមេរិក។ នេះបើតាមការចុះផ្សាយរបស់បណ្ដាញទូរទស្សន៍ CNBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការប្រកាសដែលធ្វើឡើងនៅបណ្ដាញសង្គម Truth Social លោក ត្រាំ បានអះអាងថា កិច្ចព្រមព្រៀងថ្មីនឹងអនុញ្ញាតឱ្យសហរដ្ឋអាមេរិក ចូលទៅកាន់ទីផ្សាររបស់វៀតណាមដោយមិនគិតពន្ធ។

ក្រៅពីពន្ធ ២០ ភាគរយ វៀតណាមបានយល់ព្រមថា ទំនិញរបស់ប្រទេសដទៃដែលដឹកជញ្ជូនតាមវៀតណាមទៅកាន់សហរដ្ឋអាមេរិក (ឬទំនិញ Transshipping) នឹងជាប់ពន្ធ ៤០ ភាគរយ ខណៈនាពេលកន្លងមក អាមេរិកចោទប្រកាន់វៀតណាមថាអនុញ្ញាតឱ្យទំនិញចិនឆ្លងកាត់ប្រទេសខ្លួន ដើម្បីជាច្រកនាំចេញសម្រាប់គេចពន្ធខ្ពស់ពីសហរដ្ឋអាមេរិក។

លោក ត្រាំ និយាយថា វៀតណាមនឹងចំណាយពន្ធ ២០ ភាគរយ នោះ ប៉ុន្តែមែនទែនទៅ អ្នកនាំចូលអាមេរិកទេ ដែលជាអ្នកត្រូវបង់ពន្ធនៅពេលនាំទំនិញចូលពីបរទេស។

គួររំឭកថា លោក ត្រាំ បានប្រកាសពន្ធគយបដិការនៅដើមខែមេសា ដោយកំណត់ចូលជាធរមាននៅថ្ងៃទី ៩ ខែនោះ ប៉ុន្តែក្រោយមក បានប្រកាសពន្យារពេលវិញ ៩០ ថ្ងៃ ដើម្បីទុកពេលចរចា។

វៀតណាម ដែលរងនូវពន្ធក្នុងអត្រាដើម ៤៦ ភាគរយ ចាប់ពីពេលនោះមក បានធ្វើការយ៉ាងសស្រាក់សស្រាំ រួមទាំងជំនួបរវាងមន្រ្តីជាន់ខ្ពស់សម្រាប់ការចរចាពន្ធ ដោយដាក់សំណើផ្សេងៗក្នុងគោលបំណងទម្លាក់អត្រាពន្ធឱ្យចុះទាប ចំពេលដែលវៀតណាមពឹងផ្អែកខ្លាំងលើការនាំចេញទៅសហរដ្ឋអាមេរិក ដែលបង្កើតបានជាអតិរេកពាណិជ្ជកម្មរហូតដល់ ១២៣,៥ ប៊ីលានដុល្លារកាលពីឆ្នាំមុន។

ជុំវិញការប្រកាសកិច្ចព្រមព្រៀងពាណិជ្ជកម្មថ្មី កាសែតវៀតណាម Viet Nam News បានរាយការណ៍ថា អគ្គលេខាបក្សកុម្មុយនិស្តវៀតណាម លោក Tô Lâm បានសន្ទនាតាមទូរស័ព្ទជាមួយលោក ត្រាំ កាលពីថ្ងៃពុធ ដើម្បីពិភាក្សាអំពីទំនាក់ទំនងវៀតណាម-អាមេរិក និងការចរចាលើពន្ធគយរវាងប្រទេសទាំង២។

មេដឹកនាំកំពូលទាំង២ បានសម្តែងការរីករាយចំពោះការវិវត្តដ៏រឹងមាំ និងវិជ្ជមាននៃទំនាក់ទំនងទ្វេភាគី និងបានស្វាគមចំពោះកិច្ចព្រមព្រៀងដែលក្រុមចរចារបស់ប្រទេសទាំង២សម្រេចបានលើសេចក្តីថ្លែងការណ៍រួមវៀតណាម-សហរដ្ឋអាមេរិក «ស្តីពីក្របខ័ណ្ឌកិច្ចព្រមព្រៀងពាណិជ្ជកម្មដោយយុត្តិធម៌ សមតុល្យ និងបដិការ»។

លោក Lâm បានស្នើថា ឆាប់ៗខាងមុខនេះ អាមេរិកនឹងទទួលស្គាល់វៀតណាមជាប្រទេសមានសេដ្ឋកិច្ចទីផ្សារ និងលុបចោលការរឹតបន្តឹងការនាំចេញលើផលិតផលបច្ចេកវិទ្យាខ្ពស់មួយចំនួន។ នេះបើតាម Viet Nam News។

នេះជាខ្លឹមសារនៃការប្រកាសរបស់លោក ត្រាំ កាលពីថ្ងៃពុធ៖

«វាជាកិត្តិយសដ៏អស្ចារ្យរបស់ខ្ញុំក្នុងការប្រកាសថា ខ្ញុំទើបតែសម្រេចបានកិច្ចព្រមព្រៀងពាណិជ្ជកម្មជាមួយសាធារណៈរដ្ឋសង្គមនិយមវៀតណាម បន្ទាប់ពីបាននិយាយជាមួយលោក To Lam អគ្គលេខាបក្សកុម្មុយនិស្តវៀតណាម ដ៏គួរឱ្យគោរព។ វានឹងក្លាយជាកិច្ចព្រមព្រៀងដ៏អស្ចារ្យនៃកិច្ចសហប្រតិបត្តិការរវាងប្រទេសទាំង២។ លក្ខខណ្ឌគឺថា វៀតណាមនឹងបង់ពន្ធជូនសហរដ្ឋអាមេរិក ២០ ភាគរយ លើទំនិញដែលបញ្ជូនមកប្រទេសយើង និង ៤០ ភាគរយ សម្រាប់ទំនិញ Transshipping។ អ្វីដែលពួកគេ(វៀតណាម)មិនធ្លាប់ធ្វើពីមុនមកនោះ គឹផ្តល់ឱ្យសហរដ្ឋអាមេរិកនូវសិទ្ធិពេញលេញក្នុងការចូលទៅកាន់ទីផ្សារពាណិជ្ជកម្មរបស់ពួកគេ។ អាចនិយាយបានម្យ៉ាងទៀតថា ពួកគេនឹង «បើកទីផ្សាររបស់ពួកគេសម្រាប់សហរដ្ឋអាមេរិក» ដែលមានន័យថា យើងនឹងអាចលក់ផលិតផលរបស់យើងទៅប្រទេសវៀតណាមក្នុងអត្រាពន្ធ សូន្យ ភាគរយ»។